സൗദിയിൽ ഭാര്യയെ ക്രൂരമായി മർദിച്ചെന്ന പരാതിയിൽ വിദേശത്തുനിന്ന് മടങ്ങിയ ഭർത്താവ് തിരുവനന്തപുരം വിമാനത്താവളത്തിൽ പിടിയിൽ. കൊല്ലം നീണ്ടകര സ്വദേശി നന്ദുവിനെയാണ് ഷാഡോ പൊലീസ് കസ്റ്റഡിയിലെടുത്തത്. കൊല്ലം പുത്തൻതുറ സ്വദേശിനിയായ ഭാര്യ അഞ്ജുവിന്റെ പരാതിയിലാണ് നടപടി.

സ്ത്രീധനം കുറഞ്ഞുപോയെന്ന് ആരോപിച്ച് വിവാഹം കഴിഞ്ഞ് ആഴ്ചകൾക്കുള്ളിൽത്തന്നെ ഭർത്താവും ഭർതൃവീട്ടുകാരും മാനസികമായി പീഡിപ്പിച്ചെന്നാണ് അഞ്ജുവിന്റെ പരാതി. ജൂലൈ 27നായിരുന്നു ഇരുവരുടെയും വിവാഹം. പിന്നീട് സൗദിയിലെ ജോലിസ്ഥലത്തേക്ക് ഭാര്യയെ കൊണ്ടുപോയി. അവിടെവച്ച് കുക്കർ, ലാപ്ടോപ് ചാർജർ, അടുക്കള ഉപകരണങ്ങൾ എന്നിവ ഉപയോഗിച്ച് നിരന്തരം മർദിച്ചെന്നും പരാതിയിലുണ്ട്.

ക്രൂരമായ മർദനമേറ്റ യുവതി സെപ്റ്റംബർ 30ന് നാട്ടിൽ തിരിച്ചെത്തി പൊലീസിൽ പരാതി നൽകുകയായിരുന്നു. ദേഹമാസകലം പരുക്കേറ്റ യുവതി ആശുപത്രിയിൽ ചികിത്സ തേടുകയും ചെയ്തു. വിദേശത്തായിരുന്ന ഭർത്താവിനെ കണ്ടെത്താൻ പൊലീസ് തിരച്ചിൽ നോട്ടിസ് പുറപ്പെടുവിച്ചിരുന്നു. ഇതിനുപിന്നാലെ തിരുവനന്തപുരത്ത് വിമാനമിറങ്ങിയ നന്ദുവിനെ ഷാഡോ പൊലീസ് തടഞ്ഞുവച്ച് കസ്റ്റഡിയിലെടുക്കുകയായിരുന്നു.