എപ്പോഴും പ്രവചനാതീതമാണ് തമിഴ് രാഷ്ട്രീയം . വിജയ്‌യുടെ ടി വി കെ വിജയം എല്ലാവരെയും ഏറെ ഞെട്ടിച്ചു . ഇപ്പോഴിതാ തമിഴ്നാട് ബിജെപി മുൻ അധ്യക്ഷൻ കെ. അണ്ണാമലൈ പാർട്ടി വിടുന്നു. ചൊവ്വാഴ്ച ബിജെപി ദേശീയ അധ്യക്ഷൻ നിതിൻ നബിനുമായി നടത്തിയ കൂടിക്കാഴ്ചയിൽ അദ്ദേഹം രാജി സമർപ്പിച്ചു. ബിജെപി നേതൃത്വവുമായി നടത്തിയ കൂടിക്കാഴ്ചയിൽ മാന്യമായ രീതിയിൽ പാർട്ടിയുമായുള്ള ബന്ധം വേർപെടുത്താനുള്ള താൽപ്പര്യം അദ്ദേഹം അറിയിച്ചതായി പാർട്ടിയോട് അടുത്ത വൃത്തങ്ങൾ വ്യക്തമാക്കി.

പാർട്ടിയുടെ ഭാഗത്തുനിന്ന് രാജ്യസഭാ സീറ്റ് വാഗ്ദാനം ചെയ്‌തെങ്കിലും അണ്ണാമലൈ അത് നിരസിച്ചതായാണ് സൂചന. വൈകുന്നേരം നാലു മണിക്ക് അദ്ദേഹം കേന്ദ്ര ആഭ്യന്തരമന്ത്രി അമിത് ഷായുമായി കൂടിക്കാഴ്ച നടത്തും. തമിഴ്‌നാട് ബിജെപി അധ്യക്ഷ സ്ഥാനത്തുനിന്ന് അദ്ദേഹത്തെ മാറ്റുകയും പുതിയ അധ്യക്ഷനായി നൈനാർ നാഗേന്ദ്രൻ ചുമതലയേൽക്കുകയും ചെയ്തശേഷം അണ്ണാമലൈ പൊതുവേദികളിൽ സജീവമായിരുന്നില്ല.പുതിയ പാർട്ടി പ്രഖ്യാപനത്തെപ്പറ്റിയുള്ള ചോദ്യത്തിന് ‘ദയവായി കാത്തിരിക്കുക,

രണ്ടു ദിവസത്തിനുള്ളിൽ നമുക്ക് സംസാരിക്കാം’ എന്നാണ് കഴിഞ്ഞ ദിവസം അദ്ദേഹം പ്രതികരിച്ചത്. 2026 നിയമസഭാ തെരഞ്ഞെടുപ്പിന് മുന്നോടിയായി തമിഴ്നാട് ബിജെപി അധ്യക്ഷ സ്ഥാനത്തുനിന്ന് മാറ്റി നൈനാർ നാഗേന്ദ്രനെ നിയമിച്ചതാണ് അണ്ണാമലയുടെ എതിർപ്പിന് കാരണമായത്. തെരഞ്ഞെടുപ്പിൽ അണ്ണാമലൈയ്ക്ക് വലിയ പ്രാധാന്യം നൽകുകയും ചെയ്തില്ല. എന്നിട്ടും പ്രചാരണങ്ങളിൽ അദ്ദേഹം സജീവമായിരുന്നു.