സ്‌കൂള്‍ വിദ്യാര്‍ഥികള്‍ക്കായി തമിഴ്‌നാട് സര്‍ക്കാര്‍ നടപ്പിലാക്കി വരുന്ന 'പെരുന്തലൈവര്‍ കാമരാജ് പ്രഭാതഭക്ഷണ പദ്ധതി'യില്‍ പുതിയ മാറ്റങ്ങളും വിഭവങ്ങളും ഉള്‍പ്പെടുത്താന്‍ ആലോചന. മുഖ്യമന്ത്രി സി. ജോസഫ് വിജയ് ഈ പദ്ധതി ആറുമുതല്‍ എട്ടാം ക്ലാസ് വരെയുള്ള കുട്ടികളിലേക്ക് വ്യാപിപ്പിക്കാന്‍ ഒരുങ്ങുന്നതിനിടയിലാണ് പുതിയ മെനു ചര്‍ച്ചകളില്‍ ഇടംപിടിച്ചിരിക്കുന്നത്. ഇതിന്റെ ഭാഗമായി സ്‌കൂള്‍ ഭക്ഷണത്തില്‍ ചിക്കന്‍ ബിരിയാണി പോലുള്ള നോണ്‍വെജ് വിഭവങ്ങള്‍ ഉള്‍പ്പെടുത്തുന്നതിനുള്ള സാധ്യതകളും പരിഗണനയിലുണ്ടെന്ന് സ്‌കൂള്‍ വിദ്യാഭ്യാസ മന്ത്രി എ. രാജ്‌മോഹന്‍ സൂചിപ്പിച്ചു.

സെപ്റ്റംബര്‍ 22 ചൊവ്വാഴ്ചയാണ് പദ്ധതിയുടെ പുതിയ വിപുലീകരണം ഔദ്യോഗികമായി ആരംഭിക്കുന്നത്. ഇതിന്റെ മുന്നോടിയായി സെക്രട്ടറിയേറ്റില്‍ മാധ്യമപ്രവര്‍ത്തകരോട് സംസാരിക്കവെയാണ് മന്ത്രി ഇക്കാര്യങ്ങള്‍ വ്യക്തമാക്കിയത്. സ്‌കൂള്‍ കുട്ടികള്‍ക്ക് ആരോഗ്യകരവും സമതുലിതമായതുമായ ഭക്ഷണം ഉറപ്പാക്കുന്നതോടൊപ്പം ഭക്ഷണത്തില്‍ വൈവിധ്യവും രുചിയും കൊണ്ടുവരാന്‍ മുഖ്യമന്ത്രി ഒരു പ്രത്യേക സമിതിയെ ചുമതലപ്പെടുത്തിയിട്ടുണ്ടെന്നും അദ്ദേഹം പറഞ്ഞു. കുട്ടികള്‍ക്ക് മികച്ച ഭക്ഷണം നല്‍കേണ്ടതിന്റെ പ്രാധാന്യം ഊന്നിക്കൊണ്ട് അദ്ദേഹം നടത്തിയ പരാമര്‍ശങ്ങള്‍ ശ്രദ്ധേയമായി.

' ജയിലിലെ തടവുകാരനുപോലും ഇപ്പോള്‍ ചിക്കന്‍ ബിരിയാണി കഴിക്കാന്‍ ലഭിക്കുന്നുണ്ട്. അങ്ങനെയെങ്കില്‍ നമ്മുടെ സ്‌കൂളുകളിലെ കുട്ടികള്‍ക്ക് എന്തുകൊണ്ട്ബി രിയാണി കഴിച്ചുകൂടാ?' എന്ന് മന്ത്രി ചോദിച്ചു. എങ്കിലും, ഈ പദ്ധതി പെട്ടെന്ന് നടപ്പിലാക്കാന്‍ കഴിയില്ലെന്നും കൃത്യമായ ശുചിത്വ മാനദണ്ഡങ്ങളും ഗുണനിലവാരവും ഉറപ്പുവരുത്തുന്നതിനായി ഒരു പൈലറ്റ് പ്രോജക്റ്റും കര്‍ശനമായ പരിശോധനകളും ഇതിനായി ആവശ്യമാണെന്നും അദ്ദേഹം വ്യക്തമാക്കി. നിലവില്‍ ഉപ്പുമാവ്, കിച്ചടി, പൊങ്കല്‍ എന്നിവക്കൊപ്പം ആഴ്ചയില്‍ രണ്ടുതവണ മില്ലറ്റ് (ചെറുധാന്യങ്ങള്‍) അടിസ്ഥാനമാക്കിയുള്ള വിഭവങ്ങളുമാണ് പ്രഭാതഭക്ഷണ പദ്ധതിയിലൂടെ നല്‍കി വരുന്നത്. ഈ പദ്ധതിയുടെ രണ്ടാം ഘട്ട വിപുലീകരണത്തിലൂടെ അധികമായി 15.30 ലക്ഷത്തോളം വിദ്യാര്‍ഥികള്‍ക്കുകൂടി പ്രയോജനം ലഭിക്കും. ഇതിനായി ഈ സാമ്പത്തിക വര്‍ഷത്തെ ബജറ്റില്‍ 217.63 കോടി രൂപയുടെ അധിക ഫണ്ടും സര്‍ക്കാര്‍ വകയിരുത്തിയിട്ടുണ്ട്. ഇതോടെ പദ്ധതിയുടെ ആകെ തുക 724 കോടി രൂപയായി ഉയര്‍ന്നു.

മഹാരാഷ്ട്രയിലെയും തിരുപ്പൂരിലെയും ചില ഉപതെരഞ്ഞെടുപ്പുകളുമായി ബന്ധപ്പെട്ട മാതൃകാ പെരുമാറ്റച്ചട്ടം നിലനില്‍ക്കുന്നതൊഴിച്ചാല്‍ തമിഴ്‌നാട്ടിലെ മറ്റ് സര്‍ക്കാര്‍, എയ്ഡഡ് സ്‌കൂളുകളിലായി പദ്ധതി വിപുലമായി നടപ്പിലാക്കാനാണ് തീരുമാനം. അതാത് സ്‌കൂളുകളിലെ കുടുംബശ്രീ/സ്വയംസഹായ സംഘങ്ങളുടെ നേതൃത്വത്തിലാണ് കുട്ടികള്‍ക്കായി ഭക്ഷണം തയാറാക്കി വിളമ്പുന്നത്. കുട്ടികളുടെ ആരോഗ്യം, പോഷകാഹാരം, സ്‌കൂളിലെ ഹാജര്‍ നില എന്നിവ വര്‍ദ്ധിപ്പിക്കുക എന്ന ലക്ഷ്യത്തോടെയാണ് ഈ പദ്ധതി സര്‍ക്കാര്‍ വിപുലീകരിക്കുന്നത്. സെപ്റ്റംബര്‍ 22ന് തിരുവന്‍പിയൂരിലെ സര്‍ക്കാര്‍ എയ്ഡഡ് സ്‌കൂളില്‍ വെച്ച് മുഖ്യമന്ത്രി സി. ജോസഫ് വിജയ് ഈ പദ്ധതി ഔദ്യോഗികമായി ഉദ്ഘാടനം ചെയ്യും.