വിവാദ ആള്‍ദൈവം നിത്യാനന്ദയെ അറസ്റ്റ് ചെയ്ത് ബുധനാഴ്ച ഹാജാരാക്കുവാന്‍ മദ്രാസ് ഹൈക്കോടതി ഉത്തരവിട്ടു. സത്യവാങ്മൂലത്തില്‍ പറഞ്ഞിരിക്കുന്നതെല്ലാം നുണയാണെന്നും തെറ്റിധരിപ്പിക്കുന്ന പ്രസ്ഥാവനകള്‍ തിരുത്താത്തതിനാല്‍ അറസ്റ്റ് വാറന്‍ഡ് പുറപ്പെടുവിക്കുമെന്ന് ജസ്റ്റീസ് ആര്‍. മഹാദേവന്‍ മുന്നറിയിപ്പ് നല്‍കി.

അതേസമയം സ്വാമിയെ അറസ്റ്റ് ചെയ്യുമെന്ന വാര്‍ത്ത വന്നതോടെ സ്വാമിയുടെ ശിഷ്യകളായ നടിമാര്‍ അങ്കലാപ്പിലാണ്. സ്വാമിയെപ്പറ്റി കൂടുതല്‍ അന്വേഷണം വന്നാല്‍ ഗുര്‍മീദ് സിംഗിനെപ്പോലെയാകുമോ എന്നാണ് പലരും സംശയിക്കുന്നത്.

കോടതി നടപടികള്‍ റെക്കോഡ് ചെയ്ത നിത്യാനന്ദയുടെ അനുയായിയുടെ ഫോണ്‍ കോടതി പിടിച്ചുവച്ചിട്ടുണ്ട്. കോടതി കളിസ്ഥലമല്ലെന്നും നടപടികള്‍ ചിത്രീകരിക്കാന്‍ ആരും അധികാരപ്പെടുത്തിയിട്ടില്ലെന്നും കോടതി ശാസിച്ചു. ചിത്രീകരിച്ച ദൃശ്യങ്ങള്‍ ആര്‍ക്കാണ് അയച്ചുകൊടുത്തതെന്ന് കണ്ടെത്തുവാനും നിര്‍ദ്ദേശിച്ചിട്ടുണ്ട്. നൂറിലേറെ പരാതികളാണ് ആശ്രമത്തിന് എതിരെ കെട്ടിക്കിടക്കുന്നതെന്നും ഓര്‍ക്കണമെന്നും കോടതി പറഞ്ഞു.

നേരത്തെ, നിത്യാനന്ദ മധുരയിലെ ആശ്രമധിപതിയാണെന്നാണ് കോടതിയെ തെറ്റിധരിപ്പിച്ചത്. ഇതിനെതിരെ എം. ജഗദലപ്രതാപന്‍ എന്നയാള്‍ മധുര ആശ്രമത്തില്‍ പ്രവേശിപ്പിക്കാന്‍ അനുവദിക്കരുതെന്ന് ആവശ്യപ്പെട്ട് ഹര്‍ജ്ജി സമര്‍പ്പിച്ചിരുന്നു. ഈ സമയങ്ങളില്‍ നിത്യാനന്ദ നല്‍കിയിരുന്ന ഹര്‍ജ്ജികളെല്ലാം തെറ്റായ വിവരങ്ങളാണെന്ന് കണ്ടെത്തുകയായിരുന്നു. ഇതു തിരുത്തണമെന്ന നിര്‍ദ്ദേശമാണ് നിത്യാനന്ദ തുടര്‍ച്ചയായി തള്ളിയത്.

സ്വാമി നിത്യാനന്ദയും നടി രഞ്ജിതയും തമ്മിലുള്ള വീഡിയോ ഒറിജിനല്‍ തന്നെയെന്ന് ഫോറന്‍സിക് പരിശോധനാ റിപ്പോര്‍ട്ട് വന്നതും ഏറെ വിവാദമായിരുന്നു. വീഡിയോ മോര്‍ഫ് ചെയ്തല്ലൈന്നും ദൃശ്യങ്ങളില്‍ ഉള്ളത് നിത്യാനന്ദയും,രഞ്ജിതയും തന്നെയാണെന്നും റിപ്പോര്‍ട്ട് പുറത്തു വന്നിട്ടുണ്ട്. ഏഴു വര്‍ഷം മുന്‍പ് സമര്‍പ്പിച്ച പരിശോധനാ ഫലമാണ് കുറച്ച് നാള്‍ മുമ്പ് പുറത്തു വന്നിരിക്കുന്നത്. ഏഴു വര്‍ഷം മുന്‍പ് സണ്‍ടിവി അടക്കമുള്ള തമിഴ് ചാനലുകളാണ് നടി രഞ്ജിനിയും, നിത്യാനന്ദയും തമ്മിലുള്ള അശ്ലീല ദൃശ്യങ്ങളും, കിടപ്പറ ദൃശ്യങ്ങളും പുറത്തു വിട്ടത്. സ്വാമി വീണ്ടും തന്റെ സന്യാസ ജീവിതവുമായി സജീവമായി രംഗത്തിറങ്ങുന്നതിനിടെയാണ് ഇപ്പോള്‍ വീണ്ടും ദൃശ്യങ്ങള്‍ സജീവ ചര്‍ച്ചയായിരിക്കുന്നത്.

വീഡിയോ പുറത്തു വന്നതിനുശേഷം ഇരുവരും ഇത് നിഷേധിച്ചിരുന്നു. വീഡിയോയിലെ സ്ത്രീ താനല്ലെന്ന വാദമാണ് അന്ന് നടി രഞ്ജിത ഉയര്‍ത്തിയിരുന്നത്. ചാനലിനെതിരെ കേസുമായി നിത്യാനന്ദ കോടതിയെ സമീപിക്കുകയും ചെയ്തു. സംഭവത്തെപ്പറ്റി അന്വേഷണം നടത്തണമെന്നാവശ്യപ്പെട്ട് ബംഗളൂരു കോടതിയില്‍ കേസും നല്‍കിയിരുന്നു. ഇതിനു പിന്നാലെ ബംഗളൂരുവിലെ ഫോറന്‍സിക് ലാബോറട്ടറി വീഡിയോ ഒറിജിനലാണെന്നു റിപ്പോര്‍ട്ട് നല്‍കിയിരുന്നു. ഇതിനെതിരെ 2012 ല്‍ നിത്യാനന്ദ അമേരിക്ക ആസ്ഥാനമായി പ്രവര്‍ത്തിക്കുന്ന അനലിസ്റ്റുകളില്‍ നിന്നു വീഡിയോ വ്യാജമാണെന്ന റിപ്പോര്‍ട്ട് സ്വന്തമാക്കിയിരുന്നു.

കഴിഞ്ഞ ദിവസം രഞ്ജിതയുടെ വണ്ടിയിടിച്ച് ഒരാള്‍ക്ക് പരിക്കേറ്റതും വാര്‍ത്തയായിരുന്നു. ഇടിച്ച ശേഷം നീര്‍ത്താതെപോയ രഞ്ജിതയെ നാട്ടുകാര്‍ ചേസ് ചെയ്താണ് പിടികൂടിയത്.