തമിഴ്‌നാട് രാഷ്ട്രീയത്തിൽ വീണ്ടുമൊരു വിവാദ കൊടുങ്കാറ്റ്. ഇത്തവണ വിവാദത്തിലകപ്പെട്ടിരിക്കുന്നത് ഡിഎംകെ (DMK) നേതാവും പ്രതിപക്ഷ നേതാവുമായ ഉദയനിധി സ്റ്റാലിനാണ്. പാർട്ടി യോഗത്തിനിടെ നടി തൃഷയെക്കുറിച്ച് ഉദയനിധി നടത്തിയ 'ദ്വയാർഥ' പ്രയോഗമാണ് പുതിയ രാഷ്ട്രീയ പോരിലേക്ക് വഴിതുറന്നിരിക്കുന്നത്. ഇതിനെതിരെ തമിഴക വെട്രി കഴകം (TVK) പ്രവർത്തകരും വിജയ് ആരാധകരും ശക്തമായ പ്രതിഷേധവുമായി രംഗത്തെത്തിയിട്ടുണ്ട്. കാവേരി നദീജല തർക്കത്തെക്കുറിച്ചും കർഷകരുടെ പ്രശ്നങ്ങളെക്കുറിച്ചും സംസാരിക്കാൻ ഡിഎംകെ സംഘടിപ്പിച്ച വേദിയിലാണ് നാടകീയ സംഭവങ്ങൾ അരങ്ങേറിയത്.

തമിഴ്‌നാട്ടിലേക്ക് വെള്ളം എത്തിക്കുന്നതിനേക്കാൾ മുഖ്യമന്ത്രി വിജയ് മറ്റ് ചില കാര്യങ്ങളിലാണ് ശ്രദ്ധ കേന്ദ്രീകരിക്കുന്നത് എന്ന് ഉദയനിധി പ്രസംഗത്തിനിടെ ആരോപിച്ചു.ഈ പരാമർശം കേട്ടയുടൻ സദസിലുണ്ടായിരുന്ന ഡിഎംകെ പ്രവർത്തകർ ഒന്നിച്ച് "തൃഷ... തൃഷ..." എന്ന് ഉച്ചത്തിൽ മുദ്രാവാക്യം വിളിക്കാൻ തുടങ്ങി. പ്രവർത്തകർ ആവേശത്തിലായതോടെ, പ്രസംഗം നിർത്തിവെച്ച് തന്റെ പരാമർശം കാവേരിയെപ്പറ്റിയാണെന്നും അതൊരു തമാശ മാത്രമാണെന്നും ഉദയനിധി പറയുകയായിരുന്നു. ഇത് സദസിൽ വലിയ ചിരിക്കും കയ്യടിക്കും ഇടയാക്കി.ഈ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചതോടെയാണ് ഉദയനിധിയുടെ വാക്കുകളിലും അണികളുടെ പ്രതികരണത്തിലും മോശം അർത്ഥങ്ങൾ  അടങ്ങിയിട്ടുണ്ടെന്ന വിമർശനം ഉയർന്നത്.

പൊതുവേദികളിൽ പാലിക്കേണ്ട രാഷ്ട്രീയ മര്യാദ ഉദയനിധി ലംഘിച്ചുവെന്നും സ്ത്രീകളെ രാഷ്ട്രീയ വൈരാഗ്യ തീർക്കലിനായി കരുവാക്കുന്നത് ഒഴിവാക്കണമെന്നും വിവിധ കോണുകളിൽ നിന്ന് ആവശ്യമുയരുന്നുണ്ട്. മുഖ്യമന്ത്രി വിജയ്‌യുമായുള്ള രാഷ്ട്രീയ പോരാട്ടത്തിലേക്ക് നടി തൃഷയുടെ പേര് വലിച്ചിഴച്ചതിനെതിരെ തമിഴ്‌നാട്ടിൽ പ്രതിഷേധം കടുക്കുകയാണ്. ഉദയനിധി സ്റ്റാലിന്റെ പ്രസംഗത്തിന്റെ വീഡിയോ ദൃശ്യങ്ങൾ പ്രചരിപ്പിക്കരുതെന്ന ആവശ്യവും ശക്തമായിട്ടുണ്ട്.