ഇന്ത്യയെ സഹായിക്കാമെന്ന വാഗ്ദാനം നിറവേറ്റാന്‍ ട്രംപ്. യുഎസ്സില്‍ നിന്നുള്ള ആദ്യ ബാച്ച് വെന്റിലേറ്ററുകള്‍ അടുത്തയാഴ്ച്ച ഇന്ത്യയിലെത്തും. 100 വെന്റിലേറ്ററുകളാണ് ആദ്യഘട്ടത്തില്‍ എത്തുന്നതെന്ന് വൈറ്റ് ഹൗസ് അറിയിച്ചു. ഇത് സംബന്ധിച്ച് പ്രധാനമന്ത്രി മോദിയും യുഎസ് പ്രസിഡന്റ് ട്രംപും ഫോണിലൂടെ ആശയവിനിമയം നടത്തിയിട്ടുണ്ട്. കൂടാതെ ജി-7 ഉച്ചകോടിയെക്കുറിച്ചും കോവിഡ് സ്ഥിതിഗതികളെക്കുറിച്ചും സുരക്ഷാവിഷയങ്ങളെക്കുറിച്ചും ഇരുനേതാക്കളും ചര്‍ച്ച നടത്തിയെന്നും വൈറ്റ് ഹൗസ് പ്രസ്താവനയില്‍ വ്യക്തമാക്കി.

കോവിഡ് പ്രതിരോധത്തിനായി ഇന്ത്യയ്ക്ക് ആവശ്യമായ വെന്റിലേറ്ററുകള്‍ നല്‍കുമെന്ന് ട്രംപ് മെയ് മാസം ആദ്യവാരത്തില്‍ പ്രഖ്യാപിച്ചിരുന്നു. കോവിഡ് ചികിത്സയ്ക്കായി ഇന്ത്യ നല്‍കിയ ഹൈഡ്രോക്‌സിക്ലോറോക്വിന്‍ ഗുളികകള്‍ക്ക് പകരമായല്ല വെന്റിലേറ്ററുകള്‍ അയക്കുന്നത്, യുഎസ് മാര്‍ക്കറ്റില്‍ ആവശ്യത്തിന് ഉപകരണങ്ങള്‍ ഉണ്ടെന്ന് ഉറപ്പാക്കിയതിനുശേഷമാണ് വെന്റിലേറ്ററുകള്‍ നല്‍കുന്നത്. ഇത് ഇരുരാഷ്ട്രങ്ങളും തമ്മിലുള്ള പരസ്പരസഹകരണത്തിന്റെ ഭാഗമാണെന്നും ട്രംപ് വിശദീകരിച്ചിരുന്നു.

ലോകത്ത് കോവിഡ് ബാധ രൂക്ഷമായ ഏഴാമത്തെ രാഷ്ട്രമാണ് ഇന്ത്യ. രണ്ട് ലക്ഷത്തിലധികം കോവിഡ് കേസുകളാണ് രാജ്യത്ത് ഇതുവരെ റിപ്പോര്‍ട്ട് ചെയ്തത്. അമേരിക്കന്‍ പ്രസിഡന്റ് ഡൊണാള്‍ഡ് ട്രംപുമായി ചര്‍ച്ച നടത്തി പ്രധാനമന്ത്രി നരേന്ദ്ര മോദി. കൊറോണ വൈറസിനെ നേരിടുന്നതിനുള്ള പദ്ധതികള്‍ ഇരുനേതാക്കളും ചര്‍ച്ച ചെയ്തു. അതേസമയം, ജി-7 ഉച്ചകോടിയിലേക്ക് മോദിയെ ട്രംപ് സ്വാഗതം ചെയ്തു. ടെലിഫോണിലൂടെയാണ് നേതാക്കള്‍ ചര്‍ച്ച നടത്തിയത്.

ഉച്ചകോടിയുടെ വിജയത്തിനായി അമേരിക്കയുള്‍പ്പെടെയുള്ള ലോകരാജ്യങ്ങള്‍ക്കൊപ്പം പ്രവര്‍ത്തിക്കുന്നതില്‍ സന്തോഷമുണ്ടെന്ന് മോദി പറഞ്ഞു. ആഭ്യന്തര സംഘര്‍ഷമുള്‍പ്പെടെ അമേരിക്കയിലെ സ്ഥിതിഗതികളില്‍ ആശങ്ക അറിയിച്ച പ്രധാനമന്ത്രി കാര്യങ്ങള്‍ എത്രയും പെട്ടെന്ന് സാധാനരണ നിലയിലാകട്ടെ എന്നും ആശംസിച്ചു. അതേസമയം, കഴിഞ്ഞ ഫെബ്രുവരിയിലെ തന്റെ ഇന്ത്യ സന്ദര്‍ശനം വളരെ മികച്ച ഓര്‍മ്മയാണെന്ന് ട്രംപ് പറഞ്ഞു. ട്രംപിന്റെ സന്ദര്‍ശനത്തോടെ ഇന്ത്യയും അമേരിക്കയും തമ്മിലുള്ള ബന്ധം ശക്തിപ്പെട്ടെന്ന് മോദിയും അഭിപ്രായപ്പെട്ടു.