ലോകത്തിലെ ഏറ്റവും ഉയരം കൂടിയ കൊടുമുടിയായ എവറസ്റ്റിന്റെ സമീപം വീണ്ടും നടുക്കുന്ന ഹെലികോപ്റ്റർ അപകടം. നേപ്പാളിലെ സോലുഖുംബു ജില്ലയിൽ ലാൻഡിങ്ങിനിടെ രണ്ട് ഹെലികോപ്റ്ററുകൾ കൂട്ടിയിടിച്ചുണ്ടായ അപകടത്തിൽ ഇന്ത്യൻ പൗരൻ മരിച്ചു. ചൊവ്വാഴ്ച രാവിലെ പ്രാദേശിക സമയം 8.11 ഓടെയാണ് അപകടമുണ്ടായത്. എവറസ്റ്റ് ബേസ് ക്യാമ്പിലേക്കുള്ള യാത്രാമാർഗത്തിലെ പെരിചെ ഹെലിപാഡിൽ ഫിഷ്‌ടെയിൽ എയറിന്റെയും എയർ ഡൈനാസ്റ്റിയുടെയും ഹെലികോപ്റ്ററുകളാണ് അപകടത്തിൽപ്പെട്ടത്. ലാൻഡ് ചെയ്യുന്നതിനിടെ രണ്ട് ഹെലികോപ്റ്ററുകളുടെയും റോട്ടർ ബ്ലേഡുകൾ പരസ്പരം ഇടിച്ചതാണ് അപകടത്തിന് കാരണമായതെന്നാണ് പ്രാഥമിക വിവരം. സംഭവത്തിന്റെ ദൃശ്യങ്ങളും പുറത്തുവന്നിട്ടുണ്ട്.

അപകടത്തിൽ മരിച്ച ഇന്ത്യൻ പൗരനെ 47 വയസ്സുകാരനായ വസന്ത് കുമാർ ബാലരാമദുവിനെ തിരിച്ചറിഞ്ഞു. തമിഴ്നാട്ടിലെ ചെന്നൈ സ്വദേശിയാണ് ഇദ്ദേഹമെന്നാണ് റിപ്പോർട്ടുകൾ. ഫിഷ്‌ടെയിൽ എയറിന്റെ ഹെലികോപ്റ്ററിലായിരുന്നു ഇദ്ദേഹം യാത്ര ചെയ്തിരുന്നത്. ന്യൂസിലൻഡ് പൗരനും ഇന്ത്യൻ വംശജനുമായ ഷൈലേഷ് കിഷൻ പട്ടേലിന് അപകടത്തിൽ പരിക്കേറ്റു. ഹെലികോപ്റ്ററിലുണ്ടായിരുന്ന പൈലറ്റുമാർക്കും പരിക്കേറ്റതായാണ് റിപ്പോർട്ടുകൾ. പരിക്കേറ്റവരെ പ്രഭു എയറിന്റെ ഹെലികോപ്റ്റർ ഉപയോഗിച്ച് ആദ്യം ലുക്ലയിലേക്കും തുടർന്ന് ചികിത്സയ്ക്കായി കാഠ്മണ്ഡുവിലേക്കും മാറ്റി.

രക്ഷാപ്രവർത്തനത്തിനും പർവതാരോഹകർക്കും വിനോദസഞ്ചാരികൾക്കും ഹെലികോപ്റ്ററുകൾ വ്യാപകമായി ഉപയോഗിക്കുന്ന മേഖലയാണ് എവറസ്റ്റ് പരിസരം. ദുർഘടമായ ഭൂപ്രകൃതിയും കാലാവസ്ഥയിലെ പെട്ടെന്നുള്ള മാറ്റങ്ങളും ഇവിടെ വ്യോമയാന പ്രവർത്തനങ്ങളെ വെല്ലുവിളി നിറഞ്ഞതാക്കുന്നുണ്ട്. എന്നാൽ ഇത്തവണത്തെ അപകടത്തിന്റെ കൃത്യമായ കാരണം ഇതുവരെ ഔദ്യോഗികമായി സ്ഥിരീകരിച്ചിട്ടില്ല. നേപ്പാൾ പൊലീസും വ്യോമയാന അധികൃതരും സംഭവത്തിൽ അന്വേഷണം ആരംഭിച്ചിട്ടുണ്ട്. അപകടത്തിന്റെ കൂടുതൽ വിവരങ്ങൾ പുറത്തുവരാനുണ്ട്.