അഭിനന്ദിന്റെ ഒരു തോക്കിന് പകരം 7.50 ലക്ഷം റൈഫിളുകള്‍; പ്രധാനമന്ത്രി നരേന്ദ്രമോദി ഇന്ന് അമേത്തിയില്‍ മേക്ക് ഇന്‍ ഇന്ത്യ പദ്ധതിക്ക് കീഴില്‍ ആരംഭിക്കുന്ന കലാഷ്‌നിക്കോവ് ഫാക്ടറി ഉദ്ഘാടനം ചെയ്യും; മോദി കുതിക്കുന്നതിങ്ങനെ
കഷ്ടം പാക്കിസ്ഥാനെ. ഒരു തോക്കിന് പകരം ലക്ഷകണക്കിന് തോക്കെടുക്കാന്‍ മോദി വരുന്നു. ന്യൂക്ലിയര്‍ ബോംബെന്ന ഉമ്മാക്കി കാണിച്ച് കുറെ നാളായി വിരട്ടി നോക്കുന്ന ഇമ്രാനെ. ഒരു തോക്ക് പിടിച്ചുവച്ചാല്‍ 7.50 ലക്ഷം റൈഫിളുകളുമായി ഞങ്ങള്‍ വരുന്നു. പ്രധാനമന്ത്രി ഇന്ന് അമേത്തിയില്‍ റൈഫിള്‍ ഫാക്ടറി ഉദ്ഘാടനം ചെയ്യുമ്പോള്‍ ലോകം മുഴുവന്‍ ഉറ്റുനോക്കുകയാണ്. പ്രധാനമന്ത്രി നരേന്ദ്രമോദി ഇന്ന് അമേത്തിയില്‍ മേക്ക് ഇന്‍ ഇന്ത്യ പദ്ധതിക്ക് കീഴില്‍ ആരംഭിക്കുന്ന കലാഷ്‌നിക്കോവ് ഫാക്ടറി ഉദ്ഘാടനം ചെയ്യും.
ഇന്ത്യയുടെ ഓര്‍ഡിനന്‍സ് ഫാക്ടറിയും റഷ്യന്‍ കമ്പനിയും സംയുക്തമായി ആരംഭിക്കുന്ന കലാഷ്‌നിക്കോവ് ഫാക്ടറി ഇന്തോ റഷ്യന്‍ റൈഫിള്‍സ് ആണ് മോദി ഉദ്ഘാടനം ചെയ്യുന്നത്. ഏഴര ലക്ഷം കലാഷ്‌നിക്കോവ് റൈഫിളുകളാണ് ഫാക്ടറിയില്‍ നിന്ന് നിര്‍മ്മിക്കുന്നതെന്ന് മുഖ്യമന്ത്രി യോഗി ആദിത്യനാഥ് പറഞ്ഞു ഉത്തര്‍പ്രദേശ് പ്രതിരോധ ഇടനാഴിക്ക് വലിയ നേട്ടമാണ് ഫാക്ടറിയെന്നും അദ്ദേഹം വ്യക്തമാക്കി.അമേത്തിയില്‍ വിവിധ പദ്ധതികളുടെ ഉദ്ഘാടനവും അദ്ദേഹം നിര്‍വഹിക്കുന്നുണ്ട്. ഊര്‍ജ്ജോത്പാദനം , വിദ്യാഭ്യാസം , ആരോഗ്യം , നിര്‍മ്മാണം തുടങ്ങിയ മേഖലകളിലെ വിവിധ പദ്ധതികളാണ് ഉദ്ഘാടനം ചെയ്യുക. കോഹറില്‍ നടക്കുന്ന പൊതു പരിപാടിയിലും അദ്ദേഹം സംസാരിക്കും. കോണ്‍ഗ്രസ് തട്ടകത്തില്‍ ആദ്യമായി മോദി എത്തുന്നു, മേക്ക് ഇന്‍ ഇന്ത്യയില്‍ ഇനി കലാഷ്‌നിക്കോവിന്റെ ഗര്‍ജ്ജനം. കോണ്‍ഗ്രസ് അദ്ധ്യക്ഷന്‍ രാഹുല്‍ ഗാന്ധിയുടെ മണ്ഡലമായ അമേഠിയില്‍ പ്രധാനമന്ത്രി നരേന്ദ്ര മോദി ഇന്നെത്തും. ഇന്ത്യ റഷ്യ സഹകരണത്തോടെ ആരംഭിക്കുന്ന കലാഷ്‌നിക്കോവ് ഫാക്ടറിയുടെ ഉദ്ഘാടനത്തിനായാണ് പ്രധാനമന്ത്രി എത്തുന്നത്. മേക്ക് ഇന്‍ ഇന്ത്യ പദ്ധതിയിലുള്‍പ്പെടുത്തിയാണ് ഇരു രാജ്യങ്ങളുടെയും സഹകരണത്തോടെ എ.കെ സീരീസിലെ തോക്കുകള്‍ ഇവിടെ നിര്‍മ്മിക്കുന്നത്. ഉത്തര്‍പ്രദേശ് പ്രതിരോധ ഇടനാഴിയുടെ നട്ടെല്ലാവും ഈ ഫാക്ടറി. ഇവിടെ നിന്നും എ.കെ.47 അടക്കം ഏഴര ലക്ഷത്തോളം തോക്കുകള്‍ നിര്‍മ്മിക്കാനാണ് ഇരു രാജ്യങ്ങളും ധാരണയായിരിക്കുന്നത്. മേക്ക് ഇന്‍ ഇന്ത്യ പദ്ധതിയില്‍ കലാഷ്‌നിക്കോവ് ഫാക്ടറി ഇന്ത്യയില്‍ ആരംഭിക്കുവാന്‍ റഷ്യ താത്പര്യം അറിയിക്കുകയായിരുന്നു. പത്രണ്ടായിരം കോടിയുടെ ഈ പദ്ധതിയിലൂടെ പ്രതിരോധ നിര്‍മ്മാണ മേഖലയില്‍ ഇന്ത്യന്‍ സാന്നിദ്ധ്യം കൂടുതല്‍ ശക്തമാവും. പൊതുമേഖല സ്ഥാപനമായ ഓര്‍ഡിനന്‍സ് ഫാക്ടറിയുമായാണ് റഷ്യന്‍ കലാഷ്‌നിക്കോവ് ഫാക്ടറി തോക്ക് നിര്‍മ്മാണത്തിനായി സഹകരിച്ച് പ്രവര്‍ത്തിക്കുന്നത്.
ഏപ്രിലില്‍ പ്രതിരോധ മന്ത്രി നിര്‍മ്മലാ സീതാരാമന്റെ റഷ്യന്‍ സന്ദര്‍ശന വേളയിലാണ് ഇത്തരമൊരു പദ്ധതി നിര്‍ദേശം റഷ്യ മുമ്പോട്ട് വെച്ചത്. കലാഷ്‌നിക്കോവ് കണ്‍സേണും, ഓര്‍ഡ്‌നന്‍സ് ഫാക്ടറി ബോര്‍ഡും സംയുക്തമായാണ് പുതിയ കരാറില്‍ ഒപ്പ് വച്ചിരിക്കുന്നത്. കഴിഞ്ഞ വര്‍ഷം ഡിസംബറില്‍ സൈനികസാങ്കേതിക സഹകരണത്തിന് ഇന്ത്യറഷ്യ ഇന്റര്‍ ഗവണ്‍മെന്റ് കമ്മീഷന്‍ യോഗം ചേര്‍ന്നപ്പോള്‍ ഇതു സംബന്ധിച്ച് റഷ്യയുമായി ധാരണയിലെത്തിയിരുന്നു. മാത്രമല്ല പ്രതിരോധ മന്ത്രി നിര്‍മലാ സീതാരാമന്‍ റഷ്യന്‍ പ്രതിനിധിയായ സെര്‍ഗി ഷൊവിഗുമായി ഇതു സംബന്ധിച്ച് കൂടിക്കാഴ്ചയും നടത്തിയിരുന്നു.700 കോടിയാണ് തോക്കുകളുടെ നിര്‍മ്മാണ ചിലവായി പ്രതീക്ഷിക്കുന്നത്. ലോകത്തെ ഏറ്റവും മികച്ച തോക്കായാണ് കലാഷ്‌നിക്കോവ് തോക്കുകള്‍ അറിയപ്പെടുന്നത്. എകെ 47, എകെ 56 തോക്കുകള്‍ ഉപയോഗിക്കാത്ത രാജ്യങ്ങളില്ല . രണ്ടാം ലോകമഹായുദ്ധകാലത്ത് മൈക്കല്‍ കലാഷ്‌നിക്കോവ് എന്ന റഷ്യന്‍ സൈനികനാണ് ആധുനിക യുദ്ധ സാഹചര്യത്തിന് അനുയോജ്യമായ തോക്ക് രൂപകല്‍പന ചെയ്തത്.
ഉയര്‍ന്ന താപനിലയിലും വെളളത്തിനടിയിലും ഒരു പോലെ ഫലപ്രദമായ തോക്ക് എന്ന നിലയ്ക്ക് എകെ 47, എകെ 56 തോക്കുകളുടെ നിര്‍മാണം ഇന്ത്യയുടെ പ്രതിരോധ ശേഷിക്ക് മുതല്‍ക്കൂട്ടാകുമെന്നാണ് വിലയിരുത്തല്‍.മാത്രമല്ല വര്‍ഷം തോറും ആയുധശേഷി പരിഷ്‌കരണത്തിനും നവീകരണത്തിനും ചെലവാക്കുന്ന കോടിക്കണക്കിന് രൂപ രാജ്യത്തിന് ലാഭിക്കാം.
https://www.facebook.com/Malayalivartha
