സിസ്റ്റര്‍ അഭയയുടെ മരണത്തെ സമ്പന്ധിച്ചുള്ള ദുരൂഹതകള്‍ വെളിച്ചത്തു കൊണ്ടു വരാന്‍ നിയമപോരാട്ടം നടത്തിയിരുന്ന സിസ്റ്റര്‍ അഭയുടെ പിതാവ് ഐക്കരക്കുന്നേല്‍ തോമസ് (72) അന്തരിച്ചു. പക്ഷാഘാതത്തെ തുടര്‍ന്ന് തലയോലപ്പറമ്പ് പൊതി മേഴ്സി ആശുപത്രിയില്‍ ചികിത്സയിലായിരുന്നു തോമസ്.

സിസ്റ്റര്‍ അഭയയുടെ ദൂരൂഹ സാഹചര്യത്തിലെ മരണം വെളിച്ചത്തു കൊണ്ടു വരാന്‍ വര്‍ഷങ്ങളായി നിയമപോരാട്ടം നടത്തിയതിലൂടെ എല്ലാവര്‍ക്കും സുപരിചിതനായിരുന്നു അഭയയുടെ പിതാവ് തോമസ്. ഞായറാഴ്ച വൈകീട്ട് 5.55നായിരുന്നു തോമസ് മരിച്ചത്. മൃതദേഹം മോനിപ്പള്ളി എം.യു.എം. ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ് സംസ്‌കാരം ചൊവ്വാഴ്ച അരീക്കര സെന്റ് റോക്കി പളളിയില്‍ നടക്കും.
തോമസ് ലീലാമ്മ ദമ്പതികളുടെ മകള്‍ ബീനയെന്ന സിസ്റ്റര്‍ അഭയയെ 1992 മാര്‍ച്ച് 27നാണ് കോട്ടയം പയസ് ടെന്‍ത് കോണ്‍വന്റിലെ കിണറ്റില്‍ മരിച്ച നിലയില്‍ കണ്ടെത്തിയത്. സിസ്റ്റര്‍ അഭയയുടെ മരണത്തിലെ ദുരൂഹത പുറത്തുകൊണ്ടുവരാന്‍ കഴിഞ്ഞ ഇരുപത്തിനാലു വര്‍ഷമായി നിയമപോരാട്ടത്തിലായിരുന്നു തോമസ്.കഴിഞ്ഞ രണ്ട് വര്‍ഷമായി തോമസും ഭാര്യ ലീലയും ഏകമകന്‍ ബിജുവിനൊപ്പം താമരക്കാടായിരുന്നു താമസം.