ഫിറ്റ്നസില് ഡി.ജി.പിയും 'കുട്ടപ്പനല്ലെന്ന്' ട്രോള് മഴ
കേരളാ പൊലീസിന്റെ അമിത ആഹാരപ്രിയത്തെയും വ്യായാമം ചെയ്യാനുള്ള മടിയെയും പരസ്യമായി വിമര്ശിച്ച ഡിജിപി ലോക്നാഥ് ബെഹ്റയുടെ കുടവയര് മാവേലിയെ വെല്ലുമെന്ന് സോഷ്യല് മീഡിയ. സ്വന്തം കുടവയര് കുറച്ചിട്ട് പാവം പൊലീസുകാരെ കളിയാക്ക് സാറേ... തുടങ്ങിയ ട്രോളുകളാണ് ഫെയിസ്ബുക്കിലും മറ്റും പ്രചരിക്കുന്നത്. വ്യായാമം ചെയ്യാന് പറഞ്ഞുവിട്ടാല് പോയി അഞ്ചെട്ട് ഇഡലി വാങ്ങിക്കഴിക്കുന്ന പൊലീസുകാരാണ് സേനയിലുള്ളതെന്നാണ് ഡി.ജി.പി കഴിഞ്ഞ ദിവസം പരിഹസിച്ചത്. സമയം കിട്ടുമ്പോഴൊക്കെ പൊറോട്ടയും രണ്ടും മൂന്നും പ്ലേറ്റ് ബീഫും കഴിക്കുന്നവരാണ് പൊലീസുകാര്. പിന്നെ എന്ത് പറയാന്, റൂറല് ജില്ലാ പൊലീസ് അസോസിയേഷന്റെ ആരോഗ്യസംരക്ഷണ പദ്ധതി ഉദ്ഘാടനം ചെയ്യുന്നതിനിടെയാണ് ഡിജിപി വിമര്ശനം നടത്തിയത്.
പഴയൊരു കണക്കനുസരിച്ചു കേരള പൊലീസിലെ 29 ശതമാനവും പ്രമേഹരോഗികളാണ്. അമിതഭക്ഷണവും വ്യായാമരഹിത ജീവിതവുമാണ് ഇതിനു കാരണം. വ്യായാമം ചെയ്യണമെന്ന് പൊലീസുകാര്ക്ക് നിര്ദേശം നല്കിയിട്ടുള്ളതാണ്. എന്നാല്, ആരും ചെയ്യാറില്ല. കുറച്ചെങ്കിലും വ്യായാമം ചെയ്യുന്നത് വനിതാ പൊലീസുകാരാണ്. പുരുഷന്മാര് ആ സമയത്തു ഭക്ഷണം കഴിക്കും' ബെഹ്റ പറഞ്ഞു. അമിതഭക്ഷണം തടയാന് പ്രത്യേക നിര്ദേശവും തമാശരൂപേണ ഡിജിപി നല്കി. അതേസമയം ഡ്യൂട്ടിസമയത്തെ തിരക്ക് കാരണം പലപ്പോഴും വീട്ടുകാര്യങ്ങള് പോലും ശരിക്കും നോക്കാനാവുന്നില്ലെന്ന് പൊലീസുകാര് പരാതി പറയുന്നു. ഓണം ഉള്പ്പെടെയുള്ള ആഘോഷങ്ങള്ക്ക് വീട്ടുകാര്ക്കൊപ്പം കഴിയാനാവുന്നില്ലെന്നും അവര് ചൂണ്ടിക്കാട്ടി.
അതേസമയം എല്ലാ പൊലീസ് സ്റ്റേഷനിലും ഒരു ഡയറ്റ് ചാര്ട്ട് തയാറാക്കുമെന്ന് ഡി.ജി.പി നിര്ദ്ദേശിച്ചിട്ടുണ്ട്. പഴംപൊരി കഴിക്കരുത്, ഉഴുന്നുവട ഒരെണ്ണത്തിന്റെ പകുതി മാത്രം കഴിക്കാം. എന്നിങ്ങനെ മെനു എഴുതി തയാറാക്കണമെന്നാണ് ഉപദേശം. വ്യായാമം ചെയ്യാത്തതിന്റെ കാരണം സമയമില്ലായ്മയാണങ്കില് അതിനും ഡിജിപിക്കു പരിഹാരമുണ്ട്. 'രാവിലെ ഏഴിനും എട്ടിനും ഇടയിലുള്ള ഡ്യൂട്ടി ഒന്നും ചെയ്യേണ്ടെന്നും അദ്ദേഹം വ്യക്തമാക്കി. നടത്തമോ യോഗയോ ഇഷ്ടമുള്ള മറ്റു വ്യായാമങ്ങളോ ചെയ്തിട്ട് ഓഫിസില് വന്നാല് മതിയെന്നും അദ്ദേഹം പറഞ്ഞു. എന്നാല് സമരപരിപാടികളോ, ഉല്സവങ്ങളോ, മറ്റ് പരിപാടികളോ ഉള്ള ദിവസം അതിരാവിലെ ഡ്യൂട്ടിക്കെത്തുന്നവരാണ് പൊലീസുകാര്.
https://www.facebook.com/Malayalivartha
