രണ്ടാഴ്ച മുന്‍പ് ആര്‍എസ്എസ്‌സിപിഐ(എം) പ്രവര്‍ത്തകര്‍ കൊല്ലപ്പെട്ട പയ്യന്നൂരില്‍ സിപിഎം സംഘടിപ്പിച്ച ബഹുജനകൂട്ടായ്മയില്‍ കോടിയേരി നടത്തിയ പ്രസംഗമാണ് വിവാദമായിരിക്കുന്നത്. ആക്രമിക്കാന്‍ വരുന്നവരെ വെറുതെ വിടരുതെന്നും പകരത്തിനു പകരം ചെയ്യണമെന്നുമാണ് കോടിയേരി ബാലകൃഷ്ണന്‍ പ്രവര്‍ത്തകരോട് ആവശ്യപ്പെട്ടത്. വയലില്‍ പണി തന്നാല്‍ വരമ്പത്തു കൂലി കിട്ടും. അതുകൊണ്ടു സിപിഎമ്മിനോട് കളിക്കണ്ടെന്നും കോടിയേരി പ്രസംഗത്തില്‍ പറഞ്ഞു.

വീടുകള്‍ക്കും കടകള്‍ക്കും നേരെ അക്രമം പാടില്ല. എന്നാല്‍ നമ്മളെ ആക്രമിക്കാന്‍ ആരു വരുന്നുവോ അവരോടു കണക്കു തീര്‍ക്കണം. വന്നാല്‍ വന്നതു പോലെ തിരിച്ചുവിടില്ല എന്നു ഗ്രാമങ്ങള്‍ തീരുമാനിക്കണം. അക്രമം കണ്ടു സ്തംഭിച്ചു നിന്നിട്ടു കാര്യമില്ല ശക്തമായി തന്നെ നമ്മള്‍ പ്രതിരോധിക്കണമെന്നുമാണ് പാര്‍ട്ടി പ്രവര്‍ത്തകരോട് കോടിയേരി ആവശ്യപ്പെട്ടത്.

കൊല ആസൂത്രണം ചെയ്ത ആര്‍.എസ്.എസ്-ബി.ജെ.പി നേതൃത്വത്തെ നിയമത്തിന് മുന്നിലെത്തികാണാമെന്നും, ഇത് വരെ കൊലപാതകികളെ കണ്ടെത്തുന്നതിന് പൊലീസിന് കഴിയാത്ത അവര്‍ പ്രതികളോടൊപ്പമായതു കൊണ്ടാണെന്നും കോടിയേരി ആരോപിച്ചു. ഇത്തരം സമീപനം അംഗീകരിക്കാനാവില്ലെന്നും ഇക്കാര്യത്തില്‍ തെറ്റുതിരുത്താന്‍ ഉന്നത ഉദ്യോഗസ്ഥര്‍ തയാറാവണമെന്നു കോടിയേരി ബാലകൃഷ്ണന്‍ ആവശ്യപ്പെട്ടു.
പയ്യന്നൂരില്‍ നടന്ന ഇരട്ട കൊലപാതകങ്ങളുടെ പശ്ചാത്തലത്തിലാണ് പയ്യന്നൂരില്‍ സിപിഎം ബഹുജനകൂട്ടായ്മ സംഘടിപ്പിച്ചത്.ജൂലൈ 11 നു രതിയാണ് സിപിഎം പ്രവര്‍ത്തകനയാ സിവി ധനരാജ് കൊല്ലപ്പെട്ടത്.

ധനരാജിനെ കൊലപ്പെടുത്തിയത് ബിജെപിആര്‍എസ്എസ് നേതാക്കളുടെ ആസൂത്രണത്തിന്റെയും ഗൂഡാലോചനയുടെയും ഫലമായാണ്. സംസ്ഥാനജില്ലാ നേതൃത്വം ആലോചിച്ച് നടത്തിയ കൊലപാതകമാണിത്. ഇതിനുമുമ്പ് മൂന്നുതവണ ധനരാജിനെ വകവരുത്താന്‍ കൊലയാളിസംഘത്തെ അയച്ചു. കൊലക്കേസ് മുമ്പ് നടന്ന വധശ്രമക്കേസുകളോട് ചേര്‍ത്താണ് അന്വേഷിക്കേണ്ടത്. ഗൂഢാലോചനയും ആസൂത്രണവും നടത്തിയവരെയും നിയമത്തിനു മുന്നില്‍ കൊണ്ടുവരണം. ശത്രുക്കളെ നേരിടുന്നതിന് പാര്‍ട്ടിയിലെ യുവജനങ്ങള്‍ക്ക് കായിക പരിശീലനം നല്‍കണമെന്നും അദ്ദേഹം പറഞ്ഞു.