സിസ്റ്റര് റാണിയെ ഓര്ക്കുമ്പോള് ആദ്യം മനസ്സിലെത്തുന്നത് സമന്ദര് എന്ന കൊടുംകുറ്റവാളിയെ...
സിസ്റ്റര് റാണി മരിയയുടെ തൂവെള്ള സ്മൃതിമണ്ഡപത്തില് സമന്ദര് സിങ് ഇന്നലെ തിരി തെളിച്ചു കൈകൂപ്പി പ്രാര്ഥിച്ചു: ദീദീ, ഹോ സക്തി ഹേ തോ മാഫ് കര്ന സഹോദരീ, കഴിയുമെങ്കില് പൊറുക്കുക! ഇരുപത്തഞ്ചു വര്ഷം മുന്പ് ഇവിടെയാണ് സമന്ദര് സിങ്, സിസ്റ്റര് റാണി മരിയയെ കുത്തി വീഴ്ത്തിയത്. 54 കുത്തുകളിലൊന്നു വാരിയെല്ലിലൂടെ തുളച്ചു കയറി ഹൃദയം തകര്ത്തു. ഇന്ന്, കത്തോലിക്കാ സഭ സിസ്റ്റര് റാണി മരിയയെ വാഴ്ത്തപ്പെട്ട രക്തസാക്ഷിയെന്നു വിളിക്കുമ്പോള്, ഇതിനകം അനുതാപത്തിന്റെ സമുദ്രങ്ങള് താണ്ടിയ സമന്ദര് പറയും: എല്ലാം ദൈവഹിതം. അവിടുന്നറിയാതെ ഇല പോലും അനങ്ങുന്നില്ല!
ദ്വേഷത്തിനു പകരം കിട്ടിയ സ്നേഹം, സേംലിയ റായ്മല് ഗ്രാമത്തിലെ ക്രൂരനായ ഠാക്കൂറിനെ ജ്ഞാനിയാക്കിയിരിക്കുന്നു. ഇപ്പോള് ആ മുഖത്തു തെളിയുന്നതു പ്രശാന്തത. അന്ന്, കൊലപാതകത്തിനു ശേഷം രക്തം പുരണ്ട കൈകളുമായി കാട്ടിലേക്കാണോടിയത്. മൂന്നാം ദിനം പൊലീസിന്റെ പിടിയിലായി. ആദിവാസികള്ക്കിടയില് സേവനം ചെയ്തുകൊണ്ടിരുന്ന സന്യാസിനിയെ കൊലപ്പെടുത്താന് പ്രേരിപ്പിച്ച ജമീന്ദാര്മാരും, മനസ്സില് വിദ്വേഷം നിറച്ചവരും, സ്വന്തം കുടുംബാംഗങ്ങള് പോലും സഹായത്തിനെത്തിയില്ല.
ആര്ക്കും വേണ്ടാതെ, ജീവപര്യന്തം ശിക്ഷിക്കപ്പെട്ടു കഴിയുമ്പോഴാണു സ്വാമിയച്ചന് (കുറ്റവാളികള്ക്കു വേണ്ടി സേവനം നടത്തുന്ന വൈദികന്) ജയില് സന്ദര്ശിച്ചത്. 'സിസ്റ്റര് റാണി മരിയയുടെ കുടുംബം നിന്നോടു ക്ഷമിക്കുന്നു, സഭയും ക്ഷമിക്കുന്നു'വെന്ന് അച്ചന് പറഞ്ഞു.
പിന്നാലെ, സിസ്റ്റര് റാണി മരിയയുടെ സഹോദരി സിസ്റ്റര് സെല്മി പോളിനെ അദ്ദേഹം കൂട്ടിക്കൊണ്ടു വന്നു. സ്വസഹോദരിയുടെ ചോര കുതിര്ന്ന ആ കയ്യില് അവര് സഹോദര സ്നേഹത്തിന്റെ പ്രതീകമായ രാഖി ചാര്ത്തി.
ജയില് വാസത്തിനിടെ സമന്ദറിനെ ഭാര്യ ഉപേക്ഷിച്ചു പോയി. വീണ്ടും വിവാഹിതനായില്ല. താമസം സഹോദരനൊപ്പമാണ്. ശിക്ഷ കഴിഞ്ഞു കേരളത്തിലെത്തിയതു നാലു വട്ടം. പെരുമ്പാവൂര് പുല്ലുവഴിയിലെ വീട്ടില് സിസ്റ്റര് റാണി മരിയയുടെ മാതാപിതാക്കളായ പൈലിയെയും ഏലീശ്വയെയും കണ്ടു മാപ്പിരന്നു. താന് ചെയ്ത മഹാപാതകം ക്ഷമിക്കാന് ആ മാതാപിതാക്കള്ക്കും കഴിഞ്ഞതു സമന്ദറിന് അത്ഭുതമായി.
സമന്ദര് ഇപ്പോള് കൃഷിക്കാരനാണ്. നെല്ലും കടലയും ഉള്ളിയും വളരുന്ന രണ്ടേക്കര് വയലുണ്ട്. ജയില് മോചനത്തിനു ശേഷം ഏറെക്കാലം രോഗികളെ ശുശ്രൂഷിച്ചു. കുറച്ചു നാളായി സൗജന്യമായി കൃഷിപ്പണി പഠിപ്പിക്കുന്നു. ഇടയ്ക്കിടെ സ്മൃതിമണ്ഡപത്തിലെത്തുന്ന സമന്ദര് സിങ്, 'ദീദീ, കഴിയുമെങ്കില് പൊറുക്കുക' എന്ന പ്രാര്ഥന ചൊല്ലും... 'ഈ പാപം ഇവനു മേലാകരുതേ' എന്നെഴുതിയ ഫലകത്തിനടുത്തു തിരി തെളിച്ചു.
https://www.facebook.com/Malayalivartha
