കേന്ദ്ര സര്‍ക്കാര്‍ പിഎം കിസാന്‍ സമ്മാന്‍ നിധി അഞ്ചു വര്‍ഷത്തേക്ക് കൂടി നീട്ടി. ഇന്ന് ചേര്‍ന്ന കേന്ദ്ര മന്ത്രിസഭാ യോഗമാണ് പിഎം കിസാന്‍ പദ്ധതി 2030-31 സാമ്പത്തിക വര്‍ഷം വരെ നീട്ടാന്‍ അനുമതി നല്‍കിയത്. കേന്ദ്ര വാര്‍ത്താവിതരണ പ്രക്ഷോപണ മന്ത്രി അശ്വനി വൈഷ്ണവാണ് മന്ത്രിസഭാ തീരുമാനങ്ങള്‍ വാര്‍ത്താസമ്മേളനത്തില്‍ അറിയിച്ചത്.

അഞ്ച് വര്‍ഷത്തേക്ക് 3,15,614 കോടി രൂപയുടെ സാമ്പത്തിക നീക്കിവയ്‌പോടെയാണ് പദ്ധതിയുടെ കാലാവധി ദീര്‍ഘിപ്പിച്ചത്. ഇതോടെ പദ്ധതിക്ക് കീഴില്‍ വരുന്ന അര്‍ഹരായ കര്‍ഷകര്‍ക്ക് പ്രതിവര്‍ഷം 6000 രൂപ തുടര്‍ന്നും ലഭിക്കും. ഗുണഭോക്താക്കളുടെ ബാങ്ക് അക്കൗണ്ടുകളിലേക്ക് പണം നേരിട്ടെത്തിക്കുന്ന ഡയറക്ട് ബെനഫിറ്റ് ട്രാന്‍സ്ഫര്‍ സംവിധാനത്തിലൂടെയാണ് തുക വിതരണം ചെയ്യുന്നത്.

രാജ്യത്തെ കോടിക്കണക്കിന് വരുന്ന കര്‍ഷകര്‍ക്ക് സാമ്പത്തിക സുരക്ഷിതത്വം ഉറപ്പാക്കുക എന്ന ലക്ഷ്യത്തോടെ 2019 ഫെബ്രുവരി 24നാണ് പിഎം കിസാന്‍ പദ്ധതി ആരംഭിച്ചത്. കേന്ദ്രാവിഷ്‌കൃത പദ്ധതി വഴി ഓരോ കര്‍ഷക കുടുംബത്തിനും പ്രതിവര്‍ഷം 6000 രൂപ വീതം മൂന്നുതുല്യ ഗഡുക്കളായി സാമ്പത്തിക സഹായം ലഭിക്കും. ആധാര്‍ അധിഷ്ഠിത ബാങ്ക് അക്കൗണ്ടുകളിലേക്ക് പണം നേരിട്ടാണ് എത്തിക്കുന്നത്.