നാഗാലാന്റിലെ അനധികൃത ഖനിയില്‍ നാലു തൊഴിലാളികള്‍ക്ക് ദാരുണാന്ത്യം. നാഗാലാന്റിലെ ലോങ്‌ലെങ് ജില്ലയിലെ അനധികൃത റാറ്റ്‌ഹോള്‍ ഖനിയിലാണ് നാല് തൊഴിലാളികള്‍ മരിച്ചത്. കഴിഞ്ഞ ദിവസമാണ് സംഭവം നടന്നത്. ഇവരുടെ മൃതദേഹങ്ങള്‍ പുറത്തെടുത്തെങ്കിലും മരണകാരണം വ്യക്തമല്ല. ഖനിയില്‍ ചെളിയടിഞ്ഞ് ശ്വാസതടസം നേരിട്ടതോ വിഷവാതകം ശ്വസിച്ചതോ ആകാം മരണത്തിനിടയാക്കിയതെന്ന് പൊലീസ് പറഞ്ഞു. ശനിയാഴ്ച അര്‍ധരാത്രിയിലാണ് സംഭവത്തെ കുറിച്ച് പൊലീസിന് വിവരം ലഭിക്കുന്നത്.

പ്രദേശവാസികളായ ജിതന്‍ തന്‍ടി(40), കൃഷ്ണന്‍ ഗൊഗോയി(32), ടുട്ടു ദേക(28), സുശന്‍ ഫുടന്‍(37) എന്നിവരാണ് മരിച്ചത്. നാല് പേരുടെയും മൃതദേഹങ്ങള്‍ പോസ്റ്റ്‌മോര്‍ട്ടം കൂടാതെ തന്നെ കുടുംബാംഗങ്ങള്‍ക്ക് വിട്ടുകൊടുത്തു. പോസ്റ്റ്‌മോര്‍ട്ടം വേണ്ടെന്ന് കുടുംബാംഗങ്ങള്‍ അറിയിച്ചതിനെ തുടര്‍ന്നാണ് മൃതദേഹം വിട്ടുകൊടുത്തതെന്ന് പൊലീസ് ഉദ്യോഗസ്ഥര്‍ പറഞ്ഞു.

ജനുവരിയില്‍ അനധികൃത ഖനികള്‍ക്ക് പ്രവര്‍ത്തനം അവസാനിപ്പിക്കാന്‍ നോട്ടീസ് നല്‍കിയതാണെന്നും എന്നാല്‍ ഖനികള്‍ തുടര്‍ന്നും പ്രവര്‍ത്തിക്കുന്നുണ്ടെന്നാണ് സംഭവം കൊണ്ട് വ്യക്തമാകുന്നതെന്നും പൊലീസ് പറഞ്ഞു. ചെളി അടിഞ്ഞതുകൊണ്ട് രണ്ട് ദിവസം ഖനി പ്രവര്‍ത്തിച്ചിരുന്നില്ലെന്നും വീണ്ടും വന്നപ്പോള്‍ വിഷവാതകം ശ്വസിക്കാന്‍ ഇടയായതാകാം മരണത്തിലേക്ക് നയിച്ചതെന്നും മരിച്ച തൊഴിലാളികളില്‍ ഒരാളുടെ അയല്‍വാസി പറഞ്ഞു.

കഴിഞ്ഞ വര്‍ഷം മേഘാലയയില്‍ ഉണ്ടായ ഖനി ദുരന്തത്തില്‍ 14 തൊഴിലാളികള്‍ മരിച്ചിരുന്നു.