ഉത്തര്‍പ്രദേശ് മുഖമന്ത്രി യോഗി ആദിത്യനാഥ് പ്രഖ്യാപിച്ചതുപോലെ ഹൈദരാബാദ് ഭാഗ്യനഗര്‍ ആകുമോ അതോ ഹൈദരാബാദായി തന്നെ തുടരുമോ എന്ന് നാളെ അറിയാം. നിര്‍ണായകമായ ഹൈദരാബാദ് കോര്‍പ്പറേഷന്‍ തിരഞ്ഞെടുപ്പില്‍ വോട്ടെണ്ണലിനായി ഒരുക്കങ്ങള്‍ പൂര്‍ത്തിയായി. നഗരത്തില്‍ സുരക്ഷ ശക്തമാക്കിയെന്നും അധികൃതര്‍ അറിയിച്ചു. നാളെ രാവിലെ വോട്ടെണ്ണല്‍ തുടങ്ങും. ഒരു കോര്‍പ്പറേഷന്‍ തിരഞ്ഞെടുപ്പില്‍ തങ്ങളുടെ മുഴുവന്‍ സന്നാഹങ്ങളും ഇറക്കിയാണ് ബി.ജെ.പി മത്സരച്ചത്. ഇത് വലിയ ചര്‍ച്ചയാകുകയും ചെയ്തു. ബിജെപി കേന്ദ്രനേതാക്കളുടെ പടതന്നെ പ്രചാരണത്തിനിറങ്ങി ദേശീയ ശ്രദ്ധയാകര്‍ഷിച്ച ഗ്രേറ്റര്‍ ഹൈദരാബാദ് മുനിസിപ്പല്‍ കോര്‍പ്പറേഷന്‍ തിരഞ്ഞെടുപ്പിലാണ് നാളെ വോട്ടെണ്ണല്‍ നടക്കുക. സംസ്ഥാനം രൂപീകരിച്ചത് മുതല്‍ തുടരുന്ന ടിആര്‍എസ് ആധിപത്യം ഇത്തവണ തകരുമോ, അതോ ബിജെപി പ്രചാരണ കോലാഹലത്തിലൊതുങ്ങുമോ എന്ന് നാളെ അറിയാം.

നഗരത്തിലാകെ 15 കേന്ദ്രങ്ങളിലായി രാവിലെമുതല്‍ വോട്ടെണ്ണല്‍ തുടങ്ങും. സിആര്‍പിഎഫിനെയും പോലീസിനെയും വിന്യസിച്ച് നഗരത്തില്‍ സുരക്ഷ കര്‍ശനമാക്കിയിട്ടുണ്ട്. 46.6 ശതമാനം പോളിംഗാണ് ഇത്തവണ രേഖപ്പെടുത്തിയത്. പോളിംഗ് കുറയാന്‍ കാരണം ടിആര്‍എസാണെന്ന് ബിജെപി ആരോപിച്ചു. എഐഎംഐഎം പ്രവര്‍ത്തകര്‍ തെരഞ്ഞെടുപ്പ് ഉദ്യോഗസ്ഥരെ ഭീഷണിപ്പെടുത്തിയെന്നും രണ്ട് വാര്‍ഡുകളില്‍ റീപോളിംഗ് വേണമെന്നും ആവശ്യപ്പെടുന്നു.

കോവിഡ് പശ്ചാത്തലത്തില്‍ ഇലക്ട്രോണിക് വോട്ടിംഗ് മെഷീനുപകരം ബാലറ്റ് പേപ്പറാണ് വോട്ടിംഗിനായി ഉപയോഗിച്ചത്. അതിനാല്‍ ഔദ്യോഗിക ഫല പ്രഖ്യാപനം വൈകിയേക്കും. എന്നാലും ഉച്ചയോടെ നഗരം ആര്‍ക്കൊപ്പമെന്ന് വ്യക്തമാകും. അതേസമയം വോട്ടെണ്ണല്‍ ദിനത്തില്‍ ജാഗ്രത പാലിക്കാന്‍ വര്‍ക്കിംഗ് പ്രസിഡന്റ് കെടി രാമറാവു ടിആര്‍എസ് പ്രവര്‍ത്തകര്‍ക്ക് നിര്‍ദേശം നല്‍കി. ആകെയുള്ള 150 വാര്‍ഡുകളില്‍ 100 വാര്‍ഡിലും ടിആര്‍എസ് ബിജെപി നേര്‍ക്കുനേര്‍ പോരാട്ടമാണ്. എഐഎംഐഎം 51 സീറ്റുകളിലേ മത്സരിക്കുന്നുള്ളൂ.