കഴിഞ്ഞ ലോക്‌സഭാ തെരഞ്ഞെടുപ്പില്‍ സിപിഎമ്മിനേറ്റ കനത്ത പരാജയത്തിന്റെ കാരണം ബിജെപിയുടെ വളര്‍ച്ചയാണെന്ന് സിപിഎം കണ്ടെത്തല്‍. ഇത് ഭാവിയില്‍ സിപിഎമ്മിന് ദോഷകരമായി ഭവിക്കുമെന്നും സിപിഎം വിലയിരുത്തി. 

സിപിഎമ്മിന് അടുത്തകാലത്തുണ്ടായ ശിഥിലീകരണം ശരിക്കും മുതലെടുക്കാനായത് ബിജെപിക്കാണ്. ഭൂരിപക്ഷ സമുദായം ബിജെപിക്ക് അനുകൂലമായി നിലയുറപ്പിച്ചപ്പോള്‍ ന്യൂനപക്ഷവും സിപിഎമ്മിനെ തഴഞ്ഞു. ഇതോടെയാണ് സിപിഎമ്മിന്റെ പരാജയം ആസന്നമായത്. എന്‍എസ്എസ് ബിജെപിക്ക് വേണ്ടി രഹസ്യമായി മുന്നോട്ട് വന്നപ്പോള്‍ എസ്എന്‍ഡിപി പരസ്യമായി രംഗത്തു വന്നു. നരേന്ദ്രമോഡിയോടൊപ്പം വെള്ളാപ്പള്ളി വേദി പങ്കിടുകയും ചെയ്തു. ഇങ്ങനെ ഒരു ഹൈന്ദവ ഏകീകരണം വന്നപ്പോള്‍ സ്വാഭാവികമായും പരമ്പരാഗതമായി വോട്ട് ചെയ്തിരുന്ന മുസ്ലീം സമൂഹവും മാറി ചിന്തിച്ചു. 
ഇത് വെളിവാക്കുന്നതാണ് സിപിഎം ജനറല്‍ സെക്രട്ടറി പിണറായി വിജയന്റെ പ്രസ്താവന.
ലോക്‌സഭാ തെരഞ്ഞെടുപ്പില്‍ മുന്‍കാലങ്ങളിലില്ലാത്ത വിധം കടുത്ത ജാതി- മതവികാരം കുത്തിയിളക്കാനുള്ള ശ്രമം കേരളത്തില്‍ നടന്നുവെന്ന് പിണറായി വിജയന്‍ പറഞ്ഞു. ഏത് സംഭവവും വര്‍ഗീയവല്‍ക്കരിക്കാന്‍ ആര്‍എസ്എസും ബിജെപിയും ശ്രമിക്കുന്നു. ഇത് ഒരുവിഭാഗം ജനങ്ങളില്‍ അന്യമത വിരോധം വളരാനിടയാക്കി.

ആര്‍എസ്എസ് അവരുടെ സ്വാധീനം വര്‍ധിപ്പിക്കാന്‍ ജാതി സംഘടനകളില്‍ നുഴഞ്ഞുകയറുന്നു. കേരളത്തിലെ പ്രധാന ജാതിസംഘടനകള്‍ സാമൂഹ്യമാറ്റത്തില്‍ പങ്കുവഹിച്ചവയാണ്. എസ്എന്‍ഡിപിയും എന്‍എസ്എസും തുടക്കകാലത്ത് നവോത്ഥാനമൂല്യങ്ങളില്‍ ഉറച്ചുനിന്നു. എന്നാലിപ്പോള്‍ ഈ സംഘടനകളുടെ തലപ്പത്ത് സമ്പന്നവിഭാഗമാണ്.

കേന്ദ്ര - സംസ്ഥാനസര്‍ക്കാരുകളുടെ സമ്പന്നവര്‍ഗ നയങ്ങളെയും അവര്‍ പിന്തുണയ്ക്കുന്നു. എസ്എന്‍ഡിപിയുടെ ചില ശാഖായോഗങ്ങളില്‍ വിഷംചീറ്റുന്ന ആര്‍എസ്എസ് പ്രസംഗകനോ പ്രസംഗകയോ പങ്കെടുക്കുന്നു. ഏത് ശ്രീനാരായണ ദര്‍ശനം സംരക്ഷിക്കാനാണ് ഇവര്‍ വരുന്നത്? എസ്എന്‍ഡിപിയുടെ നേതൃത്വത്തിന് ഇതില്‍ പങ്കുണ്ടായിരിക്കില്ല. എന്നാല്‍, പ്രാദേശികമായി ഇങ്ങനെ സംഭവിക്കുന്നു.

എന്തായാലും കാല്‍ ചുവട്ടിലെ മണ്ണ് ഒലിച്ച് പോയി തുടങ്ങിയിരിക്കുന്നു എന്ന് സിപിഎമ്മിന് ബോധ്യമായി. അതിന് മുഖ്യ കാരണം ബിജെപിയാണ്. ഇനി അല്‍പം ഭക്തിയില്ലാതെ പിടിച്ചു നില്‍ക്കാനാവില്ല.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha