രസീത് ബുക്കിന് ബൈ ബൈ... വില്ലേജ് ഓഫീസിലെ പണമിടപാടുകള് ഇനി ഓണ്ലൈന് വഴി, ക്യുആര് കോഡ് ഉപയോഗിച്ച് വ്യാജനെ പിടികൂടാം, പണമടയ്ക്കാന് ട്രഷറിയിലേക്ക് പോകണമെന്നില്ല, അറുപതോളം സേവനങ്ങള്ക്ക് ഇനി ഓണ്ലൈനായി പണമടയ്ക്കാം
രസീത് ബുക്ക് എന്ന സമ്പ്രദായം ഇനി ഉണ്ടാകില്ല. പണമടയ്ക്കാന് മണിക്കൂറുകള് ക്യൂവില് നില്ക്കേണ്ട ആവശ്യവും ഇനി ഉണ്ടാകില്ല. ഭൂമി ഇടപാടുകളുടെ അടിസ്ഥാനമായ നികുതി രസീതു ബുക്ക് വില്ലേജ് ഓഫിസുകളില്നിന്ന് ഈ മാസത്തോടെ പടിയിറങ്ങും.
പൊടിപിടിച്ച കൂറ്റന് റജിസ്റ്ററുകള് മറിച്ചുനോക്കുന്ന രീതിയും ഇനി പഴങ്കഥ. ഡിസംബര് ആദ്യ ആഴ്ചയോടെ വില്ലേജ് ഓഫിസിലെ പണമിടപാടുകള് ഓണ്ലൈനാകും.ഓഫിസില് നേരിട്ടെത്തി ചെയ്യേണ്ട ഇടപാടുകള്ക്ക് ഓണ്ലൈനായി പ്രിന്റ് ചെയ്ത രസീതുകളാകും നല്കുക. ഇതില് ക്വിക്ക് റെസ്പോണ്സ് (ക്യുആര്) കോഡുണ്ടാകും.
കള്ളസീലും പേരുമുപയോഗിച്ചു രസീതുകള് നിര്മിച്ചു വായ്പയെടുക്കാനുള്ള ശ്രമങ്ങള് ശ്രദ്ധയില്പ്പെട്ടതോടെയാണു പുതിയ നീക്കമെന്നു റവന്യു മന്ത്രിയുടെ ഓഫിസ് അറിയിച്ചു.ക്യുആര് കോഡ് സ്കാന് ചെയ്താല് രസീത് വ്യാജമാണോ എന്നു കണ്ടെത്താന് കഴിയും.
മൊബൈല് ആപ്പും ഉടന് പുറത്തിറങ്ങും.നിലവില് ഭൂനികുതി അടയ്ക്കാന് മാത്രം ഓണ്ലൈന് സംവിധാനമുണ്ടെങ്കിലും പൂര്ണമായിരുന്നില്ല. വില്ലേജ് ഓഫിസില് നേരിട്ടു ലഭിക്കുന്ന തുക കംപ്യൂട്ടറില്നിന്നു ലഭിക്കുന്ന ലിസ്റ്റിന്റെ അടിസ്ഥാനത്തില് ബാങ്കില് അടയ്ക്കുകയാകും ഇനിയുള്ള രീതി.
ഇതോടെ ട്രഷറിയില് ആഴ്ചയിലൊരിക്കല് പോയി പണമടയ്ക്കുന്ന സമ്പ്രദായമില്ലാതെയാകും. ബാങ്കില്നിന്നു ട്രഷറിയിലേക്കു പണം പോയിട്ടുണ്ടോ എന്നു പരിശോധിക്കാനായി ഓട്ടോ റിക്കണ്സിലിയേഷന് സ്റ്റേറ്റ്മെന്റ് ലഭ്യമാകും.താലൂക്ക് കലക്ടറേറ്റ് അക്കൗണ്ട്സ് തലത്തില് ഇവ പരിശോധിക്കാനും കഴിയും.
മാസാവസാനം ഈടാക്കാനുള്ള തുക സംബന്ധിച്ചുള്ള ഡിമാന്ഡ് കലക്ഷന് ബാലന്സ് റിപ്പോര്ട്ട് ഓണ്ലൈനായി ജനറേറ്റ് ചെയ്യാം. വലിയ അധ്വാനം വേണ്ടിയിരുന്ന റിപ്പോര്ട്ട് തയാറാക്കല് ഒറ്റ ക്ലിക്കില് ലഭ്യമാകുമെന്നു ചുരുക്കം. ലാന്ഡ് റവന്യു കമ്മിഷണര് എ.ടി.ജയിംസിന്റെ നേതൃത്വത്തില് നികുതിദായകരുടെ വിവരങ്ങള് ഓണ്ലൈനാക്കുന്ന ഡിജിറ്റൈസേഷന് സംവിധാനം അവസാന ഘട്ടത്തിലാണ്.
ഭൂനികുതി കൂടാതെ അറുപതോളം സേവനങ്ങള്ക്ക് ഇനി ഓണ്ലൈനായി പണമടയ്ക്കാം. വില്ലേജ് ഓഫിസുകളിലും എഴുതിനല്കുന്ന രസീതുകളുണ്ടാകില്ല. റവന്യു റിക്കവറി, റവന്യു കെട്ടിട നികുതി, ആഡംബര നികുതി, പ്ലാന്റേഷന് നികുതി, കെട്ടിടത്തൊഴിലാളി ക്ഷേമനിധി, തണ്ടപ്പേര് അക്കൗണ്ടിന്റെ പകര്പ്പിനുള്ള ഫീസ് എന്നിവ ഉള്പ്പെടെ അറുപതിലധികം സേവനങ്ങള്ക്കു പണമടയ്ക്കാം.ഏതായാലും ഈ മാറ്റം സാധാരണക്കാര്ക്ക് ഉപയോഗപ്രദമാകും.
https://www.facebook.com/Malayalivartha
