ഉത്തർപ്രദേശിൽ കുശിനഗറിൽ വാനും ട്രെയിലർ ലോറിയും കൂട്ടിയിടിച്ച് ഒരു കുടുംബത്തിലെ അഞ്ചുപേർ ഉൾപ്പെടെ ആറുപേർക്ക് ദാരുണാന്ത്യം. കുശിനഗറിലെ ദേശീയപാത 28-ലാണ് ദാരുണമായ വാഹനാപകടമുണ്ടായത്. ഹത കോട്വാലി പോലീസ് സ്റ്റേഷൻ പരിധിയിലെ തരുവാദിഹിന് സമീപം രാത്രിയിലായിരുന്നു അപകടം സംഭവിച്ചത്.

എട്ടുപേരുമായി സഞ്ചരിച്ച ഒമ്നി വാൻ ട്രെയിലർ ലോറിയുമായി കൂട്ടിയിടിക്കുകയായിരുന്നു. ഇടിയുടെ ആഘാതത്തിൽ വാനിലുണ്ടായിരുന്ന ആറുപേരും സംഭവസ്ഥലത്തുതന്നെ മരണമടഞ്ഞു. അപകടത്തിൽ ഗുരുതരമായി പരിക്കേറ്റ രണ്ടുപേരെ ആദ്യം ആശുപത്രിയിൽ പ്രവേശിപ്പിച്ചു. പിന്നീട് വിദഗ്ധ ചികിത്സയ്‌ക്കായി ഗോരഖ്പൂർ മെഡിക്കൽ കോളേജിലേക്ക് മാറ്റി.

മരിച്ചവരിൽ അഞ്ചുപേരും ഒരേ കുടുംബാംഗങ്ങളാണ്. കപ്താൻഗഞ്ച് പോലീസ് സ്റ്റേഷൻ പരിധിയിലെ ഭലുഹി ഗ്രാമവാസികളായ ഇവർ ബന്ധുവീട്ടിലെ ആഘോഷത്തിൽ പങ്കെടുത്ത് മടങ്ങുന്നതിനിടെയാണ് അപകടമുണ്ടായത്. കൂട്ടിയിടിയുടെ ആഘാതത്തിൽ വാൻ പൂർണമായും തകർന്നനിലയിലാണ്. വാഹനാവശിഷ്ടങ്ങൾക്കിടയിൽ കുടുങ്ങിയ മൃതദേഹങ്ങൾ നാട്ടുകാരും പോലീസും ചേർന്നാണ് പുറത്തെടുത്തത്.

അതേസമയം സംഭവത്തിൽ ഉത്തർപ്രദേശ് മുഖ്യമന്ത്രി യോഗി ആദിത്യനാഥ് ദുഃഖം രേഖപ്പെടുത്തി. രക്ഷാപ്രവർത്തനങ്ങളും ദുരിതാശ്വാസ നടപടികളും വേഗത്തിലാക്കാനായി ഉദ്യോഗസ്ഥർക്ക് നിർദേശം നൽകി. അപകടസ്ഥലത്തെത്തി ആവശ്യമായ നടപടികൾ സ്വീകരിക്കാനും ഇരകളുടെ കുടുംബങ്ങൾക്ക് സാധ്യമായ എല്ലാ സഹായങ്ങളും ഉറപ്പാക്കാനും മുഖ്യമന്ത്രി നിർദേശിക്കുകയും ചെയ്തു.