2ജി കേസില്‍ നിരപരാധിത്വം തെളിയിക്കുമെന്ന്‌ രാജ: സി.ഐ.ജി കണക്കുകള്‍ തെറ്റെന്ന്‌ ജെ.പി.സി റിപ്പോര്‍ട്ട്‌
2ജി ഇടപാടില്‍ താന്‍ നിരപരാധിയാണെന്ന്‌ തെളിയിക്കുമെന്ന്‌ മുന്‍ ടെലികോം മന്ത്രി എ.രാജ. പ്രധാനമന്ത്രിയുമായി ആലോചിച്ച ശേഷമാണ്‌ താന്‍ എല്ലാം ചെയ്‌തതെന്ന്‌ രാജ മാധ്യമ പ്രവര്‍ത്തകരോട്‌ പറഞ്ഞു. സത്യം തെളിയിക്കാന്‍ ജെ.പി.സിക്കു മുമ്പാകെ ഹാജരാകാന്‍ അവസരം നല്‍കണമെന്നും രാജ പറഞ്ഞു.
അതേ സമയം 2ജി ഇടപാടില്‍ നഷ്ടം സംബന്ധിച്ച സി.ഐ.ജി കണക്കുകള്‍ തെറ്റാണെന്ന്‌ ജെ.പി.സി റിപ്പോര്‍ട്ടില്‍ പറയുന്നു. 2ജി അഴിമതി അന്വേഷിച്ച ജെ.പി.സി സമിതി തയ്യാറാക്കിയ റിപ്പോര്‍ട്ടിലാണ്‌ ഈ പരാമര്‍ശം ഉള്ളത്‌. എന്നാല്‍ ജെപിസി റിപ്പോര്‍ട്ട്‌ കോണ്‍ഗ്രസ്‌ റിപ്പോര്‍ട്ടാണെന്ന്‌ ബിജെപി ആരോപിച്ചു. റിപ്പോര്‍ട്ട്‌ അംഗീകരിക്കില്ലെന്ന്‌ സിപിഎമ്മും സിപിഐയും വ്യക്തമാക്കിയിട്ടുണ്ട്‌. ഇതോടെ ഉടന്‍ ആരംഭിക്കാനിരിക്കുന്ന പാര്‍ലമെന്റിന്റെ ബജറ്റ്‌ സമ്മേളനത്തിന്റെ രണ്ടാം സെക്ഷന്‍ പ്രക്ഷുബ്‌ധമാകുമെന്ന്‌ ഉറപ്പായി. ജെ.പി.സിയുടെ റിപ്പോര്‍ട്ട്‌ പാര്‍ലമെന്റിന്‌ മുന്നില്‍ വരുന്നതോടെ പ്രതിപക്ഷം സഭാ നടപടികള്‍ തടസപ്പെടുത്തിയേക്കും.
എന്നാല്‍ കേസില്‍ രാഷ്‌ട്രീയ പ്രേരിതമായല്ല റിപ്പോര്‍ട്ട്‌ തയാറാക്കിയതെന്ന്‌ അധ്യക്ഷന്‍ പി.സി.ചാക്കോ വ്യക്തമാക്കി. റിപ്പോര്‍ട്ട്‌ എല്ലാ അംഗങ്ങളും അംഗീകരിക്കുമെന്നാണ്‌ തന്റെ പ്രതീക്ഷ. സമിതിയുടെ മുന്നിലേക്ക്‌ രാജയെ വിളിച്ചുവരുത്തില്ലെന്നും രാജയുടെ അഭിപ്രായങ്ങള്‍ നേരത്തെ സമിതി പരിഗണിച്ചുവെന്നും പി.സി.ചാക്കോ വ്യക്തമാക്കി.
https://www.facebook.com/Malayalivartha
