ഇന്ത്യയില്‍ ജനിതകഘടന പരിശോധിച്ച 361 വൈറസ് സാംപിളില്‍ 41 ശതമാനത്തിലുമുള്ളത ഐ/എ3ഐ എന്ന ഗണമാണെന്ന് സിഎസ്‌ഐആര്‍ ശാസ്ത്രജ്ഞര്‍ കണ്ടെത്തി. കോവിഡിനു കാരണമാകുന്ന കൊറോണ വൈറസിന്റെ ഇന്ത്യയിലെ പ്രബലമായ വകഭേദ(ഗണം)മാണിത്.

ഈ വകഭേദത്തിന് ജനിതകമാറ്റം താരതമ്യേന മെല്ലെയെന്നതാണ് ഇപ്പോള്‍ വ്യക്തമായിട്ടുള്ള സവിശേഷത. യൂറോപ്യന്‍ വകഭേദമായ എ2എയ്ക്കു ശരാശരി 7 ദിവസത്തിലൊരിക്കലാണു ജനിതക മാറ്റമെങ്കില്‍ ഐ/എ3ഐയ്ക്ക് 10 ദിവസത്തിലൊരിക്കല്‍ മാത്രം. ഈ കണ്ടെത്തല്‍ വാക്‌സിന്‍ ഗവേഷണത്തില്‍ ഇന്ത്യയ്ക്കു സഹായകരമാകും.

കോവിഡ് ബാധിതരില്‍ 60 ശതമാനത്തോളം പേരിലും കണ്ടെത്തിയത് എ2എ ആണ്. എന്നാല്‍ ഐ/എ3ഐ ഏറ്റവും കൂടുതല്‍ കണ്ടെത്തിയത് ഇന്ത്യയിലായതിനാലാണ് ഇതിനെ ഇന്ത്യന്‍ വകഭേദമായി കരുതുന്നത്. പേരിലെ 'ഐ' ഇന്ത്യയെ സൂചിപ്പിക്കുന്നു. എന്നാല്‍ ഐ/എ3ഐ ഉദ്ഭവിച്ചത് ഇന്ത്യയിലല്ല;

തെലങ്കാനയില്‍ മാര്‍ച്ച് 16-ന് വിദേശിയില്‍ നിന്നു ശേഖരിച്ച സാംപിളിലാണ് ഇത് ഇന്ത്യയില്‍ ആദ്യം കണ്ടെത്തിയത്. തെലങ്കാനയിലും തമിഴ്‌നാട്ടിലും 80% രോഗികളിലും ഡല്‍ഹിയില്‍ 55% പേരിലും ഈ വൈറസാണു കണ്ടെത്തിയത്. മഹാരാഷ്ട്രയിലും വ്യാപകം. കേരളസാംപിളുകളുടെ ജനിതകഘടനാ ശ്രേണീകരണത്തിന് അനുമതിയായിട്ടില്ല.

സിഎസ്‌ഐആറിനു കീഴില്‍ ഡല്‍ഹി ഇന്‍സ്റ്റിറ്റ്യൂട്ട് ഓഫ് ജിനോമിക്‌സ് ആന്‍ഡ് ഇന്റഗ്രേറ്റിവ് ബയോളജി, ഹൈദരാബാദിലെ സെന്റര്‍ ഫോര്‍ സെല്ലുലാര്‍ ആന്‍ഡ് മോളിക്യുലര്‍ ബയോളജി എന്നിവിടങ്ങളിലെ 11 ശാസ്ത്രജ്ഞരുടേതാണു കണ്ടെത്തല്‍. കോഴിക്കോട് സ്വദേശി ഡോ. വിനോദ് സ്‌കറിയയും സംഘത്തിലുണ്ട്.