പുല്‍വാമാ രീതിയില്‍ സ്ഫോടനം ആസൂത്രണത്തിനുപയോഗിച്ച കാര്‍ ഹിസ്ബുള്‍ ഭീകരന്റേത്. ജമ്മുകശ്മീര്‍ മേഖലയില്‍ വന്‍ സ്ഫോടനത്തിനായി തയ്യാറാക്കിയ കാര്‍ ഇസ്ലാമിക ഭീകരസംഘടനാ നേതാവിന്റേതെന്ന് സൈന്യം. 2019 പുല്‍വാമ സിആര്‍പിഎഫ് ജവാന്മാരുടെ വാഹനവ്യൂഹത്തിന് നേരെ നടത്തിയ അതേ മാതൃകയില്‍ അക്രമിക്കാനുദ്ദേശിച്ച പദ്ധതിയാണ് സൈന്യം തകര്‍ത്തത്. കഴിഞ്ഞ രണ്ടുവര്‍ഷമായി തെക്കന്‍ കശ്മീരില്‍ സജീവമായി പ്രവര്‍ത്തിക്കുന്ന ഹിദായത്തുള്ള മാലിക് എന്ന ഭീകരന്റേതാണ് കാറെന്നാണ് പ്രാഥമിക വിവരം.

ഷോപ്പിയാന്‍ മേഖലയില്‍ താമസിക്കുന്നയാളാണ് മാലിക്. നിലവില്‍ കശ്മീര്‍ മേഖല പോലീസ് ഐജിയായി പ്രവര്‍ത്തിക്കുന്ന വിജയ കുമാറാണ് ഹിസ്ബുള്‍ ഭീകരന്റെ വിവരങ്ങള്‍ പുറത്തുവിട്ടത്. കശ്മീര്‍ താഴ്വരയില്‍ കണ്ടെത്തിയ കാര്‍ രജിസ്റ്റര്‍ ചെയ്തിരിക്കുന്നത് ജമ്മുമേഖല യിലാണെന്നും സൈന്യം അറിയിച്ചു. തെക്കന്‍ കശ്മീരിലെ വാഹനമാണിതെന്ന് ഇന്നലെത്തന്നെ സൈന്യത്തിന് വിവരം ലഭിച്ചിരുന്നു. വെള്ള നിറത്തിലുള്ള ഒരു സാന്‍ട്രോ കാറാണ് 40 കിലോ ഉഗ്രസ്ഫോടക ശേഷിയുള്ള ബോംബുകള്‍ നിറച്ച് അഞ്ജാത കേന്ദ്രത്തിലേക്ക് കൊണ്ടുപോകാനിരുന്നത്. സ്ഥിരം നിരീക്ഷണത്തിനിറങ്ങിയ സൈനികരാണ് രണ്ടു തവണ ബാരിക്കേഡുകള്‍ വെട്ടിച്ച് കടന്ന കാറിനെ പിന്തുടര്‍ന്നത്. വെടിവച്ചതോടെ ഡ്രൈവര്‍ വാഹനം ഉപേക്ഷിച്ച് രക്ഷപെട്ടു. പുല്‍വാമയിലെ രാജ്പോറാ ഗ്രാമത്തില്‍ ഉപേക്ഷിക്കപ്പെട്ട നിലയില്‍ കണ്ട കാര്‍ സംശയം തോന്നി പരിശോധിച്ചതോടെയാണ് വന്‍ ഭീകരപദ്ധതി പുറത്തുവന്നത്. 2019 ഫെബ്രുവരി 14ന് 40 സി.ആര്‍.പി.എഫ് സൈനികരെ അരുംകൊലചെയ്ത സ്ഫോടനം നടത്തിയതും ഒരു ജീപ്പില്‍ സ്ഫോടകവസ്തുക്കള്‍ നിറച്ചായിരുന്നു.