ജയലളിതയുടെ സമ്പത്ത് ഏകദേശ മതിപ്പ്- 1,000 കോടി. കോടിക്കണക്കിനു രൂപയുടെ സ്വര്‍ണം, വെള്ളി ആഭരണങ്ങള്‍. സാരികള്‍ 2,140. ചെരുപ്പ് - 750 ജോഡി. കാറുകള്‍ 9 (90 മോഡല്‍ കോണ്‍ടെസ്സ, 80 മോഡല്‍ അംബാസിഡര്‍, മഹീന്ദ്ര ബോലെറോ , 2 എസ്യുവികള്‍ ഉള്‍പ്പെടെ) കൊടനാട് എസ്റ്റേറ്റ്, സിര്‍ത്താവൂര്‍ ബംഗ്ലാവ്, ആന്ധ്രയില്‍ 2 ഫാം ഹൗസുകള്‍, പയ്യാനൂര്‍ ബംഗ്ലാവ്. ശ്രീ ജയ പബ്ലിക്കേഷന്‍സ്, ശശി എന്റര്‍പ്രൈസസ്, റോയല്‍വാലി ഫ്‌ലോറി ടെക് എക്‌സ്‌പോര്‍ട്ട് ആന്‍ഡ് ടി എസ്റ്റേറ്റ് എന്നീ സ്ഥാപനങ്ങളില്‍ ഓഹരി

വേദനിലയം ജയലളിത മുഖ്യമന്ത്രിയായിരിക്കെ അവരുടെ ഔദ്യൗഗിക വസതി. 1967-ല്‍ ജയയുടെ അമ്മ വേദവല്ലി 1.32 ലക്ഷം രൂപയ്ക്കു വാങ്ങിയത്. 24,000 ചതുരശ്ര അടിയുള്ള കെട്ടിടത്തിനു നിലവില്‍ 100 കോടിയിലേറെയാണു മതിപ്പു വില. അനധികൃത സ്വത്ത് സമ്പാദനക്കേസില്‍ അറസ്റ്റിലാകുന്നതുവരെ ശശികല ഇവിടെയാണു താമസിച്ചിരുന്നത്.

ജയലളിതയുടെ സ്വത്തിന്റെ അവകാശികള്‍ സഹോദരന്റെ മക്കളായ ദീപ ജയകുമാറും ദീപക്കുമാണെന്നു മദ്രാസ് ഹൈക്കോടതിയുടെ വിധിക്കു ശേഷവും ആ ചര്‍ച്ച അവസാനിക്കുന്നില്ല. 2016-ലെ നിയമസഭാ തിരഞ്ഞെടുപ്പില്‍ ജയലളിത നല്‍കിയ സത്യവാങ്മൂലത്തില്‍ 118 കോടിയുടെ സ്വത്താണു കാണിച്ചിരിക്കുന്നത്. ദീപയും ദീപക്കും ഹൈക്കോടതിയില്‍ നല്‍കിയ ഹര്‍ജിയില്‍ ഇതു 188 കോടിയാണ്. ജയയുടെ സ്വത്ത് മേല്‍നോട്ടത്തിനു അഡ്മിനിസ്‌ട്രേറ്ററെ നിയമക്കണമെന്നാവശ്യപ്പെട്ടു അണ്ണാഡിഎംകെ പ്രവര്‍ത്തകന്‍ പുകഴേന്തി നല്‍കിയ ഹര്‍ജിയില്‍ സ്വത്തുക്കളുടെ മൂല്യം 913 കോടി. ഇതു 1000 കോടിയിലേറെ വരാമെന്നു ഹര്‍ജിയിലെ വാദത്തിനിടെ പരാമര്‍ശിക്കുകയും ചെയ്തു.
ജയയുടെ താമസസ്ഥലമായിരുന്ന പോയസ്ഗാര്‍ഡനിലെ വേദ നിലയം സ്മാരകമാക്കാനുള്ള തീരുമാനം സര്‍ക്കാര്‍ പുനഃപരിശോധിക്കണമെന്നു ഹൈക്കോടതി ഇന്നലെ നിര്‍ദേശിച്ചു. ആവശ്യമെങ്കില്‍ അതു മുഖ്യമന്ത്രിയുടെ ഔദ്യോഗിക വസതിയാക്കാം. സ്മാരകം വേണമെന്നു നിര്‍ബന്ധമാണെങ്കില്‍ ചെറിയൊരു ഭാഗം അതിനായി ഉപയോഗിക്കാമെന്നു ജസ്റ്റിസ് ആര്‍.കൃപാകരന്‍, അബ്ദുല്‍ ഖുദ്ദൂസ് എന്നിവരുള്‍പ്പെട്ട ബെഞ്ച് വിധിച്ചു. വേദനിലയം ഏറ്റെടുത്തു സ്മാരകമാക്കുന്നതിനു ഈയിടെ ഓര്‍ഡിനന്‍സ് പുറപ്പെടുവിച്ച തമിഴ്‌നാട് സര്‍ക്കാരിനു കനത്ത തിരിച്ചടി നല്‍കുന്നതാണു വിധി. സ്വകാര്യ കെട്ടിടങ്ങള്‍ വന്‍വില കൊടുത്തുവാങ്ങി ഏറ്റെടുക്കുന്നതിനു പകരം ജനോപകാരപ്രദമായ പദ്ധതികള്‍ നടപ്പാക്കണമെന്നു ഹൈക്കോടതി പറഞ്ഞു.
മൂന്നു വര്‍ഷം മുന്‍പ് ജയലളിത മരിക്കുമ്പോള്‍ തന്റെ സ്വത്ത് വകകള്‍ക്കു പിന്തുടര്‍ച്ചവകാശിയെ നിശ്ചയിച്ചിരുന്നില്ല. നേരിട്ടുള്ള അവകാശികളില്ലാത്തതിനാല്‍, ഹിന്ദു പിന്തുടര്‍ച്ചവകാശ നിയമപ്രകാരം രണ്ടാംനിര അവകാശികളായ തങ്ങള്‍ക്കു സ്വത്തു വകകള്‍ കൈകാര്യം ചെയ്യുന്നതിനു അധികാരം വേണമെന്നാവശ്യപ്പെട്ടു ദീപയും ദീപക്കുമാണു ഹൈക്കോടതിയെ സമീപിച്ചത്. സ്വത്തുവകകളുടെ കൈകാര്യകര്‍ത്താവായി തന്നെ നിയമിക്കണമെന്നാവശ്യപ്പെട്ടു അണ്ണാഡിഎംകെ പ്രവര്‍ത്തകന്‍ കെ.പുകഴേന്തി സമര്‍പ്പിച്ച ഹര്‍ജി കോടതി തള്ളി.

സാമൂഹിക സേവന പ്രവര്‍ത്തനങ്ങള്‍ക്കായി ജയലളിതയുടെ പേരില്‍ ട്രസ്റ്റ് രൂപീകരിക്കാനുള്ള സന്നദ്ധത ദീപകും ദീപയും വാദത്തിനിടെ കോടതിയെ അറിയിച്ചു. ഇത് അംഗീകരിച്ച കോടതി, ട്രസ്റ്റിനായി സ്വത്തുക്കളില്‍ ചിലതു മാറ്റിവയ്ക്കണമെന്നു നിര്‍ദേശിച്ചു. ഏതെല്ലാം സ്വത്തെന്നതു തീരുമാനിക്കാന്‍ ദീപക്കിനും ദീപയ്ക്കും വിവേചനാധികാരമുണ്ട്. ട്രസ്റ്റ് രൂപീകരണത്തിനായി കൈക്കൊണ്ട നടപടികള്‍ എട്ടാഴ്ചക്കകം കോടതിയെ അറിയിക്കണം.
പോയസ്ഗാര്‍ഡന്‍ സര്‍ക്കാര്‍ ഏറ്റെടുക്കുകയാണെങ്കില്‍ അതിനു ദീപക്കിന്റെയും ദീപയുടെയും അനുമതി വേണം. അര്‍ഹമായ നഷ്ടപരിഹാരം നല്‍കണം.സ്വകാര്യ സ്വത്ത് സര്‍ക്കാര്‍ വില കൊടുത്തു വാങ്ങാനാരംഭിച്ചാല്‍ അതിനു അവസാനുമുണ്ടാകില്ലെന്നു കോടതി പറഞ്ഞു. നഗര മധ്യത്തില്‍ എല്ലാ സൗകര്യങ്ങളുമുള്ള കെട്ടിടമാണു വേദനിലയം. ഇതു മുഖ്യമന്ത്രിയുടെ ഔദ്യോഗിക വസതിയാക്കുന്നതു പരിഗണിക്കണം. സ്മാരകം കൂടിയേ തീരൂവെന്നാണെങ്കില്‍ ചെറിയൊരു ഭാഗം മാത്രം ഇതിനായി ഉപയോഗിക്കാമെന്നു കോടതി പറഞ്ഞു.

കൊടനാട് എസ്റ്റേറ്റ് ഉള്‍പ്പെടെ ജയലളിതയ്ക്കു ഓഹരി വിഹിതമുള്ള ഒട്ടേറെ സ്വത്തു വകകളില്‍ തോഴി ശശികലയ്ക്കും നിയമപരമായ പങ്കാളിത്തമുണ്ട്. അനധികൃത സ്വത്ത് സമ്പാദനക്കേസില്‍ ശിക്ഷാ കാലാവധി കഴിഞ്ഞു ശശികല അടുത്ത വര്‍ഷം ആദ്യം പുറത്തിറങ്ങുമ്പോള്‍ ജയയുടെ സ്വത്തിനെക്കുറിച്ചുള്ള ചര്‍ച്ചകള്‍ വീണ്ടും ഉയര്‍ന്നുവരും.