3 സംസ്ഥാനങ്ങളില്‍ പുതിയ അധ്യക്ഷന്‍മാരെ നിയമിച്ച് ബിജെപി രാഷ്ട്രീയനീക്കങ്ങള്‍ സജീവമാക്കുന്നു. ഡല്‍ഹി ബിജെപി പ്രസിഡന്റ് സ്ഥാനത്തു നിന്ന് മനോജ് തിവാരി എംപിയെ ഒഴിവാക്കി നോര്‍ത്ത് ഡല്‍ഹി മുന്‍ മേയറായ ആദേശ് കുമാര്‍ ഗുപ്തയെ നിയമിച്ചു. പാര്‍ട്ടിയില്‍ , ഗായകനും നടനുമായ മനോജ് തിവാരിക്കെതിരെ അപസ്വരങ്ങളുണ്ടായിരുന്നു.

ഛത്തീസ്ഗഡില്‍ വിക്രം ഉസെന്‍ഡിക്കു പകരം ദലിത് നേതാവ് വിഷ്ണുദേവ് സായിയെ പ്രസിഡന്റായി നിയമിച്ചു. ഒന്നാം മോദി മന്ത്രിസഭയില്‍ ഉരുക്കു സഹമന്ത്രിയായിരുന്നു വിഷ്ണുദേവ്. മണിപ്പുരില്‍ പ്രസിഡന്റായി എസ്. ടികേന്ദ്ര സിങ്ങിനെ നിയമിച്ചു.

ബിഹാറിലും ബംഗാളിലും തെരഞ്ഞെടുപ്പു നടക്കാനിരിക്കേ അടുത്തയാഴ്ച പാര്‍ട്ടി വെര്‍ച്വല്‍ റാലികള്‍ സംഘടിപ്പിക്കും. കേന്ദ്ര ആഭ്യന്തര മന്ത്രി അമിത്ഷാ 8-ന് ബംഗാളിലെയും 9-ന് ബിഹാറിലെയും പ്രവര്‍ത്തകരെ അഭിസംബോധന ചെയ്യും. ഒരു ലക്ഷം പേരെങ്കിലും ബിഹാറിലെ റാലി ഫെയ്‌സ്ബുക് ലൈവിലൂടെയും വിഡിയോ കോണ്‍ഫറന്‍സിങ്ങിലൂടെയും കാണത്തക്ക വിധത്തിലാണ് തയാറെടുപ്പുകള്‍. ഈ മാസം 6-നും 23-നും ഇടയ്ക്കു ബിഹാറിലെ 243 അസംബ്ലി മണ്ഡലങ്ങളിലും ഓരോ റാലി വീതം സംഘടിപ്പിക്കാനാണു ശ്രമം.

അതിനിടെ, പൗരത്വ ഭേദഗതി നിയമം പാസാക്കിയതു മുതല്‍ ബിജെപിക്കു തലവേദനയുണ്ടാക്കുന്ന പ്രസ്താവനകള്‍ നടത്തിയിരുന്ന നേതാജി സുഭാഷ് ചന്ദ്രബോസിന്റെ സഹോദരന്റെ പൗത്രന്‍ ചന്ദ്രകുമാര്‍ ബോസിനെ ബംഗാള്‍ ബിജെപി വൈസ് പ്രസിഡന്റ് സ്ഥാനത്തു നിന്നൊഴിവാക്കി. ബോസിനെ ഒഴിവാക്കി സംസ്ഥാന ഘടകം പുനഃസംഘടിപ്പിച്ചു.

അടുത്ത വര്‍ഷം നടക്കാനിരിക്കുന്ന നിയമസഭാ തിരഞ്ഞെടുപ്പു ലക്ഷ്യമിട്ടാണു പുതിയ നേതൃനിരയെന്നു സംസ്ഥാന പ്രസിഡന്റ് ദിലീപ് ഘോഷ് പറഞ്ഞു. തൃണമൂല്‍ കോണ്‍ഗ്രസ് വിട്ടെത്തിയ അര്‍ജുന്‍സിങ്, സിപിഎം വിട്ടെത്തിയ മഫൂസ ഖാത്തൂന്‍ തുടങ്ങിയവരെ വൈസ് പ്രസിഡന്റുമാരാക്കി. സിപി എമ്മില്‍നിന്നു രാജിവച്ചെത്തി എംപിയായ ഖഗേന്‍ മുര്‍മുവാണ് എസ്ടി മോര്‍ച്ച പ്രസിഡന്റ്.

നേതാജിയുടെ സഹോദരന്‍ ശരത്ചന്ദ്ര ബോസിന്റെ മകന്‍ അമിയനാഥിന്റെ മകനാണ് ചന്ദ്രകുമാര്‍ ബോസ്. നേതാജിയുടെ പാതയിലാണു മുന്നോട്ടുപോകുന്നതെന്നും അതിനെതിരായ നിലപാടുകള്‍ കണ്ടാല്‍ പ്രതികരിക്കുമെന്നും ചന്ദ്രകുമാര്‍ ബോസ് പറഞ്ഞു.