കണ്ണിൽ മുളകുപൊടി വിതറിയശേഷം ഒാഫീസ്​ ബോയിയു​ടെ കൈയിൽ നിന്ന്​ നാല്​ ലക്ഷം രൂപ തട്ടിയ ആൾ പോലീസ് പിടിയിലായി. നാട്ടുകാരുടെ സഹായത്തോടെ മുംബൈ വി.പി റോഡ്​ പൊലീസ്​ പിടികൂടുകയായിരുന്നു. സംഭവത്തിൽ​ 44കാരനായ സയ്യദ്​ ഷരീഫ്​ ജലാലുദ്ധീനെ പോലീസ് അറസ്റ്റ് ചെയ്തു.

കൊറിയർ കമ്പനി ജീവക്കാരനായ കിഷൻ കോലി(22) ഇടപാടുകാരനിൽ നിന്ന്​​ ശേഖരിച്ച നാല്​ ലക്ഷം രൂപയുമായി ഒാഫീസിലേക്ക്​ മടങ്ങു​മ്പോഴായിരുന്നു മോഷണം. കിഷൻ ഒാഫീസ്​ കെട്ടിടത്തിലേക്ക്​ കയറുന്ന സമയത്ത് ജലാലുദ്ധീൻ പിറകിൽ നിന്ന്​ വിളിച്ച് കണ്ണിൽ​ മുളകുപൊടി എറിയുകയായിരുന്നു. കിഷന്റെ കൈയിൽ നിന്ന്​ പണമടങ്ങിയ ബാഗ്​ തട്ടിയെടുത്തശേഷം ഇയാൾ ഒാടി രക്ഷപ്പെടുന്നതിനിടെ കോലി ബഹളം വെക്കുകയും പരിസരത്തുള്ളവർ ഒാടിക്കൂടുകയും ചെയ്​തിരുന്നു. ജനക്കൂട്ടം ചുറ്റും വളഞ്ഞതോടെ ഇയാൾ രക്ഷപ്പെടാൻ കൈയിലുണ്ടായിരുന്ന കത്തിയെടുത്ത്​ ഭീഷണി മുഴക്കി. ഇൗ സമയത്ത്​ ഇവിടെ പ​ട്രോളിങിൽ ആയിരുന്ന പൊലീസ്​ സംഘം സ്​ഥലത്ത്​ എത്തിയശേഷം നാട്ടുകാരുടെ സഹായത്തോടെ ഇയാളെ കീഴടക്കുകയായിരുന്നു.