ഡല്‍ഹിയില്‍ വീണ്ടും പ്രതിഷേധ കൊടുങ്കാറ്റ്‌, അഞ്ചുവയസുകാരിയെ ക്രൂരമായി പീഡിപ്പിച്ച അയല്‍വാസിയായ 22കാരനെ അറസ്‌റ്റ്‌ ചെയ്‌തു
ഡല്‍ഹിയില്‍ അഞ്ചുവയസുകാരിയെ മൃഗീയമായി പീഡിപ്പിച്ച അയല്‍വാസിയായ യുവാവിനെ പോലീസ്‌ അറസ്‌റ്റ്‌ ചെയ്‌തു. ബീഹാറിലെ മുസാഫര്‍പൂരില്‍ നിന്നാണ്‌ പ്രതിയായ മനോജ്‌ കുമാര്‍(22)നെ പോലീസ്‌ അറസ്‌റ്റ്‌ ചെയ്‌തത്‌. വെള്ളിയാഴ്‌ച രാത്രിയാണ്‌ മനോജിനെ ഡല്‍ഹി പോലീസിലെ പ്രത്യേക അന്വേഷണ സംഘം മൊബൈല്‍ ഫോണിനെ പിന്തുടര്‍ന്ന്‌ പിടികൂടിയത്‌.
കുറച്ചു നാളുകളായി ഡല്‍ഹിയില്‍ പീഡനത്തിന്‌ ഇരയായ പെണ്‍ക്കുട്ടിയുടെ വീടിന്‌ സമീപം വാടകയ്‌ക്ക്‌ താമസിച്ചു വരികയായിരുന്നു ഇയാള്‍. ഞായറാഴ്‌ച വൈകീട്ടാണ്‌ കളിച്ചുകൊണ്ടിരിക്കുകയായിരുന്ന കുട്ടിയെ കാണാതാകുന്നത്‌. പോലീസില്‍ പരാതി നല്‍കിയെങ്കിലും കേസെടുക്കാന്‍ പോലീസ്‌ തയ്യാറായില്ല. വീട്ടുകാര്‍ തിരച്ചില്‍ നടത്തുന്നതിനിടയില്‍ ബുധനാഴ്‌ചയാണ്‌ താഴത്തെ നിലയില്‍ നിന്ന് കുട്ടിയുടെ കരച്ചില്‍ കേട്ടത്‌. അകത്തു കയറി നോക്കിയപ്പോള്‍ ക്രൂര പീഡനങ്ങള്‍ ഏറ്റു വാങ്ങിയ നിലയില്‍ കുട്ടിയെ കണ്ടെത്തുകയായിരുന്നു. മൂന്നു ദിവസത്തോളം കുട്ടിയെ വീട്ടില്‍ പൂട്ടിയിട്ടിരിക്കുകയായിരുന്നു.
ഗുരുതരാവസ്ഥയില്‍ എയിംസില്‍ ചികിത്സയില്‍ കഴിയുകയാണ്‌. കുട്ടിയുടെ ആന്തരികാവയവങ്ങള്‍ക്ക്‌ കാര്യമായ ക്ഷതമേറ്റതിനെ തുടര്‍ന്ന്‌ അടിയന്തിര ശസ്‌ത്രക്രിയ നടത്തി. കുട്ടിയുടെ ജനനേന്ദ്രിയത്തില്‍ കുപ്പിയും മെഴുകുതിരിയും കുത്തിക്കയറ്റിയിരുന്നു. ഇവ ഡോക്ടര്‍മാര്‍ നീക്കം ചെയ്‌തു. കഴുത്തിലും മുഖത്തും,നെഞ്ചിലും മുറിവുകളുണ്ട്‌.
സംഭവത്തെ തുടര്‍ന്ന്‌ ഡല്‍ഹിയില്‍ ജനരോഷം പൊട്ടിപ്പുറപ്പെട്ടിട്ടുണ്ട്‌. പ്രതിഷേധം നടത്തിയ ഒരു യുവതിയുടെ കരണത്തടിച്ച പോലീസ്‌ ഉദ്യോഗസ്ഥനെ സസ്‌പെന്റ്‌ ചെയ്‌തു. കേസെടുക്കാന്‍ വിസമ്മതിച്ച രണ്ട് പോലീസ്‌ ഓസീസര്‍മാരേയും സസ്‌പെന്റ്‌ ചെയ്‌തിട്ടുണ്ട്‌. പ്രധാനമന്ത്രി മന്‍മോഹന്‍ സിംഗ്‌ നടുക്കം രേഖപ്പെടുത്തി. പോലീസ്‌ നടപടി അംഗീകരിക്കാന്‍ കഴിയില്ലെന്നും അദ്ദേഹം വ്യക്തമാക്കി.
https://www.facebook.com/Malayalivartha
