ഡല്‍ഹിയില്‍ തുടര്‍ച്ചയായ എട്ടാം ദിവസവും ആയിരത്തിലേറെ പുതിയ കേസുകള്‍ റിപ്പോര്‍ട്ടു ചെയ്തു. കഴിഞ്ഞ പത്ത് ദിവസത്തിനിടെ 11,465 പുതിയ രോഗികളും 489 മരണവുമുണ്ടായി. ഫരീദബാദ് ഏഷ്യന്‍ ആശുപത്രിയില്‍ ഒരു മലയാളി കൂടി മരിച്ചു. ഡല്‍ഹി ശ്രീനിവാസ്പുരി നിവാസിയായ പി.ഡി. വര്‍ഗീസ് (52) ആണ് മരിച്ചത്.

ഡല്‍ഹിക്ക് പുറത്ത് നിന്നുള്ളവര്‍ക്കും ചികിത്സ നല്‍കണമെന്ന ലഫ്.ഗവര്‍ണറുടെ തീരുമാനം നടപ്പിലാക്കുമെന്നും പ്രതിസന്ധി മറികടക്കാന്‍ കേന്ദ്ര സര്‍ക്കാരുമായി ഒത്തൊരുമിച്ച് പ്രവര്‍ത്തിക്കുമെന്നും കേജ്‌രിവാള്‍ അറിയിച്ചു. അതീവ ഗുരുതരമായ അവസ്ഥയിലൂടെയാണ് ഡല്‍ഹി കടന്നുപോകുന്നതെന്ന് മുഖ്യമന്ത്രി അരവിന്ദ് കേജ്‌രിവാള്‍ പറഞ്ഞു.

ബുധനാഴ്ച മഹാരാഷ്ട്രയില്‍ 149 മരണങ്ങളാണ് റിപ്പോര്‍ട്ട് ചെയ്തത്. സംസ്ഥാനത്ത് ആകെ 3438 പേരാണ് ഇതുവരെ മരിച്ചത്. 3,254 പേര്‍ക്ക് പുതുതായി രോഗം ബാധിച്ചു. ഇതോടെ സംസ്ഥാനത്തെ ആകെ രോഗികളുടെ എണ്ണം 94,041 ആയി ഉയര്‍ന്നു. 1879 പേര്‍ കൂടി ബുധനാഴ്ച രോഗമുക്തരായെന്നും സംസ്ഥാന ആരോഗ്യ വകുപ്പ് അറിയിച്ചു.

ഇന്ത്യില്‍ കോവിഡ് രോഗികളുടെ എണ്ണം 2.75 ലക്ഷം കടന്നു. തുടര്‍ച്ചയായ ഏഴാം ദിവസമാണ് രാജ്യത്ത് ഒമ്പതിനായിരത്തിലധികം പേര്‍ക്ക് രോഗം ബാധിക്കുന്നത്. ഇതോടെ ആകെ രോഗബാധിതരുടെ എണ്ണം 2,76,583 ആയി. എന്നാല്‍ രോഗം ഭേദമാകുന്നവരുടെ എണ്ണം ചികിത്സയിലുള്ളവരുടെ എണ്ണത്തെ മറികടന്നത് ആശ്വാസകരമാണ്. 1,35,206 പേര്‍ക്ക് രോഗം മാറിയപ്പോള്‍ 1,33,632 പേര്‍ മാത്രമാണ് ചികിത്സയിലുള്ളത്. ആകെ രോഗികളില്‍ 86 ശതമാനത്തിനും രോഗം ബാധിച്ചതും കഴിഞ്ഞ നാല്‍പത് ദിവസത്തിനിടെയാണ്.