പശ്ചിമേഷ്യന് സംഘര്ഷത്തില് വിവിധ രാജ്യങ്ങളിലായി ഇതുവരെ 16 ഇന്ത്യാക്കാര് കൊല്ലപ്പെട്ടെന്ന് കേന്ദ്രം
പശ്ചിമേഷ്യന് സംഘര്ഷത്തിനിടെ 10 നാവികര് ഉള്പ്പെടെ 16 ഇന്ത്യന് പൗരന്മാര് കൊല്ലപ്പെട്ടതായി കേന്ദ്ര സര്ക്കാര് പാര്ലമെന്റില് അറിയിച്ചു. വിവിധ ആക്രമണങ്ങളിലും അനിഷ്ട സംഭവങ്ങളിലുമായി 75 ഓളം ഇന്ത്യക്കാര്ക്ക് പരിക്കേറ്റിട്ടുണ്ടെന്നും വിദേശകാര്യ സഹമന്ത്രി കീര്ത്തി വര്ദ്ധന് സിംഗ് രാജ്യസഭയില് അറിയിച്ചു. കൊല്ലപ്പെട്ടവരുടെ മൃതദേഹങ്ങള് നാട്ടിലെത്തിക്കാനും പരിക്കേറ്റവര്ക്ക് അടിയന്തര വൈദ്യസഹായം ഉറപ്പാക്കാനും ഇന്ത്യന് എംബസികള് വഴി നടപടികള് സ്വീകരിച്ചുവരികയാണെന്നും സര്ക്കാര് വ്യക്തമാക്കി. വിവിധ രാജ്യങ്ങളിലായി റിപ്പോര്ട്ട് ചെയ്ത മരണങ്ങളുടെ കണക്കും കേന്ദ്രം പുറത്തുവിട്ടു. എട്ട് പേര് ഒമാനിലും നാല് പേര് യു.എ.ഇയിലുമാണ് കൊല്ലപ്പെട്ടത്. കുവൈറ്റില് രണ്ട് പേരും ഇറാനിലും സൗദി അറേബ്യയിലും ഓരോ മരണങ്ങള് വീതവും സ്ഥിരീകരിച്ചിട്ടുണ്ട്. പരിക്കേറ്റ 75 പേരില് ഭൂരിഭാഗവും യു.എ.ഇ (32), ഒമാന് (24), കുവൈറ്റ് (13) എന്നീ രാജ്യങ്ങളിലാണ്. ഖത്തര്, സൗദി അറേബ്യ, ഇസ്രായേല് എന്നിവിടങ്ങളിലും ഇന്ത്യക്കാര്ക്ക് പരിക്കേറ്റിട്ടുണ്ട്. ഖത്തറിലെ റാസ് ലഫാന് ഗ്യാസ് പ്ലാന്റിലുണ്ടായ അപകടത്തില് 12 ഇന്ത്യന് തൊഴിലാളികള് കൊല്ലപ്പെട്ടെന്നും കേന്ദ്രം സ്ഥിരീകരിച്ചു. മേഖലയില് സംഘര്ഷം കടുക്കുന്ന സാഹചര്യത്തില് പ്രവാസി ഇന്ത്യക്കാരുടെ സുരക്ഷ ഉറപ്പാക്കാന് ഇന്ത്യന് എംബസികള്ക്കും നയതന്ത്ര കാര്യാലയങ്ങള്ക്കും കര്ശന നിര്ദ്ദേശം നല്കിയിട്ടുണ്ട്. ഇറാനില് കുടുങ്ങിക്കിടന്ന 2500ലധികം ഇന്ത്യാക്കാരെ അയല്രാജ്യങ്ങള് വഴി നാട്ടിലെത്തിക്കാന് കഴിഞ്ഞതായും വിദേശകാര്യ മന്ത്രാലയം കൂട്ടിച്ചേര്ത്തു. ബാധിക്കപ്പെട്ടവര്ക്ക് ആവശ്യമായ എല്ലാ സാമ്പത്തികവും നിയമപരവുമായ സഹായങ്ങള് നല്കി വരികയാണെന്നും സര്ക്കാര് അറിയിച്ചു.
https://www.facebook.com/Malayalivartha
