കോവിഡ് വ്യാപനത്തിന്റെ പശ്ചാത്തലത്തില്‍ തമിഴ്നാട്ടിലും പുതുച്ചേരിയിലും പത്താംക്ലാസ് പരീക്ഷ റദ്ദാക്കി. എല്ലാ വിദ്യാര്‍ഥികളും വിജയിച്ചതായി പ്രഖ്യാപിച്ചു. ഇരു സംസ്ഥാനത്തും ഒമ്പതാം ക്ലാസുവരെ എല്ലാവരെയും വിജയിപ്പിക്കാന്‍ മുമ്പ് തീരുമാനിച്ചിരുന്നു. തമിഴ്നാട്ടില്‍ എസ്.എസ്.എല്‍.സി.യ്‌ക്കൊപ്പം പ്ലസ് വണ്‍ പരീക്ഷയും റദ്ദാക്കിയിട്ടുണ്ട്. ഇവിടെ പ്ലസ് വണ്‍ ക്ലാസിലും പൊതുപരീക്ഷയുണ്ടായിരുന്നു. പ്ലസ്ടു പരീക്ഷ സാഹചര്യം അനുകൂലമാകുന്നതനുസരിച്ച് നടത്തുമെന്ന് മുഖ്യമന്ത്രി എടപ്പാടി പളനിസ്വാമി അറിയിച്ചു. പരീക്ഷ നടത്തുന്നില്ലെങ്കിലും എസ്.എസ്.എല്‍.സി.യ്ക്ക് മാര്‍ക്ക് നല്‍കാന്‍ തമിഴ്നാട് സര്‍ക്കാര്‍ തീരുമാനിച്ചിട്ടുണ്ട്.

ആകെ മാര്‍ക്കിന്റെ 80 ശതമാനം സ്‌കൂളുകളില്‍ നടത്തിയ പാദവാര്‍ഷിക, അര്‍ധവാര്‍ഷിക പരീക്ഷകളില്‍ നേടിയ മാര്‍ക്കിന്റെ അടിസ്ഥാനത്തിനും ബാക്കി 20 ശതമാനം ഹാജര്‍ അടിസ്ഥാനത്തിലും നല്‍കും. സംസ്ഥാനത്ത് കോവിഡ് വ്യാപനം സമീപഭാവിയില്‍ കുറയില്ലെന്ന വിദഗ്ധ അഭിപ്രായം പരിഗണിച്ചാണ് പരീക്ഷ ഉപേക്ഷിക്കുന്നതെന്ന് പളനിസ്വാമി വിശദീകരിച്ചു. പരീക്ഷ റദ്ദാക്കണമെന്നാവശ്യപ്പെട്ട് മദ്രാസ് ഹൈക്കോടതില്‍ സമര്‍പ്പിച്ചിട്ടുള്ള പൊതുതാത്പര്യ ഹര്‍ജികളെക്കുറിച്ചും അദ്ദേഹം സൂചിപ്പിച്ചു. മാര്‍ച്ച് 27-ന് ആരംഭിക്കാനിരുന്ന എസ്.എസ്.എല്‍.സി. പരീക്ഷ കോവിഡിന്റെ പശ്ചാത്തലത്തില്‍ ആദ്യം ജൂണ്‍ ഒന്നിലേക്ക് മാറ്റിവെച്ചിരുന്നു.

പിന്നീട് ജൂണ്‍ 15-ലേക്ക് മാറ്റി. ഇതിനായി ഹാള്‍ടിക്കറ്റ് വിതരണവും ആരംഭിച്ചിരുന്നു. കോവിഡ് വ്യാപന മേഖലയില്‍നിന്നുള്ള വിദ്യാര്‍ഥികളെ പ്രത്യേക ഹാളില്‍ ഇരുത്തുന്നത് അടക്കമുള്ള ക്രമീകരണങ്ങളോടെ പരീക്ഷ നടത്താനായിരുന്നു പദ്ധതി. എന്നാല്‍, പരീക്ഷ നടത്തുന്നതിനെതിരേ സമര്‍പ്പിച്ച ഹര്‍ജികള്‍ പരിഗണിച്ച ഹൈക്കോടതി കഴിഞ്ഞദിവസം സര്‍ക്കാരിനെ രൂക്ഷമായി വിമര്‍ശിച്ചു. മദ്യശാലകള്‍ തുറക്കുന്നതു പോലെയല്ല വിദ്യാര്‍ഥികള്‍ക്ക് പരീക്ഷ നടത്തുന്നതെന്ന് അഭിപ്രായപ്പെട്ട കോടതി ലക്ഷക്കണക്കിന് വിദ്യാര്‍ഥികള്‍ക്കും അധ്യാപകര്‍ക്കും പോലീസുകാര്‍ക്കും ബുദ്ധിമുട്ടുണ്ടാക്കി പരീക്ഷ നടത്തേണ്ടതിന്റെ ആവശ്യകതയെയും ചോദ്യംചെയ്തു. പരീക്ഷ നടത്തുന്നതിനുള്ള നടപടികളുടെ വിശദമായ റിപ്പോര്‍ട്ട് ആവശ്യപ്പെട്ട കോടതി ഹര്‍ജികള്‍ വ്യാഴാഴ്ച വീണ്ടും പരിഗണിക്കാന്‍ മാറ്റിവെച്ചിരിക്കുകയായിരുന്നു.

കോവിഡ് വ്യാപനം കൂടുതല്‍ രൂക്ഷമാകാന്‍ സാധ്യതയുള്ളതിനാല്‍ അതിനുമുമ്പ് പരീക്ഷ നടത്തണമെന്ന് കോടതിയില്‍ വാദിച്ച സര്‍ക്കാര്‍ അടുത്തദിവസംതന്നെ നിലപാട് മാറ്റുകയും പരീക്ഷ റദ്ദാക്കുകയുമായിരുന്നു. കേന്ദ്രഭരണ പ്രദേശമായ പുതുച്ചേരിയില്‍ തമിഴ്നാട്ടിലെ അതേ സിലബസാണ് പിന്തുടരുന്നത്. തമിഴ്നാട് പത്താംക്ലാസ് പരീക്ഷ റദ്ദാക്കിയതിന് പിന്നാലെ പുതുച്ചേരി സര്‍ക്കാരും ഇതേ തീരുമാനമെടുക്കുകയായിരുന്നു.