അടൂരിലാണ് ഏവരേയും അമ്പരപ്പിച്ച സംഭവമുണ്ടായത്. മൂന്ന് മാസം പ്രായമായ കൈക്കുഞ്ഞിന്റെ കാലില്‍ നിന്നും ബസ് യാത്രയ്ക്കിടെ പാദസ്വരം അപഹരിച്ച തമിഴ്‌നാട് സ്വദേശികളായ രണ്ട് സ്ത്രീകളെ കൈയോടെ പിടികൂടി അടൂര്‍ പോലീസിനു കൈമാറി. തൂത്തുക്കുടി സ്വദേശിനികളായ പേച്ചി (35), ശാന്തി (28) എന്നിവരാണ് പിടിയിലായത്. ഇന്നലെ ഉച്ചകഴിഞ്ഞു 2.30ഓടെയാണ് സംഭവം. കായംകുളത്തുനിന്നും അടൂരിലേക്ക് വന്ന ബസില്‍ നിന്നും അടൂര്‍ ഹോളിക്രോസ് ആശുപത്രിയില്‍ പോയ സ്ത്രീയും കുഞ്ഞും അവരുടെ ബന്ധുവായ മറ്റൊരു യുവതിയും കയറി. 

ബസില്‍ മറ്റെവിടെ നിന്നോ കയറിയ തമിഴ്‌നാട് സ്വദേശികളായ സ്ത്രീകള്‍ ബസില്‍ തിരക്കുണ്ടാക്കുകയും ഇതിനിടെ കൈക്കുഞ്ഞിന്റെ കാലില്‍ കിടന്ന പാദസ്വരം പൊട്ടിച്ചെടുക്കുകയും ചെയ്തു. കുഞ്ഞിന്റെ കാല്‍ പിന്നിലേക്ക് വലിയുന്നത് കുഞ്ഞിനൊപ്പമുണ്ടായിരുന്ന യുവതിയുടെ ശ്രദ്ധയില്‍പ്പെട്ടതോടെയാണ് മോഷണമാണെന്ന വിവരം ശ്രദ്ധയില്‍പ്പെട്ടത്. ഇവര്‍ ബഹളം കൂട്ടിയതോടെ പൊട്ടിച്ചെടുത്ത പാദസ്വരം താഴെയിട്ടു. 

ഇതിനിടെ ബസ് നിര്‍ത്തിയപ്പോള്‍ ഇവര്‍ ഇറങ്ങി ഓടാന്‍ ശ്രമിച്ചെങ്കിലും യാത്രക്കാര്‍ തടഞ്ഞുനിര്‍ത്തി അതേ ബസില്‍ സ്‌റ്റേഷനിലെത്തിച്ച് പോലീസിന് കൈമാറുകയായിരുന്നു. സ്‌റ്റേഷന്‍ മുറിയില്‍ പോലീസ് ചോദ്യം ചെയ്യുന്നതിനിടെ പിന്നില്‍ നിന്ന മോഷ്ടാക്കളില്‍ ഒരാളായ മറ്റൊരു യുവതി എന്തോ ഫയലുകള്‍ക്കിടയിലേക്ക് തിരുകി കയറ്റുന്നത് വെളിയില്‍ നിന്നവര്‍ ജനാലയിലൂടെ കണ്ടു.

ഇതേതുടര്‍ന്ന് നടത്തിയ പരിശോധനയില്‍ 4,800 ഓളം രൂപയായിരുന്നു ഇതെന്ന് കണ്ടെത്തി. എന്നാല്‍ ഇത് തങ്ങള്‍ വച്ചതല്ലെന്ന് സ്ഥാപിക്കാന്‍ ഇവര്‍ ഏറെ ശ്രമിച്ചെങ്കിലും വിജയിച്ചില്ല. ഇതും യാത്രയ്ക്കിടെ മോഷ്ടിച്ചെടുത്തതാണെന്ന് പോലീസ് കരുതുന്നു.