ഡൽഹിയിലെ റസ്റ്റോറന്റിലുണ്ടായ വൻ തീപ്പിടിത്തത്തിൽ പത്തുപേർ മരിച്ചതായി റിപ്പോർട്ട്. ഡൽഹി മാളവ്യ നഗറിലെ 'ലെമൺ ഗ്രീൻ റസ്റ്ററന്റി'ലാണ് തീപ്പിടിത്തം സംഭവിച്ചത്. അപകടത്തിൽ 11 പേർക്ക് പൊള്ളലേറ്റിട്ടുണ്ട്. ഇവരെ ആശുപത്രിയിൽ പ്രവേശിപ്പിച്ചിരിക്കുകയാണ്.

ബുധനാഴ്ച രാവിലെ 8.50-ഓടെയാണ് ഒന്നിലേറെ നിലകളുള്ള ലെമൺ ഗ്രീൻ റസ്റ്ററന്റിൽ തീപ്പിടിത്തമുണ്ടായതെന്നാണ് സൂചന. അതേസമയം, 9.45-ഓടെയാണ് തീപ്പിടിത്തത്തെക്കുറിച്ച് വിവരം ലഭിച്ചതെന്ന് ഡൽഹി ഫയർ സർവീസ് അധികൃതരും പറഞ്ഞു.

വിവരമറിഞ്ഞ ഉടൻ തന്നെ നെഹ്‌റു പ്ലേസ് ഫയർ സ്റ്റേഷനിൽ നിന്നുള്ള സംഘം സ്ഥലത്തെത്തി രക്ഷാപ്രവർത്തനം തുടങ്ങി. പിന്നീട് ഫയർ സർവീസിന്റെ കൂടുതൽ യൂണിറ്റുകളും സ്ഥലത്തെത്തി. മണിക്കൂറുകൾക്കുള്ളിൽ തീ പൂർണമായും നിയന്ത്രണവിധേയമാക്കി.

ഇതിനുപിന്നാലെ റസ്റ്റോറന്റിനകത്ത് നടത്തിയ പരിശോധനയിലാണ് പത്തുപേരുടെ മൃതദേഹങ്ങൾ കണ്ടെത്തിയത്. പരിക്കേറ്റനിലയിൽ കണ്ടെത്തിയ മറ്റുള്ളവരെ ഉടൻ തന്നെ ആശുപത്രിയിലേക്ക് മാറ്റിയതായും സ്ഥലത്ത് പരിശോധന തുടരുകയാണെന്നും ഫയർ സർവീസ് അധികൃതർ . കെട്ടിടത്തിൽ ആളുകൾ കുടുങ്ങിയോയെന്നും സംശയമുണ്ട്.