രാഷ്ട്രീയ നേതാവും നടനുമായ കമൽഹാസനെ പരിഹസിച്ച് എഐഎഡിഎംകെ നേതാവും തമിഴ്‌നാട്ടിലെ മുതിര്‍ന്ന മന്ത്രിയുമായ സെല്ലൂര്‍ കെ രാജു. രാഷ്ട്രീയത്തിലേക്ക് രംഗപ്രവേശനം ചെയ്‌തെങ്കിലും വേണ്ടരീതിയില്‍ തരംഗമുണ്ടാക്കാന്‍ സാധിക്കാതെ പോയതിനു പിന്നാലെയാണ് സെല്ലൂര്‍ കെ രാജു പരിഹാസവുമായി രംഗത്തെത്തിയിരിക്കുന്നത്. കമല്‍ഹാസന് സിനിമയില്‍ മാത്രമേ മുഖ്യമന്ത്രിയാകാന്‍ കഴിയൂവെന്നും ജീവിതത്തില്‍ അതിന് സാധിക്കില്ലെന്നും രാജു പറഞ്ഞു. കമലിനെ തമിഴ്നാട്ടിലെ ജനങ്ങള്‍ സ്വീകരിക്കില്ലെന്നും അദ്ദേഹം കൂട്ടിച്ചേര്‍ത്തു.

'കമല്‍ഹാസന്‍ നല്ലൊരു നടനാണെങ്കിലലും കഴിഞ്ഞ ലോക്സഭാ തെരഞ്ഞെടുപ്പില്‍ അദ്ദേഹത്തെ ജനം തള്ളിയത് നമ്മള്‍ കണ്ടതാണ്.' എഐഎഡിഎംകെ സ്ഥാപകനേതാവായ എംജിആറിനെ മാത്രമേ രാഷ്ട്രീയത്തില്‍ തമിഴ് ജനത സ്വീകരിച്ചിട്ടുള്ളൂവെന്നും അദ്ദേഹം പറഞ്ഞു.

രാഷ്ട്രീയപ്രവേശന സമയത്ത് കമല്‍ ഇനി സിനിമയില്‍ അഭിനയിക്കില്ലെന്ന് പറഞ്ഞെങ്കിലും ആ വാക്ക് പാലിച്ചില്ല. ഇപ്പോഴും സിനിമയില്‍ അഭിനയിക്കുന്നുണ്ട്. തമിഴ് ജനതയുടെ ഹൃദയം കീഴടക്കിയ നടന്‍ എംജിആര്‍ മാത്രമാണ്. കമലിന് അത് സാധിച്ചിട്ടില്ല, അതുകൊണ്ട് അദ്ദേഹത്തിന് മുഖ്യമന്ത്രിയാവാനും കഴിയില്ല. കമലിനെ ഒരു നടന്‍ എന്നതിലുപരി ഒരു രാഷ്ട്രീയക്കാരനായി ആരും കാണുന്നില്ലെന്നും രാജു പറഞ്ഞു.

എന്നാല്‍ ഇതിനിടയിലും രജനീകാന്തിനെ വാഴ്ത്താന്‍ അദ്ദേഹം മറന്നില്ല. ആര്‍ട്ടിക്കിള്‍ 370 റദ്ദാക്കിയ നടപടിയെ സ്വാഗതം ചെയ്ത രജനീകാന്തിനെ അഭിനന്ദിക്കുന്നതായും രാജു പറഞ്ഞു. രജനിയുടെ കാഴ്ചപ്പാടും മുന്‍ മുഖ്യമന്ത്രി അണ്ണാദുരൈയുടെ കാഴ്ചപ്പാടും തമ്മില്‍ സാമ്യമുണ്ടെന്നും അദ്ദേഹം വ്യക്തമാക്കി.