മൊഹാലിയില്‍ സഹപ്രവര്‍ത്തകര്‍ നോക്കി നില്‍ക്കെ ഓഫീസില്‍ ജോലി ചെയ്തു കൊണ്ടിരുന്ന മുന്‍കാമുകിയെ യുവാവ് കുത്തിക്കൊന്നു. പഞ്ചാബിലെ മൊഹാലിയില്‍ സ്വകാര്യ കമ്പനിയുടെ ഓഫീസിലാണ് സംഭവം. 29കാരിയെയാണ് സഹപ്രവര്‍ത്തകനും മുന്‍കാമുകനുമായ യുവാവ് ക്രൂരമായി കൊലപ്പെടുത്തിയത്. ഓഫീസിലുണ്ടായിരുന്ന മറ്റ് ജീവനക്കാര്‍ അക്രമം തടയാന്‍ ശ്രമിച്ചെങ്കിലും അവരെയെല്ലാം കത്തികാട്ടി ഭീഷണിപ്പെടുത്തിയാണ് യുവാവ് ആക്രമണം നടത്തിയത്. ആക്രമണത്തിന് ശേഷം പ്രതി സ്വയം ജീവനൊടുക്കാന്‍ ശ്രമിക്കുകയും ചെയ്തു.

ഹര്‍വീന്ദറും ഡിംപിളും പട്യാല സ്വദേശികളാണ്. മൊഹാലിയിലെ ഓഫീസിലാണ് ഇവര്‍ ജോലി ചെയ്തിരുന്നത്. ഓഫീസിലെ ഷിഫ്ട് മാറുന്ന സമയത്തായിരുന്നു യുവതിക്ക് നേരെ ആക്രമണം ഉണ്ടായത്. അതിനാല്‍ രണ്ട് മൂന്ന് ജീവനക്കാര്‍ മാത്രമേ ആ സമയം അവിടെ ഉണ്ടായിരുന്നുള്ളൂ. കൊലപാതക ദൃശ്യങ്ങള്‍ ഓഫീസിലെ സിസി ടിവി ക്യാമറയില്‍ പതിഞ്ഞിട്ടുണ്ട്.

ജൂണ്‍ നാലിന് വൈകിട്ടാണ് ദാരുണമായ സംഭവം നടന്നത്. ഡിംപിള്‍ എന്ന യുവതിയാണ് കൊല്ലപ്പെട്ടത്. പ്രതിയായ ഹര്‍വീന്ദര്‍ മാന്‍ ഡിംപിളിനെ തുടര്‍ച്ചയായി കത്തി കൊണ്ട് കുത്തി പരിക്കേല്‍പ്പിച്ച ശേഷം കഴുത്തറുത്ത് ആത്മഹത്യക്ക് ശ്രമിക്കുകയായിരുന്നു. ഇരുവരെയും സഹപ്രവര്‍ത്തകര്‍ ഉടന്‍ തന്നെ ആശുപത്രിയില്‍ എത്തിച്ചെങ്കിലും യുവതി അതിനോടകം മരണപ്പെട്ടിരുന്നു. യുവാവ് ഗുരുതരാവസ്ഥയില്‍ ആശുപത്രിയില്‍ ചികിത്സയിലാണ്.