അടുത്ത സാമ്പത്തിക വര്‍ഷം വളര്‍ച്ചാനിരക്ക് കൂടുമെന്ന് സാമ്പത്തിക സര്‍വ്വേ റിപ്പോര്‍ട്ട്. എന്നാല്‍ ഇന്ധനവില ക്രമാതീതമായി ഉയരുന്നത് ആശങ്കയാണെന്നും സര്‍വേയില്‍ വ്യക്തമാക്കുന്നു. 7 - 7.5 ശതമാനം വളര്‍ച്ച പ്രതീക്ഷിക്കുന്നെന്നും സര്‍വ്വേ റിപ്പോര്‍ട്ടില്‍ പറയുന്നു. ബജറ്റ് അവതരണത്തിന് മുന്നോടായായാണ് ധനമന്ത്രി അരുണ്‍ ജെയ്റ്റിലി പാര്‍ലമെന്റിന്റെ മേശപ്പുറത്ത് സാമ്പത്തിക സര്‍വേ റിപ്പോര്‍ട്ട് വച്ചത്. ഇപ്പോഴത്തെ വളര്‍ച്ചാ നിരക്ക് 6.75 ശതമാനമാണ്. ധനക്കമ്മി 3.2 ശതമാനമായി കുറയുമെന്നും റിപ്പോര്‍ട്ട് സൂചിപ്പിക്കുന്നു.

വിദേശനിക്ഷപത്തിലെ ഉദാരവല്‍ക്കരണവും കയറ്റുമതിയും ചരക്ക് സേവന നികുതിയും പൊതുമേഖലാ ബാങ്കുകളുടെ അടിത്തറ ശക്തിപ്പെടുത്തിയതും ഈ സാമ്പത്തിക വര്‍ഷത്തിന്റെ രണ്ടാം പാദത്തില്‍ കുതിപ്പേകിയെന്നും റിപ്പോര്‍ട്ടില്‍ പറയുന്നു. ജി.എസ്.ടി നടപ്പാക്കിയ ശേഷം പരോക്ഷമായി നികുതിയടക്കുന്നവരുടെ എണ്ണത്തില്‍ 50 ശതമാനം കൂടിയിട്ടുണ്ട്. നിത്യോപയോഗ സാധനങ്ങളുടെ വിലക്കയറ്റം വെല്ലുവിളിയാണ്. നികുതി വരുമാനം കൂടി. സംസ്ഥാനങ്ങളിലെ നികുതി വരുമാനം കുറഞ്ഞു. നാണ്യപെരുപ്പം 4.4 ശതമാനത്തില്‍ നിന്ന് 3.35 ശതമാനമായി കുറയും. വ്യാവസായിക വളര്‍ച്ച 4.4 ശതമാനമാകും തൊഴില്‍, വിദ്യാഭ്യാസം, കാര്‍ഷികം എന്നീ മേഖലകളിലെ വളര്‍ച്ചയ്ക്കാണ് സര്‍ക്കാര്‍ പ്രാധാന്യം നല്‍കുക.