ഇന്ത്യ ചൈന അതിര്ത്തി പ്രശ്നം രൂക്ഷമായിരിക്കെ ചൈനയ്ക്കെതിരെ കനത്ത പ്രതിഷേധം... റിമൂവ് ചൈന ആപ്സ്' വൈറല്.... ആ ആഹ്വാനം ഏറ്റെടുത്ത് ഇന്ത്യ
ഇന്ത്യ ചൈന അതിര്ത്തി പ്രശ്നം രൂക്ഷമായിരിക്കെ ചൈനയ്ക്കെതിരെ കനത്ത പ്രതിഷേധമാണു രാജ്യമാകെ ഉയരുന്നത്. ചൈനീസ് ഉല്പന്നങ്ങള് ബഹിഷ്കരിക്കണമെന്ന പ്രചാരണം സമൂഹമാധ്യമങ്ങളില് വ്യാപകമായി. ടിക്ടോക് ഉള്പ്പെടെയുള്ള ചൈനീസ് ആപ്പുകള് ഇന്ത്യക്കാര് അണ്ഇന്സ്റ്റാള് ചെയ്യണമെന്നും ആഹ്വാനമുണ്ട്. ഇതിനു പിന്നാലെ ജയ്പുരിലെ ഒരു സ്റ്റാര്ട്ടപ്പ് കമ്പനി പുറത്തിറക്കിയ ആപ് തരംഗമായി.
റിമൂവ് ചൈന ആപ്സ്' എന്ന മൊബൈല് ആപ്ലിക്കേഷനാണു രണ്ടാഴ്ചയ്ക്കുള്ളില് 10 ലക്ഷത്തിലേറെ ഡൗണ്ലോഡുമായി വൈറലായത്. വണ് ടച്ച് ആപ് ലാബ്സ് എന്ന കമ്പനി വികസിപ്പിച്ചെടുത്ത ഈ ആപ് ഉപയോക്താക്കളുടെ ഫോണില് ഇന്സ്റ്റാള് ചെയ്തിരിക്കുന്ന, ചൈനാനിര്മിത അപ്ലിക്കേഷനുകള് കണ്ടെത്തുകയും അവ നീക്കം ചെയ്യുന്നതിനുള്ള യുഐ (യൂസര് ഇന്റര്ഫെയ്സ്) നല്കുകയും ചെയ്യുന്നു. മേയ് 17നാണ് ആപ് ഗൂഗിള് പ്ലേ സ്റ്റോറില് ലഭ്യമായി തുടങ്ങിയത്. നിലവില് പ്ലേ സ്റ്റോറില് ഏറ്റവുമധികം ഡൗണ്ലോഡ് ചെയ്യുന്ന സൗജന്യ ആപ്പുകളില് ഒന്നാണ് ഇത്.
വാങ്ചുക്കയുടെ ആഹ്വാനം
ചൈനീസ് ഉല്പന്നങ്ങള് ബഹിഷ്കരിക്കാന് ഇന്ത്യന് സംരംഭകന് സോനം വാങ്ചുക് കഴിഞ്ഞ ആഴ്ച ആഹ്വാനം ചെയ്തിരുന്നു. ഒരാഴ്ചയ്ക്കുള്ളില് എല്ലാ ചൈനീസ് സോഫ്റ്റ്വെയറുകളും ഒരു വര്ഷത്തിനുള്ളില് ചൈനീസ് ഹാര്ഡ്വെയറുകളും ഒഴിവാക്കണമെന്നാണു മഗ്സസെ അവാര്ഡ് ജേതാവായ വാങ്ചുക് പറഞ്ഞത്. ഒരാഴ്ചയ്ക്കുള്ളില് തന്റെ ചൈനീസ് നിര്മിത ഫോണ് ഉപേക്ഷിക്കുമെന്നും അദ്ദേഹം പറഞ്ഞു.
സൂപ്പര്ഹിറ്റ് ബോളിവുഡ് ചിത്രമായ 'ത്രീ ഇഡിയറ്റ്സില്' ആമിര് ഖാന് അവതരിപ്പിച്ച ഫുന്സുക് വാങ്ഡു എന്ന കഥാപാത്രം സോനം വാങ്ചുകില്നിന്നു പ്രചോദനം ഉള്ക്കൊണ്ടാണു വെള്ളിത്തിരയിലെത്തിയത്. 'നമ്മുടെ സൈനികര് അതിര്ത്തിയില് യുദ്ധം ചെയ്യുന്നു. അതേസമയം നമ്മള് ചൈനീസ് ഹാര്ഡ്വെയറുകള് വാങ്ങുന്നു. ടിക്ടോക് തുടങ്ങിയ സോഫ്റ്റ്വെയറുകള് ഉപയോഗിക്കുന്നു. നമ്മള് അവര്ക്കു നല്കുന്ന കോടികളുടെ വ്യാപാരത്തിലൂടെയാണ് അവര് സൈനികരെ ആയുധസജ്ജരാക്കി നമുക്കെതിരെ പോരാടാന് എത്തിക്കുന്നത്' വാങ്ചുക് പറഞ്ഞു.
ഹിമാലയത്തിന്റെ പശ്ചാത്തലത്തിലുള്ള വിഡിയോ സമൂഹമാധ്യമങ്ങളില് വലിയ പ്രചാരം നേടി. 'ചൈന ഏറ്റവും കൂടുതല് ഭയപ്പെടുന്നത് അവിടുത്തെ ജനങ്ങളെയാണ്. യാതൊരു മനുഷ്യാവകാശങ്ങളും ഇല്ലാതെ സര്ക്കാരിനെ സമ്പന്നരാക്കാനുള്ള തൊഴിലാളികളായാണു ജനങ്ങളെ കാണുന്നത്. കോവിഡിനു ശേഷം ഫാക്ടറികള് പൂട്ടി, കയറ്റുമതി നിലച്ചു. തൊഴിലില്ലായ്മ കുതിച്ചുയരുകയാണ്. ഇന്ത്യയിലെ 130 കോടി ജനങ്ങള് ചൈനീസ് ഉല്പന്നങ്ങള് ഉപേക്ഷിക്കാന് തീരുമാനിച്ചാല് അത് ആഗോളതരംഗമാകും. അത് നമ്മുടെ വ്യവസായത്തിനു നല്ലതാണ്' വാങ്ചുക് പറഞ്ഞു. വാങ്ചുകയുടെ ആഹ്വാനത്തിനു പിന്നാലെ നടനും മോഡലുമായ മിലിന്ദ് സോമന് ടിക്ടോക് ഉപേക്ഷിക്കുന്നതായി അറിയിച്ചിരുന്നു.
https://www.facebook.com/Malayalivartha
