അസമില് കനത്ത സുരക്ഷ... നാളെ ദേശീയ പൗരത്വ പട്ടിക പ്രസിദ്ധീകരിക്കും
ദേശീയ പൗരത്വ പട്ടികയുടെ അന്തിമരൂപം നാളെ പ്രസിദ്ധീകരിക്കുന്ന സാഹചര്യത്തില് അസമില് സുരക്ഷാക്രമീകരണങ്ങള് ഏര്പ്പെടുത്തി. സംഘര്ഷാവസ്ഥ നിലനില്ക്കുന്ന പ്രദേശങ്ങളില് അടിയന്തരാവസ്ഥ പ്രഖ്യാപിച്ചു. പ്രകോപനപരമായ പ്രസ്താവനകളൊന്നും ജനങ്ങള് മുഖവിലയ്ക്കെടുക്കരുതെന്ന് അസം പോലീസ്.
മതിയായ രേഖകളുടെ അഭാവത്തില് പട്ടികയില് നിന്ന് നിരവധി ഇന്ത്യന് പൗരന്മാരുടെ പേരുകള് നീക്കം ചെയ്യപ്പെടാനും അര്ഹതയില്ലാത്തവരുടെ പേരുകള് ഉള്പ്പെടാനും സാധ്യതയുണ്ടെന്ന് ബിജെപിയും കോണ്ഗ്രസും ഉള്പ്പെടെയുള്ള രാഷ്ട്രീയപാര്ട്ടികള് ആശങ്ക പ്രകടിപ്പിച്ചിട്ടുണ്ട്. അന്തിമപ്പട്ടികയില് പേരുള്പ്പെടാത്തവര്ക്ക് ആവശ്യമായ സുരക്ഷ ഉറപ്പുവരുത്തിയിട്ടുണ്ടെന്ന് സര്ക്കാര് അറിയിച്ചു.എല്ലാ അസം പൗരന്മാര്ക്കും പട്ടികയില് ഇടം നേടാനുള്ള അവസരം നല്കുമെന്ന് സംസ്ഥാനസര്ക്കാര് ഉറപ്പ് നല്കിയതായി കേന്ദ്ര ആഭ്യന്തരവകുപ്പിന്റെ ഔദ്യോഗിക അറിയിപ്പില് വ്യക്തമാക്കിയിട്ടുണ്ട്.
2013 ലാണ് പട്ടിക പുതുക്കാനുള്ള നടപടികള് ആരംഭിച്ചത്. അസം അതിര്ത്തി വഴിയുള്ള നുഴഞ്ഞുകയറ്റക്കാരുടെ എണ്ണം ഇന്ത്യയില് വര്ധിക്കുന്നതായി ശ്രദ്ധയില് പെട്ടതോടെയാണ് ദേശീയ പൗരത്വ പട്ടിക പുതുക്കി പ്രസിദ്ധീകരിക്കാന് സുപ്രീംകോടതി ഉത്തരവിട്ടത്. ഉദ്യോഗസ്ഥരുടെ സഹായത്തോടെ പട്ടിക പരിശോധിച്ച് പേരുണ്ടെന്നുറപ്പ് വരുത്താന് ജനങ്ങളോട് ആവശ്യപ്പെട്ടിട്ടുണ്ട്.
https://www.facebook.com/Malayalivartha