ദേശീയപാത 66-ലെ നാട്ടിക ടോൾ പ്ലാസയിൽ ടോൾ പിരിവ് താൽക്കാലികമായി നിർത്തിവച്ചു. ശക്തമായ സമരപരിപാടികളെ തുടർന്നാണ് തീരുമാനമായത്.

തിരുവനന്തപുരത്ത് നടക്കുന്ന പിഡബ്ല്യുഡി മന്ത്രിയുടെ യോഗത്തിൽ ആണ് തീരുമാനം. ഉത്തരവ് ഇറക്കാനായി കളക്ടർക്ക് നിർദേശം നൽകിയതായാണ് സൂചനകളുള്ളത് . പൂർത്തിയാകാത്ത ദേശീയപാതയിൽ ടോൾ പിരിക്കാനുള്ള തീരുമാനം അംഗീകരിക്കില്ലെന്ന് പ്രഖ്യാപിച്ച് ഇടതു കക്ഷികളും കോൺഗ്രസും അടക്കം രാഷ്ട്രീയകക്ഷികൾ സമര രംഗത്ത് ഇറങ്ങിയിരുന്നു.

പാലം പണികളും റോഡിൻറെ പൂർത്തീകരണവും ബാക്കിയിരിക്കെ ടോൾ പിരിവ് തുടങ്ങാനുള്ള നാഷണൽ ഹൈവേ അതോറിറ്റിയുടെ തീരുമാനം ശക്തമായ എതിർപ്പാണ് ഉയർത്തിയത്. ടോൾ പ്ലാസയിലേക്ക് യുഡിഎഫ് നടത്തിയ ഉപരോധം സംഘർഷത്തിലേക്ക് നയിച്ചിരുന്നു. തീരദേശ ദേശീയപാതയുടെ ഭാഗമായ നാട്ടികയിൽ റോഡ് നിർമ്മാണം പൂർണ്ണമായി പൂർത്തിയാകുന്നതിന് മുൻപ് ടോൾ പിരിവ് ആരംഭിക്കാനായി അനുവദിക്കില്ലെന്ന നിലപാടാണ് സമരക്കാർ സ്വീകരിച്ചത്.

വ്യാഴാഴ്ച മുതൽ പ്ലാസയിൽ ടോൾ പിരിവ് ആരംഭിക്കാനായി അധികൃതർ തീരുമാനിച്ചതോടെയാണ് രാവിലെ മുതൽ തന്നെ യുഡിഎഫ് പ്രവർത്തകർ സംഘടിച്ചെത്തി ഉപരോധം തീർത്തത്.