കര്‍ണാടകത്തില്‍ വിജയനഗരയിലും കൊപ്പളയിലുമാണ് കവര്‍ച്ചക്കാര്‍ എസ്ബിഐയുടെ എടിഎം കൗണ്ടറുകളില്‍ കവര്‍ച്ചാ ശ്രമം. മോഷണശ്രമം പരാജയപ്പെട്ടെങ്കിലും രണ്ടിടത്തും പ്രതികളെ പിടികൂടാനായില്ല. വിജയനഗരയിലായിരുന്നു ആദ്യ കവര്‍ച്ചാ ശ്രമം. കനകദാസ സര്‍ക്കിളിലെ എടിഎമ്മില്‍ എത്തിയത് നാലംഗ സംഘമാണ്. സിസിടിവി ക്യാമറകളിലേക്ക് സ്‌പ്രേ പെയിന്റടിച്ച് ദൃശ്യങ്ങള്‍ പകര്‍ത്തുന്നത് തടസപ്പെടുത്തി. എന്നാല്‍ എടിഎം തുറക്കാന്‍ ശ്രമിച്ചതോടെ സൈറണ്‍ മുഴങ്ങുകയും വിവരം കണ്‍ട്രോള്‍ റൂമില്‍ അറിയുകയുമായിരുന്നു. ബീറ്റ് പൊലീസുകാര്‍ ഉടന്‍ സ്ഥലത്തെത്തിയെങ്കിലും മോഷ്ടാക്കള്‍ രക്ഷപ്പെട്ടു.

ഹൊസ്‌പേട്ട് പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്. കൊപ്പള സിറ്റിയില്‍ പുല!ര്‍ച്ചെ മൂന്ന് മണിക്കും മൂന്നരക്കും ഇടയിലാണ് കവര്‍ച്ചാ ശ്രമം നടന്നത്. ഇവിടെയും കവര്‍ച്ചക്കാര്‍ ലക്ഷ്യമിട്ടത് എസ്ബിഐ എടിഎം തന്നെയാണ്. ഹൊസ്‌പേട്ട് റോഡിലുള്ള എടിഎമ്മില്‍ പ്രവേശിച്ച സംഘം സമാന രീതിയില്‍ കറുത്ത സ്‌പ്രേ പെയിന്റടിച്ച് സിസിടിവി ക്യാമറാ കണ്ണുകള്‍ മറച്ചു. എന്നാല്‍ ഗ്യാസ് കട്ടറുപയോഗിച്ച് തുറക്കുന്നതിനിടെ എടിഎമ്മിന് തീപിടിച്ചതോടെ സംഘം ഓടി രക്ഷപ്പെട്ടു. കൊപ്പള സിറ്റി പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്. രണ്ടിടത്തും കവര്‍ച്ച നടത്തിയത് ഒരേ സംഘമാണോ എന്ന സംശയം പൊലീസിനുണ്ട്.