'സാറേ, ആരും എടുക്കില്ലാന്ന് പറയുന്നു, ഈ പൈസയൊന്ന് മാറ്റിത്തരുമോ' തൃശൂര്‍ റെയില്‍വേ സ്‌റ്റേഷനില്‍ ചടങ്ങിനെത്തിയ മന്ത്രി വി.എസ്. സുനില്‍കുമാറിന് മുന്നില്‍ ചുരുട്ടിപ്പിടിച്ച പഴയ നാല് അഞ്ഞൂറു രൂപ നോട്ടുകളുമായി പുറനാട്ടുകര സ്വദേശിനി സരോജിനി വിതുമ്പിക്കരഞ്ഞു. അവരുടെ കൈയിലിരുന്ന നോട്ട് കണ്ട മന്ത്രി എന്ത് പറയണമെന്നറിയാതെ ഇടറി.

വീടുകളില്‍ ജോലി ചെയ്ത് ജീവിക്കുന്ന സരോജിനി നിധിപോലെ സൂക്ഷിച്ചുവെച്ചതായിരുന്നു പഴയ 500 രൂപയുടെ നാല് നോട്ടുകള്‍. നിത്യവൃത്തിക്ക് പണമില്ലാതായപ്പോഴാണ് അവര്‍ ഇത് ചെലവാക്കാനായി എടുത്തത്.
എന്നാല്‍ ആ നോട്ട് സ്വീകരിക്കാന്‍ ആരും തയ്യാറായില്ല. ഈ നോട്ട് പിന്‍വലിച്ചെന്ന് പറഞ്ഞപ്പോഴും അവര്‍ വിശ്വസിച്ചില്ല. പരിചയക്കാരുടെ നിര്‍ദേശമനുസരിച്ച് ബാങ്കില്‍ ചെന്നപ്പോള്‍ അവരും കൈമലര്‍ത്തി. ഒടുവില്‍ മന്ത്രിയുടെ അടുത്ത് ചെന്നാല്‍ ചിലപ്പോള്‍ മാറ്റിക്കിട്ടും എന്നാരോ പറഞ്ഞു. ഇതുകേട്ടാണ് അവര്‍ തന്റെ അടുത്തെത്തിയതെന്ന് മന്ത്രി വി.എസ്.സുനില്‍കുമാര്‍ പറഞ്ഞു.

സരോജിനിയുടെ ആവശ്യം കേട്ട മന്ത്രി ഇവരെ കൈയില്‍പിടിച്ച് ആശ്വസിപ്പിച്ചു. കാര്യങ്ങള്‍ ചോദിച്ചറിഞ്ഞു. നോട്ട് നിരോധിച്ചതോ സമരങ്ങളോ ഒന്നും സരോജിനി അറിഞ്ഞിരുന്നില്ല. ചെലവാക്കാതെ, ബാങ്കില്‍ നിക്ഷേപിക്കാതെ ഒരു കരുതല്‍ പോലെ വീട്ടില്‍ സൂക്ഷിച്ചിരുന്നതാണ് വീട്ടുജോലി ചെയ്തുകിട്ടിയ 2000 രൂപ. മന്ത്രി വിചാരിച്ചാല്‍ നോട്ട് മാറ്റിക്കിട്ടുമെന്ന അവസാന പ്രതീക്ഷയിലാണ് ഇവര്‍.

മാറ്റിക്കൊടുക്കണമെന്നാവശ്യപ്പെട്ട് മന്ത്രി കത്തുനല്‍കിയാല്‍ പുതിയ നോട്ട് കിട്ടുമെന്നാണ് ഇവരുടെ പ്രതീക്ഷ. മന്ത്രിയുടെ കത്തുണ്ടായാല്‍ നോട്ട് മാറ്റിക്കൊടുക്കാന്‍ നിയമസാധുതയുണ്ടോയെന്ന് പരിശോധിക്കാമെന്നും നാളെ എന്തായാലും തന്നെ വിളിക്കണമെന്നും ആവശ്യപ്പെട്ട് മന്ത്രി തന്റെ ഫോണ്‍ നമ്പര്‍ സരോജിനിക്ക് കുറിച്ചു നല്‍കിയിട്ടുണ്ട്.
ഇങ്ങനെ ഒരാവശ്യവുമായി ആദ്യമായാണ് ഒരാള്‍ തന്റെ മുന്നിലെത്തിയതെന്ന് മന്ത്രി പറയുന്നു. ഇവരുടെ നോട്ട് മാറ്റികൊടുക്കാന്‍ വഴിയുണ്ടോ എന്ന് അന്വേഷിക്കുകയാണ് മന്ത്രി.