ഡല്‍ഹിയില്‍ അഞ്ചു വയസുകാരിയെ ക്രൂരമായി പീഡിപ്പിച്ചത്‌ രണ്ടു പേര്‍: സംഭവത്തില്‍ രണ്ടാമനേയും പോലീസ്‌ അറസ്‌റ്റു ചെയ്‌തു
ഡല്‍ഹിയില്‍ അഞ്ചുവയസുകാരിയെ തടവിലാക്കി ക്രൂരമായ ലൈംഗിക പീഡനത്തിന്‌ വിധേയമാക്കിയ സംഭവത്തില്‍ രണ്ടാം പ്രതിയും അറസ്റ്റില്‍. ഒന്നാം പ്രതി മനോജ്‌ കുമാറിന്റെ സുഹൃത്ത്‌ പ്രദീപ്‌ കുമാറാണ്‌ പിടിയിലായത്‌. ബീഹാറിലെ ദര്‍ബാംഗ്‌ ജില്ലയില്‍ നിന്ന് ഞായറാഴ്‌ച രാത്രിയാണ്‌ പോലീസ്‌ ഇയാളെ പിടികൂടിയത്‌. കുട്ടിയെ പീഡിപ്പിച്ചവരില്‍ എത്ര പേരുണ്ടെന്ന കാര്യത്തില്‍ പോലീസിന്‌ അവ്യക്തതയുണ്ടായിരുന്നു. ആദ്യം ഒരാളാണെന്നും പിന്നീട് രണ്ടു പേരുണ്ടെന്നും തരത്തിലുള്ള വാര്‍ത്തകള്‍ വന്നിരുന്നു. എന്നാല്‍ പിന്നീട് ഒരാള്‍ മാത്രമാണെന്ന നിഗമനത്തില്‍ പോലീസ്‌ എത്തി. ഒന്നാം പ്രതിയെ അറസ്റ്റ്‌ ചെയ്‌ത്‌ ചോദ്യം ചെയ്‌തതോടെയാണ്‌ മറ്റൊരാള്‍കൂടി ഉള്ളതായി പോലീസ്‌ മനസിലാക്കിയത്‌. ഇതിനെ തുടര്‍ന്ന്‌ ഊര്‍ജ്ജിതമായ അന്വേഷണത്തിനൊടുവില്‍ രണ്ടാം പ്രതിയെ ബീഹാറില്‍ നിന്ന് കണ്ടെത്തുകയായിരുന്നു.
കേസിലെ ഒന്നാം പ്രതി മനോജ്‌ കുമാറിനെ മെയ്‌ നാലുവരെ ജുഡീഷ്യല്‍ കസ്‌റ്റഡിയില്‍ വിട്ടു. മനോജിന്റെ നാട്ടുകാരനാണ്‌ പ്രദീപ്‌. ഗാസിയാബാദിലെ ലോണിയിലുള്ള വാടക വീട്ടിലാണ്‌ ഇയാള്‍ താമസിക്കുന്നത്‌. സംഭവദിവസം നാലു മണിയോടെ ഇയാള്‍ മനോജിന്റെ അടുക്കല്‍ എത്തുകയായിരുന്നു. തുടര്‍ന്ന്‌ ഇരുവരും മദ്യപിക്കുകയും ഫോണില്‍ അശ്ലീല ചിത്രങ്ങള്‍ കാണുകയും ചെയ്‌തു. ഇതിനിടെ മുറ്റത്തു കളിച്ചു കൊണ്ടിരുന്ന ബാലികയെ പ്രദീപ്‌ കണ്ടു. ഇയാളുടെ നിര്‍ബന്ധപ്രകാരം മനോജ്‌ കുഞ്ഞിനെ അകത്തേക്കു വിളിച്ചു. അടുത്തുള്ള കടയില്‍ പോയി ചോക്ലേറ്റ്‌ വാങ്ങിക്കൊണ്ടുവന്ന്‌ അതു നല്‍കാമെന്നു പറഞ്ഞാണ്‌ ബാലികയെ മനോജ്‌ ആകര്‍ഷിച്ചത്‌.
അകത്തേക്കു കയറിയ കുഞ്ഞിനെ വായ മൂടി പ്രദീപ്‌ കീഴ്‌പ്പെടുത്തി. തുടര്‍ന്ന്‌ മദ്യലഹരിയിലായിരുന്ന പ്രദീപ്‌ പെണ്‍കുഞ്ഞിനെ ക്രൂരമായി പീഡിപ്പിക്കുകയായിരുന്നു എന്നാണ്‌ മനോജ്‌ പോലീസിനു നല്‍കിയ മൊഴി. താന്‍ കാഴ്‌ചക്കാരനായി മുറിയില്‍ വെറുതേ ഇരിക്കുകയായിരുന്നു. എന്നാല്‍ പിന്നീട് തെളിവുകള്‍ നശിപ്പിക്കാന്‍ കൂട്ടുനിന്നതായും ഇയാള്‍ സമ്മതിച്ചു.
പീഡനത്തിനുശേഷം അവശനിലയിലായ ബാലികയെ കൊലപ്പെടുത്തി തെളിവുകള്‍ നശിപ്പിക്കാമെന്ന്‌ നിര്‍ദേശിച്ചത്‌ താനാണെന്നും മനോജ്‌കുമാര്‍ പോലീസിനോടു സമ്മതിച്ചു. ബാലിക മരിച്ചതായി കരുതിയാണ്‌ മുറി പൂട്ടിയിട്ട്‌ രണ്ടു പേരും രക്ഷപ്പെട്ടത്‌. മൊബൈല്‍ ഫോണ്‍ സ്വിച്ച്‌ ഓഫ്‌ ചെയ്‌തു രണ്ടു ദിശകളിലായാണ്‌ ഇരുവരും പോയത്‌.
അതേസമയം ഡല്‍ഹി എയിംസ്‌ ആശുപത്രിയില്‍ ചികിത്സയില്‍ കഴിയുന്ന കുട്ടിയുടെ ആരോഗ്യനില മെച്ചപ്പെട്ടതായി ആശുപത്രി അധികൃതര്‍ അറിയിച്ചു. ഡല്‍ഹിയില്‍ വന്‍ പ്രതിഷേധത്തിന്റെ സാധ്യത കണക്കിലെടുത്ത്‌ പോലീസ്‌ മുന്‍കരുതലുകള്‍ കൈക്കൊണ്ടിട്ടുണ്ട്‌.
https://www.facebook.com/Malayalivartha
