പോലീസ് യൂണിഫോമില് ഐക്യം നടപ്പാക്കി സംസ്ഥാന പോലീസ് മേധാവി ലോക്നാഥ് ബെഹ്റ
പോലീസ് യൂണിഫോമില് 'സമത്വം' നടപ്പാക്കി സംസ്ഥാന പോലീസ് മേധാവി ലോക്നാഥ് ബെഹ്റ. കാക്കി യൂണിഫോമില് ഇനി വില കൂടിയതും കുറഞ്ഞതും വേണ്ടെന്നു ബെഹ്റ ഉത്തരവിറക്കി. ഐ.പി.എസുകാരന് മുതല് കോണ്സ്റ്റബിള് വരെ പോലീസ് കാന്റീനില്നിന്നു കിട്ടുന്ന തുണികൊണ്ട് യൂണിഫോം തയ്പിച്ചാല് മതിയെന്നാണു ജില്ലാ പോലീസ് മേധാവികള്ക്കു നല്കിയ നിര്ദേശം.
കോട്ടയത്ത് മുഖ്യമന്ത്രി പിണറായി വിജയന് പങ്കെടുത്ത പാസിങ് ഔട്ട് പരേഡിലാണു തിളങ്ങിയും മങ്ങിയും നിരന്ന കാക്കികള് ഡി.ജി.പിയുടെ ശ്രദ്ധയില്പ്പെട്ടത്. ചില ഉദ്യോഗസ്ഥര് വില കൂടിയ ബ്രാന്ഡിലുള്ള യൂണിഫോം ധരിച്ചും മറ്റു ചിലര് മങ്ങിയ സാദാ കാക്കി വേഷത്തിലുമാണ് എത്തിയത്. ഇതാണ് പുതിയ ഉത്തരവിനു കാരണമായത്. നേരത്തെതന്നെ കാക്കിയുടെ 'നിറഭേദം' ചര്ച്ചാവിഷയമാണ്. വിദേശത്തുനിന്നു സംഭാവനയായിട്ടുവരെ ചിലര് കാക്കിത്തുണി സ്വീകരിക്കുന്നുണ്ട്. ഇടതു സര്ക്കാര് ഭരിക്കുമ്പോള് ഗുണത്തിലും മണത്തിലും നിറത്തിലുമെല്ലാം കാക്കി ഒന്നുതന്നെയായിരിക്കണമെന്നു പോലീസ് അസോസിയേഷനിലുംഅഭിപ്രായമുയര്ന്നിരുന്നു. ഇതെല്ലാം കണക്കിലെടുത്താണ് ഉത്തരവിറക്കിയത്.
പ്രതിവര്ഷം 5200 രൂപയാണ് യൂണിഫോം വാങ്ങാന് പോലീസുകാര്ക്കു സര്ക്കാര് നല്കുന്നത്. എന്നാല് സ്പെഷല് യൂണിറ്റിലെ പോലീസുകാര്ക്ക് യൂണിഫോം അലവന്സില്ല. 1987 വരെ പോലീസ് ഡിപ്പാര്ട്ട്മെന്റില്നിന്നുതന്നെയായിരുന്നു യൂണിഫോം നല്കിയിരുന്നത്. അതു മാറി പണം കൈയില് കിട്ടുമെന്നായപ്പോള് കാക്കി പലതരത്തിലായി. ചിലര് കൂടുതല് കാശുമുടക്കി തിളങ്ങുന്ന കാക്കി വാങ്ങി. മറ്റു ചിലര് കാശ് കീശയിലിട്ടശേഷം കാക്കി ഓസിനു വാങ്ങി. സ്വദേശിയെ വെട്ടി വിദേശിവരെ നാട്ടിലെത്തി. ഒരു ഐ.പി.എസ്. ഉദ്യോഗസ്ഥന് വിദേശയാത്ര നടത്തുമ്പോള് പതിവായി കാക്കി യൂണിഫോം കൊണ്ടുവരുന്നതു പോലീസ് സേനയില് പാട്ടാണ്.
പോലീസ് കാന്റീന് വഴി മാത്രമേ യൂണിഫോം വാങ്ങാവൂ എന്ന് ഡി.ജി.പിയുടെ ഉത്തരവില് പറയുന്നു. കമ്മിറ്റി കൂടി തീരുമാനിച്ചിട്ടായിരിക്കണം തുണി വാങ്ങുന്നത്. ഇതില് അഴിമതി കടന്നുവരരുതെന്നും നിര്ദേശമുണ്ട്. തമിഴ്നാട്ടില് ഏകീകൃത യൂണിഫോം സംവിധാനമാണുളളത്. വ്യത്യസ്ത തരത്തിലുളള യൂണിഫോം അണിയുന്നത് അച്ചടക്കസേനയ്ക്കു യോജിച്ചതല്ലെന്നു മുന് ഡി.ജി.പി: അലക്സാണ്ടര് ജേക്കബും ഈ രീതിക്ക് മാറ്റംവരണമെന്നു മുന് സംസ്ഥാന പോലീസ് മേധാവി ജേക്കബ് പുന്നൂസും പറഞ്ഞു.
https://www.facebook.com/Malayalivartha
