ജമ്മു കശ്മീരിലെ പുല്‍വാമയില്‍ ബാരിക്കേഡു തകര്‍ത്തു പോകാന്‍ ശ്രമിച്ച കാര്‍ പിടിച്ചെടുത്ത് സൈന്യം ഇടപെട്ട് നിര്‍വീര്യമാക്കിയതിനാല്‍ ഒഴിവായത് വന്‍ നാശനഷ്ടം ഉണ്ടാക്കുമായിരുന്ന ഐഇഡി സ്‌ഫോടനം. ഇന്റലിജന്‍സ് വിവരത്തെ തുടര്‍ന്നു നടത്തിയ പരിശോധനയിലാണ് 40-45 കിലോ ഐഇഡിയുമായി ചെക്‌പോസ്റ്റിലെത്തിയ വാഹനം സൈന്യത്തിന് പിടിച്ചെടുക്കാന്‍ കഴിഞ്ഞത്. 2019 ഫെബ്രുവരിയില്‍ പുല്‍വാമയില്‍ നടന്ന സ്‌ഫോടനത്തില്‍ ഉപയോഗിച്ചതും ഐഇഡി ആയിരുന്നു.

വ്യാജ റജിസ്‌ട്രേഷന്‍ നമ്പര്‍ നമ്പറുമായി എത്തിയ കാറിനു നേരേ സുരക്ഷാസേന വെടിയുതിര്‍ത്തതിനെ തുടര്‍ന്നു ഡ്രൈവര്‍ ഓടിരക്ഷപ്പെട്ടു. പിടിച്ചെടുത്ത ഐഇഡി ഉള്‍പ്പെട്ട കാര്‍, ബോംബ് സ്‌ക്വാഡ് നിര്‍വീര്യമാക്കി. ഇതിനെത്തുടര്‍ന്നുണ്ടായ നിയന്ത്രിത സ്‌ഫോടനത്തില്‍ പ്രദേശത്തെ നിരവധി വീടുകള്‍ക്കു കേടുപാടു പറ്റി. വലിയ ശബ്ദത്തില്‍, കനത്ത പുക പുറത്തേക്കു വമിപ്പിച്ച്, ചുറ്റിലുമുള്ള മരങ്ങളെയാകെ ഇളക്കിയുള്ള സ്‌ഫോടനത്തിന്റെ വിഡിയോ പുറത്തുവന്നു. താമസക്കാരെ മാറ്റിയ ശേഷമായിരുന്നു നിര്‍വീര്യമാക്കല്‍ സ്‌ഫോടനം.

കഴിഞ്ഞ രണ്ടു മാസമായി കശ്മീര്‍ അതിര്‍ത്തിയില്‍ വീണ്ടും ആക്രമണങ്ങള്‍ നടക്കുന്നുണ്ട്. 30 സുരക്ഷാ ഉദ്യോഗസ്ഥര്‍ക്കാണ് ഭീകരരുമായുള്ള ഏറ്റുമുട്ടലില്‍ ജീവന്‍ നഷ്ടമായത്. 38 ഭീകരരെ സൈന്യം വകവരുത്തി. 2019 ഫെബ്രുവരി 14-ന് പുല്‍വാമയില്‍ ജയ്‌ഷെ മുഹമ്മദ് ഭീകരര്‍ ഐഇഡി ഉപയോഗിച്ചു നടത്തിയ ചാവേറാക്രമണത്തില്‍ 40 സിആര്‍പിഎഫ് ജവാന്മാര്‍ വീരമൃത്യു വരിച്ചിരുന്നു. ഇതിനു പിന്നാലെ പാക്കിസ്ഥാനിലെ ജയ്‌ഷെ ഭീകര ക്യാംപില്‍ ഇന്ത്യ മിന്നലാക്രമണം നടത്തി.