ട്രോമാ കെയര് പദ്ധതി: റോഡപകടങ്ങളില്പ്പെടുന്നവര്ക്ക് 48 മണിക്കൂര് അടിയന്തരചികിത്സ സൗജന്യമാക്കാന് സര്ക്കാര് തീരുമാനം
റോഡപകടങ്ങളില്പ്പെടുന്നവര്ക്ക് 48 മണിക്കൂര് അടിയന്തരചികിത്സ സൗജന്യമാക്കാന് സര്ക്കാര് തീരുമാനം. റോഡ് അപകടത്തില്പ്പെട്ട് സര്ക്കാര്/സ്വകാര്യ ആശുപത്രികളില് പ്രവേശിക്കപ്പെടുന്നവര്ക്ക് ആദ്യ 48 മണിക്കൂര് ചികിത്സ സൗജന്യമാക്കാനും ഇതിനുള്ള പണം സര്ക്കാര് നല്കുന്നതുമായ ട്രോമാ കെയര് പദ്ധതി ആവിഷ്കരിക്കാനാണ് മുഖ്യമന്ത്രി പിണറായി വിജയന്റെ അധ്യക്ഷതയില് ചേര്ന്ന ഉന്നതതല യോഗതീരുമാനം. ഇന്ഷുറന്സ് കമ്പനികളുടെ സഹകരണത്തോടെയാണ് പദ്ധതി നടപ്പാക്കുന്നത്.
കേരള റോഡ് സുരക്ഷാ ഫണ്ട്, കെ.എസ്.ടി.പി. സാമൂഹിക ഉത്തരവാദിത്ത ഫണ്ട് എന്നിവയും സര്ക്കാരിന്റെ ബജറ്റ് വിഹിതവും ഉപയോഗിച്ചാണ് ട്രോമാ കെയര് പദ്ധതി നടപ്പാക്കുന്നത്. സമയബന്ധിതമായി ഇതു പ്രാവര്ത്തികമാക്കുന്നതിന് ആരോഗ്യം, ആഭ്യന്തരം, ധനകാര്യം, ഗതാഗതം, പി.ഡബ്ല്യു.ഡി എന്നീ വകുപ്പുകളുടെ സെക്രട്ടറിമാരെ ചുമതലപ്പെടുത്തി. വാഹനാപകടത്തില് പരുക്കേറ്റ തമിഴ്നാട് സ്വദേശി മുരുകന് തിരുവനന്തപുരം മെഡിക്കല് കോളജ് അടക്കമുള്ള ആശുപത്രികളില് ചികിത്സ ലഭിക്കാതെ മരിച്ച പശ്ചാത്തലത്തിലാണ് സര്ക്കാര് തീരുമാനം. അടിയന്തരചികിത്സയ്ക്ക് പണമില്ലാത്തതിനാല് സംസ്ഥാനത്തിന്റെ പലഭാഗത്തും ഇത്തരം സംഭവങ്ങള് റിപ്പോര്ട്ട് ചെയ്തതും കണക്കിലെടുത്തിട്ടുണ്ട്.
ആശുപത്രിയില് പ്രവേശിപ്പിക്കപ്പെട്ടാല് 48 മണിക്കൂര് നേരത്തേക്ക് രോഗിയില്നിന്നോ ബന്ധുക്കളില്നിന്നോ പണമൊന്നും ഈടാക്കാതെതന്നെ ചികിത്സ ഉറപ്പാക്കും. ഈ ഘട്ടത്തില് നടത്തുന്ന അടിയന്തര ചികിത്സയ്ക്കുളള പണം സര്ക്കാര് നല്കും. ഈ തുക പിന്നീട് ഇന്ഷുറന്സ് കമ്പനികളില്നിന്ന് ലഭ്യമാക്കാനാണു തീരുമാനം. സ്വകാര്യ ആശുപത്രിയിലാണെങ്കില് ആദ്യഘട്ടത്തിലെ ചികിത്സയ്ക്കുളള ചെലവ് റോഡ് സുരക്ഷാ ഫണ്ടില്നിന്നു വഹിക്കും. ഇന്ഷുറന്സ് കമ്പനികളുമായി മുഖ്യമന്ത്രി ചര്ച്ച നടത്തിയശേഷം വിശദരൂപം തയ്യാറാക്കും.
സര്ക്കാര് മെഡിക്കല് കോളേജുകള്, ജില്ലാ ആശുപത്രികള്, താലൂക്ക് ആശുപത്രികള് എന്നിവിടങ്ങളിലും പ്രധാന സ്വകാര്യ ആശുപത്രികളിലും ട്രോമാ കെയര് സജ്ജീകരണമുണ്ടാക്കാനാണ് ലക്ഷ്യമിടുന്നത്. അപകടത്തില്പ്പെടുന്നവരെ കാലതാമസമില്ലാതെ വിദഗ്ധചികിത്സ ലഭ്യമായ തൊട്ടടുത്ത ആശുപത്രിയില് എത്തിക്കാന് പ്രത്യേക ആംബുലന്സ് സൗകര്യം ഏര്പ്പെടുത്തും. സ്വകാര്യ ഏജന്സികളില്നിന്ന് ഇതിനുവേണ്ടി അപേക്ഷ ക്ഷണിക്കും. പരുക്കേറ്റവരെ ആശുപത്രിയില് എത്തിക്കുന്ന ജീവനക്കാര്ക്ക് പരിശീലനം നല്കും. ആംബുലന്സ് ലഭ്യമാക്കുന്നതിനും ആശുപത്രി തെരഞ്ഞെടുക്കുന്നതിനും പ്രത്യേക സോഫ്റ്റ്വേര് ഒരുക്കി കേന്ദ്രീകൃത കോള് സെന്ററിന്റെ സഹായത്തോടെ ഈ സേവനം ലഭ്യമാക്കാനാണു ലക്ഷ്യം.
https://www.facebook.com/Malayalivartha
