വിവാഹം കഴിഞ്ഞ് ദിവസങ്ങള്‍ക്ക് ശേഷം, തന്റെ ഭാര്യ ഒരു ട്രാന്‍സ്‌ജെന്‍ഡര്‍ ആണെന്ന് ആരോപിച്ച് 32കാരനായ യുവാവ് പരാതിയുമായി രംഗത്തെത്തി. മധ്യപ്രദേശിലെ ഷാജാപൂരിലാണ് സംഭവം. വിവാഹത്തിന് മുന്‍പ് ഇക്കാര്യം മറച്ചുവെച്ചതിന് ഭാര്യയുടെ വീട്ടുകാര്‍ക്കെതിരെ യുവാവ് പരാതിയും നല്‍കി. വിവാഹം കഴിഞ്ഞ് 25 ദിവസങ്ങള്‍ക്ക് ശേഷമാണ് ഭാര്യ ട്രാന്‍സ്‌ജെന്‍ഡറാണെന്ന് താന്‍ മനസിലാക്കിയതെന്നാണ് യുവാവ് പറയുന്നത്. ഇയാളുടെ പരാതിയില്‍ ഭാര്യയുടെ വീട്ടിലെ അഞ്ച് അംഗങ്ങള്‍ക്കെതിരെ പൊലീസ് കേസെടുത്തു. അതേസമയം, ആരോപണം സ്ഥിരീകരിക്കപ്പെട്ടിട്ടില്ലെന്നും വൈദ്യപരിശോധനയ്ക്ക് ശേഷം മാത്രമേ സത്യമെന്താണെന്ന് വ്യക്തമാവുകയുള്ളുവെന്നും പൊലീസ് അറിയിച്ചു. ഷാജാപൂരില്‍ പച്ചക്കറി വ്യാപാരിയായ യുവാവും രാജ്ഗഡ് ജില്ലയിലെ പചോര്‍ സ്വദേശിയായ യുവതിയും തമ്മിലുള്ള വിവാഹം അയല്‍വാസി വഴിയാണ് ആലോചിച്ചത്. അടുത്ത വര്‍ഷം വിവാഹം നടത്താനായിരുന്നു യുവാവിന്റെ കുടുംബം തീരുമാനിച്ചിരുന്നതെങ്കിലും, വധുവിന്റെ കുടുംബം ഉടന്‍ തന്നെ വിവാഹം നടത്തണമെന്ന് നിര്‍ബന്ധിക്കുകയായിരുന്നുവെന്ന് ആരോപണമുണ്ട്. ജൂണ്‍ 29ന് ഒരു ക്ഷേത്രത്തില്‍ വെച്ച് ഹിന്ദു ആചാരപ്രകാരമായിരുന്നു വിവാഹം. വിവാഹത്തിനായി വരന്റെ കുടുംബം ഏകദേശം 5 ലക്ഷം രൂപ ചെലവഴിച്ചു. യുവതിയുടെ കുടുംബത്തിന് ഒരു ലക്ഷം രൂപ പണമായി നല്‍കിയതായും വരന്റെ കുടുംബം പറഞ്ഞു.വിവാഹ രാത്രിയില്‍ ആര്‍ത്തവമാണെന്ന് പറഞ്ഞും, തൊട്ടടുത്ത ദിവസം വയറുവേദനയാണെന്ന് പറഞ്ഞും പങ്കാളി ലൈംഗിക ബന്ധത്തിന് വിസമ്മതിച്ചതായി പരാതിയില്‍ പറയുന്നു. ജൂലൈ 2ന് സ്വന്തം വീട്ടിലേക്ക് മടങ്ങിയ ഇവര്‍ ജൂലൈ 23നാണ് തിരികെ ഭര്‍തൃവീട്ടിലെത്തിയത്.

പങ്കാളി ഷേവ് ചെയ്യുന്നത് യുവാവിന്റെ സഹോദരി കണ്ടതോടെയാണ് കുടുംബത്തിന് സംശയം തോന്നിയത്. തുടര്‍ന്ന് ഇവര്‍ ട്രാന്‍സ്‌ജെന്‍ഡറാണെന്ന് സംശയിക്കുകയും വിവാഹത്തിന് മുന്‍പ് ഈ വിവരം മനഃപൂര്‍വ്വം മറച്ചുവെക്കുകയായിരുന്നുവെന്ന് ആരോപിക്കുകയും ചെയ്തു. ജൂലൈ 24 ന് വരന്റെ കുടുംബം ഭാര്യയോട് ഇക്കാര്യത്തെക്കുറിച്ച് ചോദിക്കുകയും ബന്ധുക്കളെ അറിയിക്കുകയും യുവതിയെ തിരികെ കൊണ്ടുപോകാന്‍ അഭ്യര്‍ഥിക്കുകയും ചെയ്തുവെന്ന് പരാതിയില്‍ പറയുന്നു. എന്നാല്‍, പ്രശ്‌നം പരിഹരിക്കുന്നതിന് പകരം ബന്ധുക്കള്‍ ഷാജാപൂരിലെത്തി വരന്റെ കുടുംബത്തെ ആക്രമിക്കുകയും അസഭ്യം പറയുകയും ചെയ്തു.പരാതിയുടെ അടിസ്ഥാനത്തില്‍ ജൂലൈ 25 ന് ഭാര്യവീട്ടുകാര്‍ക്കെതിരെ പൊലീസ് കേസെടുത്തു. 'ഒരു വ്യക്തി ട്രാന്‍സ്‌ജെന്‍ഡര്‍ ആണോ എന്ന് വൈദ്യപരിശോധനയ്ക്ക് ശേഷം മാത്രമേ സ്ഥിരീകരിക്കാന്‍ കഴിയൂ,' എന്ന് കോട്‌വാലി പോലീസ് സ്‌റ്റേഷന്‍ ചുമതലയുള്ള സന്തോഷ് ബഘേല പറഞ്ഞു. ആരോപണങ്ങള്‍ ശരിയാണെന്ന് തെളിഞ്ഞാല്‍ പ്രതിക്കെതിരെ വഞ്ചനാക്കുറ്റത്തിന് കേസെടുക്കുമെന്നും അദ്ദേഹം കൂട്ടിച്ചേര്‍ത്തു.