നിര്ഭയ കേസിലെ വിധി വൈകുമെന്ന് ആശങ്ക... അമ്മയെ പോലും തിരിച്ചറിയാനാകുന്നില്ല; കേസിലെ മുഖ്യപ്രതികളില് ഒരാളായ വിനയ് ശര്മ്മ വിദഗ്ധ വൈദ്യസഹായം തേടി വീണ്ടും കോടതിയില്
നിര്ഭയ കേസിലെ മുഖ്യപ്രതികളില് ഒരാളായ വിനയ് ശര്മ്മ വിദഗ്ധ വൈദ്യസഹായം തേടി കോടതിയെ സമീപിച്ചു. വിനയ് ശര്മയ്ക്ക് സ്വന്തം അമ്മയെ പോലും ഇപ്പോള് തിരിച്ചറിയാനാകുന്നില്ലെന്നും ഇയാള്ക്ക് സ്കീസോഫ്രീനിയ എന്ന മാനസികരോഗം ബാധിച്ചിട്ടുണ്ടെന്നും അഭിഭാഷകന് കോടതിയെ അറിയിച്ചിട്ടുണ്ട്. തിഹാര് ജയിലില്വെച്ച് തല ചുമരിലിടിപ്പിച്ച് പരിക്കേറ്റതിനാല് എത്രയും പെട്ടെന്ന് വിദഗ്ധ വൈദ്യസഹായം നല്കണമെന്നാണ് ഇയാളുടെ അഭിഭാഷകന്റെ ആവശ്യം. തലയ്ക്കും വലതുകൈയ്ക്കും പരിക്കേറ്റ വിനയ് ശര്മ്മയ്ക്ക് മാനസികാരോഗ്യ പ്രശ്നങ്ങളുണ്ടെന്നും കോടതിയെ അറിയിച്ചു.
ഞായറാഴ്ച വൈകീട്ടാണ് വിനയ് ശര്മ്മ ജയിലില്വെച്ച് തല ചുമരിലിടിച്ച് സ്വയം പരിക്കേല്പ്പിച്ചത്. സംഭവം ശ്രദ്ധയില്പ്പെട്ട ജയില് ഉദ്യോഗസ്ഥരാണ് ഇയാളെ പിന്തിരിപ്പിച്ചത്. വിനയ് ശര്മ്മയ്ക്ക് സാരമായി പരിക്കേറ്റതായി ജയില് അധികൃതരും അറിയിച്ചു ഇതിനുപിന്നാലെയാണ് ഇയാളുടെ അഭിഭാഷകന് വിദഗ്ധ ചികിത്സ ആവശ്യപ്പെട്ട് കോടതിയെ സമീപിച്ചത്. വിനയ് ശര്മയെ ഇന്സ്റ്റിറ്റിയൂട്ട് ഓഫ് ഹ്യൂമന് ബിഹേവിയര് ആന്ഡ് അലൈഡ് സയന്സ് ആശുപത്രിയില് പ്രവേശിപ്പിച്ച് ചികിത്സ നല്കണമെന്നും അഭിഭാഷകനായ എപി.സിങ് നല്കിയ അപേക്ഷയില് പറയുന്നു. അപേക്ഷ പരിഗണിച്ച പ്രത്യേക കോടതി തിഹാര് ജയില് അധികൃതരില്നിന്ന് റിപ്പോര്ട്ട് തേടി. അതേസമയം, കേസിലെ പ്രതികളായ വിനയ് ശര്മ്മ, അക്ഷയ് ഠാക്കൂര്, പവന് ഗുപ്ത, മുകേഷ് സിങ് എന്നിവരെ മാര്ച്ച് മൂന്നിന് തൂക്കിലേറ്റാനാണ് തീരുമാനം. വിനയ് ശര്മ്മയ്ക്ക് പരിക്കേറ്റതിനാല് വധശിക്ഷ ഇനിയും നീണ്ടേക്കും.
https://www.facebook.com/Malayalivartha