അറബിക്കടലിൽ കടൽക്കൊള്ളക്കാർ തടവിലാക്കിയ 'അസിനി'എന്ന മീൻപിടിത്ത ബോട്ടിലെ 20 ജീവനക്കാരെയും അതിസാഹസികമായി രക്ഷപ്പെടുത്തി ഇന്ത്യൻ നാവികസേന.

മുംബൈയിൽ നിന്ന് 3,000 കിലോമീറ്ററിലധികം അകലെ സമുദ്രമധ്യത്തിൽ വെച്ച് നടന്ന 48 മണിക്കൂർ നീണ്ട കൃത്യമായ സൈനിക ദൗത്യത്തിനൊടുവിലാണ് ജീവനക്കാരെ മുഴുവൻ സുരക്ഷിതമായി മോചിപ്പിക്കാൻ കഴിഞ്ഞത്. ഇന്നലെയാണ് നാവികസേന, ബോട്ടിന്റെ സ്ഥാനം കണ്ടെത്തുകയും കൊള്ളക്കാരെ വളഞ്ഞ് സാഹസികമായി ജീവനക്കാരെ മോചിപ്പിക്കുകയും ചെയ്തത്.

മാരകായുധങ്ങളുമായി എത്തിയ കടൽക്കൊള്ളക്കാരുടെ തടവിലായിരുന്ന കപ്പലിനെ കൃത്യമായി പിന്തുടർന്ന് ആക്രമിക്കുകയായിരുന്നു. ഇന്ത്യൻ വ്യോമസേനയുടെ കൃത്യസമയത്തുള്ള പിന്തുണയും സംയുക്ത നീക്കവും ദൗത്യം വേഗത്തിലാക്കാനായി സഹായിച്ചു.. ദൗത്യം വിജയകരമായി പൂർത്തിയാക്കിയ നാവികസേനയെ കേന്ദ്ര പ്രതിരോധ മന്ത്രി രാജ്‌നാഥ് സിംഗ് അഭിനന്ദിക്കുകയും ചെയ്തു.