സര്‍ക്കാര്‍ ആശുപത്രികളില്‍ ജനിക്കുന്ന നവജാത ശിശുക്കള്‍ക്ക് ഒരു ഗ്രാം സ്വര്‍ണ മോതിരം സമ്മാനിക്കുന്ന 'തായ്മാമന്‍ തങ്ക മോതിരം' പദ്ധതിയുമായി തമിഴ്‌നാട് മുഖ്യമന്ത്രി സി ജോസഫ് വിജയ്. ടിവികെ സര്‍ക്കാരിന്റെ പ്രധാന തിരഞ്ഞെടുപ്പ് വാഗ്ദാനങ്ങളിലൊന്നായിരുന്നു ഇത്. സെപ്തംബര്‍ 28ന് പദ്ധതി ഔദ്യോഗികമായി ഉദ്ഘാടനം ചെയ്യും. ജൂണ്‍ 22 മുതല്‍ സര്‍ക്കാര്‍ ആശുപത്രികളില്‍ ജനിച്ച എല്ലാ കുഞ്ഞുങ്ങളും ഈ പദ്ധതിക്ക് അര്‍ഹരാണ്. മോതിരങ്ങള്‍ വിതരണം ചെയ്യുന്നതിനുള്ള ക്രമീകരണങ്ങള്‍ ഏര്‍പ്പെടുത്തിയിട്ടുണ്ടെന്നാണ് റിപ്പോര്‍ട്ടുകള്‍. ഒക്ടോബര്‍ ആറിന് നടക്കാനിരിക്കുന്ന നിയമസഭാ ഉപതിരഞ്ഞെടുപ്പുകള്‍ക്ക് മുന്നോടിയായാണ് പ്രഖ്യാപനം.

സെപ്തംബര്‍ 22 മുതല്‍ 107 കേന്ദ്രങ്ങള്‍ വഴിയാണ് മോതിരങ്ങള്‍ വിതരണം ചെയ്യുന്നത്. തുടര്‍ന്ന്, സര്‍ക്കാര്‍ ആശുപത്രികളില്‍ നിന്ന് ഡിസ്ചാര്‍ജ് ചെയ്ത് വീട്ടിലേക്ക് മടങ്ങുമ്പോള്‍ തന്നെ അര്‍ഹരായ കുഞ്ഞുങ്ങള്‍ക്ക് സ്വര്‍ണ്ണ മോതിരം കൈമാറും. തമിഴ്‌നാട്ടില്‍ സ്ഥിരതാമസക്കാരായ ആര്‍.സി.എച്ച് തിരിച്ചറിയല്‍ നമ്പറോടുകൂടി പി.ഐ.സി.എം.ഇയില്‍ രജിസ്റ്റര്‍ ചെയ്തവരുമായ അമ്മമാരുടെ കുഞ്ഞുങ്ങള്‍ക്കാണ് പദ്ധതിക്ക് അര്‍ഹതയുള്ളത്. ഓരോ മോതിരത്തിലും പ്രത്യേക സീരിയല്‍ നമ്പര്‍ ഉണ്ടായിരിക്കും. കൂടാതെ സുരക്ഷിതമായ പാക്കിംഗിലാണ് ഇവ നല്‍കുക. ആദ്യ ഘട്ടത്തില്‍ 1.28 ലക്ഷം മോതിരങ്ങള്‍ ഇതിനോടകം വാങ്ങിയിട്ടുണ്ട്. സംസ്ഥാന ബഡ്ജറ്റില്‍ പദ്ധതിക്കായി 755 കോടി രൂപയാണ് സര്‍ക്കാര്‍ വകയിരുത്തിയിരിക്കുന്നത്.

അതേസമയം ഉപതെരഞ്ഞെടുപ്പ് നടക്കുന്ന മധുരാന്തകം, ധാരാപുരം എന്നീ രണ്ട് മണ്ഡലങ്ങളിലും തമിഴ്‌നാട് സര്‍ക്കാര്‍ അനുമതി നേടാത്തതിനാല്‍ പദ്ധതി നടപ്പിലാക്കാന്‍ കഴിയില്ലെന്ന് തിരഞ്ഞെടുപ്പ് കമ്മീഷന്‍ അറിയിച്ചു. സൗജന്യ പ്രഭാതഭക്ഷണ പദ്ധതിക്ക് മാത്രമാണ് ഇവിടെ സംസ്ഥാന സര്‍ക്കാര്‍ ഇലക്ഷന്‍ കമ്മീഷന്റെ അനുമതി വാങ്ങിയിട്ടുള്ളത്.

സര്‍ക്കാര്‍ സംവിധാനങ്ങളില്‍ പൊതുജനങ്ങളുടെ വിശ്വാസം വര്‍ദ്ധിപ്പിക്കുക, ആശുപത്രികളില്‍ സുരക്ഷിത പ്രസവങ്ങള്‍ പ്രോത്സാഹിപ്പിക്കുക, നവജാത ശിശുവിന് മാതൃസഹോദരന്‍ (അമ്മാവന്‍) സ്വര്‍ണം സമ്മാനിക്കുന്ന തമിഴ് പാരമ്പര്യം കാത്തുസൂക്ഷിക്കുക എന്നിവയാണ് പദ്ധതിയുടെ ലക്ഷ്യങ്ങള്‍. തമിഴ്‌നാട്ടില്‍ പ്രതിവര്‍ഷം ഏകദേശം 7.8 ലക്ഷം ജനനങ്ങളാണ് നടക്കുന്നത്. ഇതില്‍ 99.9 ശതമാനവും ആശുപത്രികളിലാണ് നടക്കുന്നത്. ഏകദേശം 4.2 ലക്ഷം പ്രസവങ്ങള്‍ (53 ശതമാനം) നടക്കുന്നത് സര്‍ക്കാര്‍ ആശുപത്രികളിലാണ്.

മാതൃശിശുക്ഷേമം, പൊതുജനാരോഗ്യം, തമിഴ് സംസ്‌കാരം എന്നിവയാണ് ടിവികെ സര്‍ക്കാരിന്റെ ലക്ഷ്യമെന്ന് പറയുന്നുണ്ടെങ്കിലും സ്വര്‍ണ മോതിര പദ്ധതിക്ക് വലിയ രാഷ്ട്രീയ പ്രാധാന്യമുണ്ട്. ഡി.എം.കെ സര്‍ക്കാരില്‍ നിന്ന് തകര്‍ന്ന സാമ്പത്തിക സ്ഥിതിയാണ് തങ്ങള്‍ക്ക് ലഭിച്ചതെന്നും തമിഴ്‌നാടിന്റെ കടം 10 ലക്ഷം കോടി രൂപയോളമാണെന്നുമുള്ള ടി.വി.കെ സര്‍ക്കാരിന്റെ അവകാശവാദങ്ങള്‍ക്കിടയിലാണ് പദ്ധതി നടപ്പിലാക്കുന്നത് എന്നതും ശ്രദ്ധേയമാണ്.