രാജ്യസഭാ തിരഞ്ഞെടുപ്പിനുള്ള സ്ഥാനാര്ഥികളെ കേന്ദ്രനേതൃത്വം പ്രഖ്യാപിച്ചു; യെദിയൂരപ്പയുടെ ആവശ്യം തള്ളി
രാജ്യസഭാ തിരഞ്ഞെടുപ്പിനുള്ള സ്ഥാനാര്ഥികളെ കേന്ദ്രനേതൃത്വം പ്രഖ്യാപിച്ചതോടെ ബി.ജെ.പി. കര്ണാടക ഘടകം ഞെട്ടി. സംസ്ഥാന നേതൃത്വം നിര്ദേശിച്ച പേരുകള് തള്ളി ബെലഗാവിയില് നിന്നുള്ള ഈരണ്ണ കഡദി, റായ്ച്ചൂരില്നിന്നുള്ള അശോക് ഗസ്തി എന്നിവരെയാണ് കേന്ദ്രനേതൃത്വം സ്ഥാനാര്ഥികളാക്കിയത്. ഈരണ്ണ ലിംഗായത്ത് നേതാവും ബി.ജെ.പി. ബെലഗാവി ജില്ലാ മുന് അധ്യക്ഷനുമാണ്. അശോക് ഗസ്തി ബി.ജെ.പി.യിലെ പിന്നാക്കവിഭാഗനേതാവാണ്.
കേന്ദ്രം നിശ്ചയിച്ച സ്ഥാനാര്ഥികളിലൊരാളായ ഈരണ്ണ കഡദി കുറച്ചു ദിവസങ്ങള്ക്ക് മുമ്പ് യെദിയൂരപ്പയുമായി കൂടിക്കാഴ്ച നടത്തിയിരുന്നു. പാര്ട്ടിയിലെ തന്റെ സംഭാവനകള് പരിഗണിച്ച് സംസ്ഥാന സര്ക്കാരിന്റെ കീഴിലുള്ള ബോര്ഡുകളിലേതിലെങ്കിലും ചെയര്മാന് സ്ഥാനം നല്കണമെന്നാവശ്യപ്പെട്ടായിരുന്നു കൂടിക്കാഴ്ച. എന്നാല് ഇക്കാര്യത്തില് സര്ക്കാര് തീരുമാനമെടുത്തിരുന്നില്ല. ഇതിനിടെയാണ് അപ്രതീക്ഷിതമായി കേന്ദ്രനേതൃത്വത്തിന്റെ തീരുമാനം വരുന്നതെന്നതാണ് ശ്രദ്ധേയം. പാര്ട്ടി സംസ്ഥാന അധ്യക്ഷന് നളിന്കുമാര് കട്ടീല്, മുഖ്യമന്ത്രി ബി.എസ്. യെദിയൂരപ്പ എന്നിവര് അംഗീകരിച്ച പട്ടികയിലെ ആരെയും കേന്ദ്രനേതൃത്വം പരിഗണിച്ചില്ല എന്ന കാര്യം ശ്രദ്ധേയം . മുതിര്ന്ന നേതാക്കളായ പ്രകാശ് ഷെട്ടി, പ്രഭാകര് കോറ, രമേശ് കട്ടി എന്നിവരെയാണ് സംസ്ഥാനനേതൃത്വം നിര്ദേശിച്ചത്. മൂന്നുപേരെയും തള്ളിയാണ് കേന്ദ്രനേതൃത്വം അപ്രതീക്ഷിതമായി സ്ഥാനാര്ഥികളെ പ്രഖ്യാപിച്ചത്. നാമനിര്ദ്ദേശ പത്രിക സമര്പ്പിക്കാനുള്ള സമയം കഴിയാനിരിക്കെയാണ് കേന്ദ്രത്തിന്റെ ഇത്തരത്തിലുള്ള നീക്കം. ഇത് വരുംദിവസങ്ങളില് പാര്ട്ടിക്കുള്ളില് വിഭാഗീയത രൂക്ഷമാക്കിയേക്കും.
https://www.facebook.com/Malayalivartha
