കൊല്ലം കരുനാഗപ്പള്ളിയില്‍ നിന്നാണ് മറ്റൊരു ഞെട്ടിക്കുന്ന പീഡന വിവരം പുറത്ത് വന്നത്. അഖില്‍ മൂന്നു വര്‍ഷം തുടര്‍ച്ചയായാണ് പെണ്‍കുട്ടിയെ പീഡിപ്പിച്ചത്. വയറുവേദനയേയും നെഞ്ചുവേദനയേയും തുടര്‍ന്ന് ആശുപത്രിയില്‍ പ്രവേശിപ്പിച്ചപ്പോള്‍ ഡോക്ടറാണ് കുട്ടിയില്‍ നിന്നു വിവരങ്ങള്‍ ചോദിച്ച് അറിഞ്ഞത്. പീഡനവിവരം പോലീസില്‍ റപ്പോര്‍ട്ട് ചെയ്തു മണിക്കൂറുകള്‍ക്കകം പ്രതികളെ മുഴുവന്‍ പോലീസ് കസ്റ്റഡിയില്‍ എടുത്തു.

തൊടിയൂര്‍ വടക്കുംമുറിയില്‍ കന്നേത്തറയില്‍ അനീഷ് (29) പന്മന വില്ലേജില്‍ പോരുക്കര മുറിയില്‍ കരീത്തറ വടക്കേതില്‍ രാജീവ് (33) അഖില്‍, ശിവകുമാര്‍ എന്നിവര്‍ ചേര്‍ന്നാണു പെണ്‍കുട്ടിയെ പീഡിപ്പിച്ചത്. പ്രതികളായ അഖില്‍ ശിവകുമാര്‍ എന്നിവരുടെ സഹോദരിയുടെ വിവഹത്തലേന്നായിരുന്നു പ്രതികള്‍ നാലുപേരും കൂടി പെണ്‍കുട്ടിയേ ക്രൂരമായി ആക്രമിച്ചത്. കഴിഞ്ഞ മൂന്നു വര്‍ഷമായി അഖില്‍ പെണ്‍കുട്ടിയേ ചൂഷണം ചെയ്തു വരികയായിരുന്നു. വിവാഹരാത്രിയില്‍ മദ്യപിക്കുന്നതിനിടയില്‍ പ്രതികള്‍ അയല്‍പക്കത്തെ പെണ്‍കുട്ടിയേ പറ്റിയും സംസാരിച്ചു.

ഈ സമയം അഖില്‍ താന്‍ വിളിച്ചാല്‍ അവള്‍ ഏതു പാതിരാത്രിയും ഇറങ്ങി വരുമെന്നു പറയുകയായിരുന്നു. ഇതു കേട്ട് മറ്റു പ്രതികള്‍, എങ്കില്‍ അതൊന്നു കാണട്ടെ എന്നു വാശിപിടിപ്പിക്കുകയും അയല്‍പക്കത്തെ വീട്ടിലെ പത്തു വയസുകാരിയേ വിളിച്ചു വരുത്തുകയുമായിരുന്നു. തുടര്‍ന്നു നാലു പ്രതികളും ചേര്‍ന്ന് പെണ്‍കുട്ടിയെ ക്രൂരമായി പീഡിപ്പിച്ചു. പിന്നീട് പല പ്രവശ്യം പെണ്‍കുട്ടി കരുനാഗപ്പള്ളി താലുക്ക് ആശുപത്രിയില്‍ വയറുവേദനയ്ക്കു ചികിത്സ തേടിരുന്നു. കാര്യമറിയാതെ ഡോക്ടര്‍ മരുന്നു നല്‍കി. എന്നാല്‍ ഏതാനം ദിവസം മുമ്പ് വയറു വേദനയും നെഞ്ചു വേദനയും മൂലം കുട്ടി വീണ്ടും ചികിത്സ തേടി എത്തി.

ഈ സമയം സംശയം തോന്നിയ ഡോക്ടര്‍ കുട്ടിയുടെ മാതാവിനെ പുറത്തിറക്കി നിര്‍ത്തി കുട്ടിയോടു വിശദമായി കാര്യങ്ങള്‍ അന്വേഷിക്കുകയായിരുന്നു. തുടര്‍ന്നു കുട്ടിയുടെ നെഞ്ചിലും സ്വകാര്യഭാഗങ്ങളിലും മുറിവേറ്റ പാടുകള്‍ കണ്ടതിനെ തുടര്‍ന്നു ഡോക്ടര്‍ വിവരം പോലീസില്‍ അറിയിച്ചു കേസ് രജിസ്ട്രര്‍ ചെയ്യുകയായിരുന്നു. വിവരം പുറത്തു പറഞ്ഞാല്‍ പെണ്‍കുട്ടിയെ കൊന്നു കളയുമെന്ന് ഭീഷണിപ്പെടുത്തിയാണ് അഖില്‍ പീഡിപ്പിച്ചതെന്നു പെണ്‍കുട്ടി പറഞ്ഞു.