പണം കിട്ടാത്തതിന്റെ പേരില് സ്വകാര്യ ആശുപത്രികള് കൈയ്യൊഴിയേണ്ട... റോഡപകടങ്ങളില് പെട്ടവര്ക്ക് സൗജന്യ ചികിത്സ; റോഡ് സുരക്ഷാ ഫണ്ടില് നിന്നും പണം കണ്ടെത്തും
റോഡപടകങ്ങളില് പെട്ട് ഇനിയൊരു സ്വകാര്യ ആശുപത്രിയും മുഖം തിരിക്കരുത്. റോഡപകടങ്ങളില് പെട്ട് ആശുപത്രിയില് പ്രവേശിപ്പിക്കപ്പെട്ടാല് പണമില്ലാത്തതിനാല് ഇനി മുതല് ആര്ക്കും ചികിത്സ നിഷേധിക്കപ്പെടില്ലെന്ന ഉറച്ചു നിലപാടോടെ പുതിയ പദ്ധതി ആവിഷ്ക്കരിക്കുകയാണ് സര്ക്കാര്. അപകടത്തില് പെട്ട് ആശുപത്രിയില് പ്രവേശിപ്പിക്കപ്പെട്ടാല് 48 മണിക്കൂര് നേരത്തേക്ക് പണമൊന്നും ഈടാക്കാതെ തന്നെ ചികിത്സ ഉറപ്പാക്കുന്ന പുതിട ട്രോമാ കെയര് പദ്ധതിക്ക് സംസ്ഥാന സര്ക്കാര് രൂപം നല്കുന്നു. പദ്ധതിയെ കുറിച്ചുള്ള വിവരങ്ങള് പുറത്തു വന്നതോടെ വലിയ പിന്തുണയാണ് ലഭിക്കുന്നത്.
പണമില്ലാത്തതിനാല് സംസ്ഥാനത്ത് അപകടത്തില് പെട്ട് മുരുകന്മാര് മരിക്കുന്ന നില ഇനി സംസ്ഥാനത്ത് ഉണ്ടാവരുതെന്ന സര്ക്കാര് താത്പര്യമാണ് പുതിയ പദ്ധതി രൂപീകരിക്കാന് കാരണമാകുന്നത്. റോഡപകടങ്ങളുടെ എണ്ണം കൂടുന്നതും അടിന്തര ചികിത്സ പണമില്ലാത്തതിനാല് വൈകുന്നത് ഒഴിവാക്കുന്നതും ലക്ഷ്യമിട്ടാണ് പുതിയ പദ്ധതി രൂപീകരിക്കുന്നത്. രോഗിയില് നിന്നോ ബന്ധുക്കളില് നിന്നോ പണം ഈടാക്കാതെയാവും ചികിത്സ. 48 മണിക്കൂറിനകം നടത്തുന്ന അടിയന്തര ചികിത്സയ്ക്കുള്ള പണം സര്ക്കാര് നല്കും. ഈ തുക പിന്നീട് ഇന്ഷൂറന്സ് കമ്പനികളില്നിന്ന് തിരിച്ചുവാങ്ങാനാണ് ഉദ്ദേശിക്കുന്നത്.
റോഡപകടങ്ങളില്പ്പെടുന്നവര്ക്ക് പെട്ടെന്ന് വിദഗ്ധ ചികിത്സ ഉറപ്പാക്കാനും 'ട്രോമ കെയര് പദ്ധതി' സഹായകരമാകും. ഇന്ഷൂറന്സ് കമ്പനികളുമായി മുഖ്യമന്ത്രി ചര്ച്ച നടത്തിയ ശേഷം ഇതിന്റെ വിശദരൂപം തയ്യാറാക്കും. അപകടത്തില്പ്പെട്ട് ആശുപത്രിയിലെത്തുന്നവരെ സാമ്പത്തികശേഷി നോക്കി ചികിത്സിക്കുന്ന രീതി ഇതോടെ അവസാനിപ്പിക്കാനാവുമെന്നാണ് സര്ക്കാര് കരുതുന്നത് . സ്വകാര്യ ആശുപത്രിയിലാണെങ്കില് ആദ്യഘട്ടത്തിലെ ചികിത്സയ്ക്കുള്ള ചെലവ് റോഡ് സുരക്ഷാ ഫണ്ടില്നിന്ന് സര്ക്കാര് വഹിക്കണമെന്നാണ് മുഖ്യമന്ത്രി പിണറായി വിജയന്റെ നിര്ദ്ദേശം.
സംസ്ഥാനത്തെ സര്ക്കാര് മെഡിക്കല് കോളേജുകള്, ജില്ലാ ആശുപത്രികള്, താലൂക്ക് ആശുപത്രികള് എന്നിവിടങ്ങളിലും പ്രധാന സ്വകാര്യ ആശുപത്രികളിലും 'ട്രോമ കെയര്' സജ്ജീകരണമുണ്ടാക്കാനാണ് ഉദേശിക്കുന്നത്. അപകടത്തില്പ്പെടുന്നവരെ എത്രയും പെ്ട്ടെന്ന് വിദഗ്ധ ചികിത്സ കിട്ടുന്ന തൊട്ടടുത്ത ആശുപത്രിയില് എത്തിക്കുന്നതിന് പ്രത്യേക ആംബുലന്സ് സൗകര്യം ഏര്പ്പെടുത്തും.
ആംബുലന്സില് ആധുനിക സജ്ജീകരണങ്ങളുണ്ടായിരിക്കും. സ്വകാര്യ ഏജന്സികളില് നിന്ന് ഇതിന് വേണ്ടി അപേക്ഷ ക്ഷണിക്കാനാണ് ഉദേശിക്കുന്നത്. പരിക്കേറ്റവരെ ആശുപത്രിയില് എത്തിക്കുന്ന ജീവനക്കാര്ക്ക് പരിശീലനം നല്കും. ആംബുലന്സ് ലഭ്യമാക്കുന്നതിനും ആശുപത്രി തെരഞ്ഞെടുക്കുന്നതിനും പ്രത്യേക സോഫ്റ്റ് വെയര് ഉണ്ടാക്കും. ഒരു കേന്ദ്രീകൃത കോള് സെന്ററില് ഇതെല്ലാം സോഫ്റ്റ് വെയര് സഹായത്തോടെ നിയന്ത്രിക്കും.
കേരള റോഡ് സുരക്ഷാ ഫണ്ട്, കേരള സ്റ്റേറ്റ് ട്രാന്സ്പോര്ട്ട് പ്രൊജക്ടിന്റെ (കെ.എസ്.ടി.പി) സാമൂഹ്യ ഉത്തരവാദിത്ത ഫണ്ട് എന്നിവയും സര്ക്കാരിന്റെ ബജറ്റ് വിഹിതവും ഉപയോഗിച്ച് 'ട്രോമ കെയര്' പദ്ധതി നടപ്പാക്കാനാണ് ഉദേശിക്കുന്നത്. സമയബന്ധിതമായി ഇതു പ്രാവര്ത്തികമാക്കുന്നതിന് ആരോഗ്യം, ആഭ്യന്തരം, ധനകാര്യം, ഗതാഗതം, പി.ഡബ്ല്യു.ഡി എന്നീ വകുപ്പകളുടെ സെക്രട്ടറിമാരെ ചുമതലപ്പെടുത്തിയിട്ടുണ്ട് .
https://www.facebook.com/Malayalivartha
