മേയ് 7ന് തമിഴ്‌നാട് മുഖ്യമന്ത്രിയായി തമിഴക വെട്രി കഴകം അധ്യക്ഷന്‍ വിജയ് സത്യപ്രതിജ്ഞ ചെയ്‌തേക്കുമെന്ന് റിപ്പോര്‍ട്ട്. അതിനിടെ സര്‍ക്കാര്‍ രൂപീകരിക്കാന്‍ ക്ഷണം ആവശ്യപ്പെട്ട് വിജയ് ഗവര്‍ണര്‍ രാജേന്ദ്ര അര്‍ലേക്കര്‍ക്ക് കത്തയച്ചു. രാജ്ഭവന് ഇമെയിലായിട്ടാണ് വിജയ് കത്തയച്ചത്. രണ്ടാഴചയ്ക്കുള്ളില്‍ കേവല ഭൂരിപക്ഷം ഉറപ്പാക്കുമെന്നാണ് കത്തിലുള്ളത്.

തമിഴ്‌നാട് നിയമസഭാ തിരഞ്ഞെടുപ്പില്‍ കന്നിയങ്കത്തില്‍ വിജയ്‌യുടെ പാര്‍ട്ടിയായ ടിവികെ നേടിയത് 107 സീറ്റുകളാണ്. 234 അംഗ നിയമസഭയില്‍ കേവല ഭൂരിപക്ഷത്തിനായി 11 എംഎല്‍എമാരുടെ പിന്തുണ കൂടി വേണം. ജവഹര്‍ലാല്‍ നെഹ്‌റു ഇന്‍ഡോര്‍ സ്‌റ്റേഡിയത്തില്‍ വച്ചായിരിക്കും സത്യപ്രതിജ്ഞാ ചടങ്ങുകള്‍ നടക്കുകയെന്നാണു വാര്‍ത്താ ഏജന്‍സിയായ എഎന്‍ഐ റിപ്പോര്‍ട്ട് ചെയ്യുന്നത്.

നിയുക്ത എംഎല്‍എമാര്‍ക്കായി വിളിച്ചുചേര്‍ത്ത യോഗത്തില്‍ വിജയ് ഇന്ന് അധ്യക്ഷത വഹിച്ചിരുന്നു. പാര്‍ട്ടി ആസ്ഥാനത്ത് നിയുക്ത എംഎല്‍എമാരും മറ്റ് അംഗങ്ങളും ചേര്‍ന്ന് വിജയ്ക്ക് ഊഷ്മള സ്വീകരണം ഒരുക്കിരുന്നു. നിയമസഭാ കക്ഷി നേതാവിനെ തിരഞ്ഞെടുക്കുന്നതിനെക്കുറിച്ചും നിയമസഭയിലെ പാര്‍ട്ടി തന്ത്രങ്ങളെക്കുറിച്ചും യോഗത്തില്‍ വിജയ് ചര്‍ച്ച ചെയ്തതായി എംഎല്‍എമാരില്‍ ഒരാള്‍ പറഞ്ഞു. കേവല ഭൂരിപക്ഷം വിജയ് നേടുമെന്നും ഉടന്‍ തന്നെ നല്ല വാര്‍ത്തകള്‍ പ്രതീക്ഷിക്കാമെന്നും ടിവികെ നേതാവ് നഞ്ചില്‍ സമ്പത്ത് പറഞ്ഞു.

സര്‍ക്കാര്‍ രൂപീകരിക്കാന്‍ അവകാശവാദം ഉന്നയിക്കാനും പിന്നീട് വിശ്വാസ വോട്ടെടുപ്പ് തേടാനുമാണു ടിവികെയുടെ തീരുമാനമെന്നാണു വിവരം. മത്സരിച്ചു വിജയിച്ച മണ്ഡലങ്ങളിലൊന്നായ പെരമ്പൂര്‍ നിലനിര്‍ത്തി തിരുച്ചിറപ്പള്ളി ഈസ്റ്റ് നിലനിര്‍ത്താനാണു വിജയ്‌യുടെ തീരുമാനമെന്നാണു വിവരം.